The Latest
وحدت نیوز(رپورٹ عدیل زیدی) پاراچنار کو ملک میں شیعہ نشین علاقہ اور افغان سرحد سے متصل ہونے کی وجہ سے مذہبی و اسٹریٹیجک اہمیت حاصل ہے، گذشتہ دنوں خیبر پختونخوا کے مختلف اضلاع میں بلدیاتی انتخابات کا دوسرا مرحلہ منعقد ہوا، ان اضلاع میں ضلع کرم بھی شامل تھا۔ پاراچنار اپر کرم میں شامل ضلع کا ہیڈکوارٹر شمار ہوتا ہے، اپر کرم کی میئر کی نشست پر بلدیاتی انتخاب غیر معمولی اہمیت اختیار کر گیا تھا، اس کی وجہ پاکستان تحریک انصاف اور پاکستان پیپلزپارٹی کیساتھ ساتھ شیعہ نمائندہ جماعت مجلس وحدت مسلمین پاکستان کا اس میدان میں وارد ہونا تھا، انتخابی مہم کے آغاز میں سیاسی پنڈت یہ پیشن گوئیاں کر رہے تھے کہ اصل مقابلہ روایتی حریف پی ٹی آئی اور پی پی کے درمیان ہوگا۔ واضح رہے کہ پاراچنار سے منتخب رکن قومی اسمبلی (ساجد حسین طوری) کا تعلق پیپلزپارٹی اور رکن صوبائی اسمبلی سید اقبال میاں کا تعلق پاکستان تحریک انصاف سے ہے۔
مجلس وحدت مسلمین کی جانب سے میئر کی نشست کیلئے علاقہ کے نوجوانوں کی ہردلعزیز شخصیت مولانا مزمل حسین کا انتخاب کیا گیا، جبکہ دیگر اہم امیدواروں میں تحریک انصاف کی جانب سے سید جعفر حسین اور پیپلزپارٹی کی طرف سے ارشاد حسین امیدوار تھے، ان تین امیدواروں کے درمیان ہی اصل مقابلہ کی توقع کی جا رہی تھی۔ انتخابی مہم جوں جوں آگے بڑھتی گئی، مولانا مزمل حسین کی پوزیشن مضبوط سے مضبوط تر ہوتی گئی۔ پولنگ کے روز مولانا مزمل حسین نے اپنے مدمقابل مضبوط امیدواروں کو اپ سیٹ شکست دیتے ہوئے بھاری اکثریت سے کامیابی حاصل کی۔ ایم ڈبلیو ایم کے نامزد امیدوار نے ریکارڈ ساز 34 ہزار سے زائد ووٹ حاصل کئے، جبکہ ان کے مدمقابل تمام امیدوار ملاکر بھی اتنی تعداد میں ووٹ حاصل کرنے میں ناکام رہے۔ ایم ڈبلیو ایم کی پاراچنار جیسے اہم علاقہ میں اتنی بھاری لیڈ کیساتھ کامیابی نے ایک طویل عرصہ بعد علاقہ میں مذہبی و سیاسی حیثیت سے اپنا کردار ادا کرنے کی ایک روایت کو تقویت بخشی۔
واضح رہے کہ پاراچنار میں دہشتگردی، امن و امان اور زمینوں کے مسائل کیساتھ ساتھ ایک اہم مسئلہ داخلی سطح پر سادات و غیر سادات کے حوالے سے رہا ہے، تاہم علاقہ کے بزرگ و ذمہ دار علمائے کرام، مذہبی شخصیات اور عمائدین کی کوششوں سے کافی حد تک اس فتنے کا سر کچلا جا چکا تھا، تاہم مولانا مزمل حسین کی فتح نے اس ’’تعصب کے تابوت‘‘ میں آخری کیل بھی ٹھونک دی۔ مولانا مزمل حسین ایک غیر سادات مذہبی گھرانے سے تعلق رکھتے ہیں، تاہم ان کو سادات قبائل نے دل کھول کر ووٹ دیکر دشمن کی اس داخلی تفریق کی کوشش کو ہمیشہ کیلئے دفن کر دیا۔ اس کے علاوہ مولانا مزمل کی کامیابی ملک گیر شیعہ جماعت (مجلس وحدت مسلمین) پر علاقہ کے عوام کا اعتماد اس جانب واضح اشارہ ہے کہ اگر مذہبی جماعتیں واضح ویژن، مضبوط امیدوار اور اپنی ملی خدمات کے عوض سیاسی میدان میں اتریں تو انہیں بھی کامیابی مل سکتی ہے۔
پاراچنار میں میئر اپر کرم کی نشست پر کامیابی خود مجلس وحدت مسلمین کیلئے ایک ٹیسٹ کیس کی حیثیت رکھتی ہے، اب علاقہ کی ترقی اور عوامی مسائل کے حوالے سے ایم ڈبلیو ایم کو ثابت کرنا ہوگا کہ مذہبی، سیاسی جماعتیں بھی سیاسی میدان میں اپنا وہی رول ادا کرسکتی ہیں، جو ویژن اور خط شہید قائد ملت جعفریہ پاکستان علامہ سید عارف حسین الحسینی (رہ) نے 80ء کی دہائی میں پاکستان کی ملت جعفریہ کو دیا تھا۔ لہذا جس طرح سیاسی میدان میں وارد ہونے سے قبل مولانا مزمل حسین نے علاقہ کے عوام کی بے لوث خدمت کی اور ملت کے اتحاد کیلئے کردار ادا کیا، بھاری اکثریت سے میئر منتخب ہونے کے بعد عوام کی ان سے توقعات میں دوگنا اضافہ ہوگیا ہے۔ اس کردار کی کامیابی کی صورت میں ضلع کرم کے مستقبل کے سیاسی منظر نامہ میں مجلس وحدت مسلمین اپنا ایک مستقل مقام بنانے میں بھی کامیاب ہوسکتی ہے۔
وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے نواسہ رسول ﷺ حضرت امام حسن مجتبیٰ علیہ السلام کے یوم ولادت کے موقع پر محبان اہلبیت ؑ کو مبارکباد پیش کی ہے۔انہوں نے کہا کہ امام برحق کا حکیمانہ طرز زندگی رہتی دنیا تک ہمارے لیے مشعل راہ ہے۔آپ اپنے دور میں حق و صداقت کے سب سے بڑے علمبردار تھے۔امام حسن علیہ السلام نے ا پنے عمل سے یہ ثابت کیا کہ ظاہری جاہ و منصب سے تو دستبردار ی اختیار کی جا سکتی ہے لیکن راہ حق سے ایک لمحے کے لیے بھی غافل نہیں ہوا جا سکتا۔امام حسن علیہ السلام نے سیاسی تدبر اور حکمت عملی سے اپنے محبین کو ان کی جانوں اور ناموس کا تحفظ فراہم کیا۔امام ع کی سیرت سے ہمیں یہ درس ملتا ہے کہ اپنی قوم کی جانوں کا دفاع ہر عہدے اور ہر اختیار پر مقدم ہے۔ حکومت کے ہر تعلق ہر عہدے سے دستبردار تو ہوا جا سکتا ہے لیکن قوم کے حقوق کی پاسداری سے ایک انچ بھی پیچھے نہیں ہٹا جا سکتا۔
انہوں نے کہا کہ قوم کی اپنے رہبر کے ہمراہ میدان عمل میں موجودگی مقصد کی کامیابی کی ضمانت سمجھی جاتی ہے۔وہ قوم کبھی باوقار مقام نہیں حاصل کر سکتی جو عمل سے کترائے اور زبانی جمع خرچ سے منزل کی جستجو کرے۔اگر قوم وفا نہ کرے تو امام حسن علیہ السلام جیسے عظیم رہنما کو بھی تنہائی کا صدمہ جھیلنا پڑتا ہے اور دشمن کو اپنے مکر وفریب میں کامیابی حاصل ہوتی ہے،حق بات پر استقامت دکھانا اہل بیت اطہار علیہم السلام کا شعار ہے۔ مظلوم کی حمایت اور ظالم کی مخالفت ان ہستیوں کا ہمیں سکھایا ہوا درس ہے۔انہوں نے کہا کہ امام حسن علیہ السلام کے یوم ولادت کی مناسبت سے مجلس وحدت مسلمین کے مرکزی،صوبائی اور ضلعی دفاتر میں تقاریب کا انعقاد کیا جائے گا۔
وحدت نیوز(اسلام آباد)مادرِسماجیات بیگم بلقیس ایدھی کی وفات پر مجلس وحدت مسلمین شعبہ خواتین کی رہنماؤں اور اراکین اسمبلی نے دلی افسوس اور رنج کا اظہار کیا ہے ۔
مرکزی سیکرٹری جنرل ایم ڈبلیو ایم شعبہ خواتین و ممبر پنجاب اسمبلی محترمہ سیدہ زہرا نقوی نے اپنے تعزیتی پیغام میں کہا کہ معروف سماجی کارکن عبدالستار ایدھی مرحوم کی زوجہ بلقیس ایدھی کی وفات کا سن کر بہت افسوس ہوا بلقیس ایدھی نے پاکستانی معاشرے میں سماجی خدمات کی اعلی ترین مثال قائم کی ھے انہوں نے بے شمار یتیم بچوں کے سر پر دست شفقت رکھا اور ان کی کفالت کی اس عظیم کار خیر میں آپ ہمیشہ آپنے مرحوم شوہر کے شانہ بشانہ رہیں قوم ان کی بے لوث خدمات کو ہمیشہ یاد رکھے گی اللہ تعالی بلقیس ایدھی مرحومہ کے درجات بلند فرماے اور انکے نیک اعمال پر اجر انہیں عظیم عطا فرماے۔ آمین
دوسری جانب ممبر گلگت بلتستان اسمبلی و سیکرٹری جنرل مجلس وحدت مسلمین گلگت بلتستان شعبہ خواتین کنیز فاطمہ نے کہا کہ انسانیت کی خدمت کا روشن ستارہ بلقیس ایدھی کی وفات پر دل مغموم ہے۔ بلقیس ایدھی ایک غریب پرور خاتون تھیں ایک خاتون ہوتے ہوے اپنے شوہر ایدھی صاحب کے انسانیت کی خدمت کا مشن جاری رکھا , انہوں نے جس طرح اپنی زندگی بے کس اور نادر انسانوں کی فلاح کے لیے وقف کی وہ ہم سب کے لیے مشعل راہ ہے, انکی خدمات پر انہیں خراج تحسین پیش کرتے ہیں۔
انہوں نے مزید کہا کہ آج ہم ایک باہمت خاتون اور ایک غریب پرور ادارے سے محروم ہوگٸے,بیگم بلقیس ایدھی جنہوں نے اپنے عظیم شوہر کے شانہ بشانہ انسانیت کے لیے عظیم کام کیا بلاشبہ دونوں میاں بیوی کا وجود انسانیت کے لیے سرمایہ تھا اور ان کا ذکر انکی داستان بھی ہمیشہ انسانیت کیلئے سرمایہ رہے گی۔
وحدت نیوز(سکردو) سیکرٹری جنرل مجلس وحدت مسلمین گلگت بلتستان آغا علی رضوی نے پاکستان کے معروف سماجی رہنما بیگم بلقیس ایدھی کے انتقال پر دلی رنج و غم کا اظہار کرتے ہوئے کہا کہ بیگم بلقیس ایدھی پاکستان کی پہچان تھیں۔ مرحومہ نے اپنے مرحوم شوہر عبدالستار ایدھی کے ساتھ تمام عمر دکھی انسانیت کی خدمت کی۔
انہوں نے بیگم بلقیس ایدھی کی وفات کو ایک قومی سانحہ قرار دیتے ہوئے کہا کہ مرحومہ کی سماجی شعبہ میں خدمات کو ہمیشہ یاد رکھا جائے گا۔ بیگم بلقیس ایدھی کا نام تاریخ میں سنہرے حروف سے لکھا جائے گا۔انہوں نے مرحومہ کی مغفرت کی دعا کرتے ہوئے کہا کہ اللہ تعالی لواحقین کو صبر جمیل عطا کرے۔
ممبر گلگت بلتستان کونسل و ڈپٹی سیکرٹری جنرل مجلس وحدت مسلمین گلگت بلتستان شیخ احمد علی نوری نے اپنے ایک تعزیتی بیان میںکہا کہ ہم محترمہ بلقیس ایدھی کو انسانیت کی خدمت پر خراج تحسین پیش کرتے ہیں اور ایدھی فاونڈیشن کی خدمات سے کوئی بھی انکاری نہیں ہے اللہ تعالیٰ سے دعا ہے کہ ان کا ادارہ ہمیشہ قائم و دائم رہے اور ہم فیصل ایدھی سے انکی والدہ کے وفات پر اظہار تعزیت کرتے ہیں اور امید ظاہر کرتے ہیں کہ فیصل ایدھی انکی کمی کو محسوس ہونے نہیں دیں گے۔
منسٹر ایگریکلچر گلگت بلتستان محمد کاظم میثم نے بلقیس ایدھی کی وفات پر گہرے دکھ اور تعزیت کا اظہار کرتے ہوئے مرحومہ کی انسانیت کے خدمات پر انہیں خراج تحسین پیش کیا ہے۔صوبائی وزیر نے کہا ہے کہ مرحومہ بلقیس ایدھی نے اپنی زندگی انسانیت کی خدمت کے لیے وقف کر رکھی تھی. انکی خدمات کو ہمیشہ یاد رکھا جائے گا. اللہ تعالی مرحومہ کے درجات بلند فرمائے-آمین
وحدت نیوز(اسلام آباد) مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری نے وطن عزیز میں شیطان بزرگ امریکا کی بیجا مداخلت کے خلاف ملت پاکستان کو اپنے گھروں سے نکلنے اور صدائے احتجاج بلند کرنے کی تاکید کی ہے ۔
اپنے تازہ ٹوئٹر پیغام میں انہوں نے کہا کہ وطن عزیز کے ہر شہرمیں امریکی مداخلت کے خلاف اپنا احتجاج ریکارڈ کرانا ہر باشعور،باضمیر،
خوددار،غیرتمند اور محب وطن کا اخلاقی فریضہ ہے۔
انہوں نے مزید کہا کہ آج رات ملک بھرمیں ہونے والے احتجاج میں شرکت کرکے وقت کے دجال امریکہ پر یہ واضح کرناہوگا کہ پاکستانی قوم #امپورٹڈ_حکومت _نامنظور قرار دیتی ہے اور مداخلت کو سختی سے مسترد کرتی ہے۔
وحدت نیوز(اسلام آباد) مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری نے مادر ِ سماجیات بیگم بلقیس ایدھی کی ناگہانی وفات پر دکھ اور تعزیت کا اظہار کیا ہے ۔
ٹوئٹر پر جاری اپنے تعزیتی پیغام میں انہوںنے کہا کہ محترمہ بلقیس ایدھی کی وفات پر لواحقین سے اظہار تعزیت کرتا ہوں،انسانیت کی خدمت کے لیے بلقیس ایدھی کا کردار مشعل راہ ہے۔
انہوں نے مزید کہا کہ بے آسرا لوگوں کیلئے مرحومہ ایک مضبوط سہارا بنی رہیں،رفاعی حوالے سے ایدھی خاندان کی خدمات ناقابل فراموش ہے،مرحومہ کی مغفرت اور اہل خانہ کے صبر کے لیے دعاگو ہوں۔
وحدت نیوز(کوئٹہ) امامیہ اسٹوڈنٹس آرگنائزیشن پاکستان کوئٹہ ڈویژن کے زیراہتمام تین روزہ اعتکاف کے موقع پر نظام ولایت و امامت اور مرجعیت کے عنوان سے درسی نشست سے گفتگو کرتے ہوئے مجلس وحدت مسلمین پاکستان کے مرکزی ترجمان علامہ مقصودعلی ڈومکی نے کہا ہے کہ نظام ولایت و امامت خدائی نظام ہے جو عالم انسانیت کی دنیا و آخرت میں کامیابی کا ضامن ہے۔ نظام ولایت انسانوں کا خودساختہ نظام نہیں بلکہ اللہ تعالی کا دیا ہوا نظام ہے جس میں بشریت کے تمام مسائل کا حل ہے۔
انہوں نے کہا کہ عالمی استکباری نظام ؛ ولایت و امامت کے نظام سے خائف ہے کیونکہ انسان دشمن سامراجی نظام امریکہ کی سربراہی میں روبہ زوال ہے جبکہ نظام امامت و ولایت عالمی رخ اختیار کر چکا ہے۔ نائیجیریا یمن لبنان عراق سمیت نظام ولایت سے منسلک دنیا بھر کی انقلابی تحریکیں أیک عالمی انقلاب کی نوید سنا رہی ہیں۔ لہذا دور حاضر کو عصر ظہور کا نام دیاگیا ہے۔
انہوں نے کہا کہ پاکستان میں امریکہ مردہ باد کے جس نعرے کا آغاز قائد شہید اور ڈاکٹر محمد علی نقوی نے کیا تھا وہ آج پاکستان کے 22 کروڑ عوام کا مقبول ترین نعرہ بن چکا ہے۔ ہم وطن عزیز پاکستان کے استقلال آزادی اور خودمختاری کے علمبردار ہیں امریکہ کون ہوتا ہے ہمیں ڈکٹیٹ کرنے والا؟ اب وقت آچکا ہے کہ پاکستان میں بیرونی مداخلت خصوصا امریکہ اور امریکی غلام آل سعود کی مداخلت کا خاتمہ ہو۔
وحدت نیوز(اسلام آباد) مجلس وحدت مسلمین پاکستان شعبہ خواتین کے زیر اہتمام سنٹرل سیکرٹریٹ مجلس وحدت مسلمین پاکستان اسلام آباد میں حضرت خدیجۃ الکبریٰ سلام اللہ علیہا کے یوم وفات کی مناسبت سے ایک کانفرنس منعقد ہوئی جس میں مختلف مکاتب فکر کی خواتین اسکالرز نے شرکت کی ۔
مقررین نے حضرت خدیجہؑ کی سیرت پر روشنی ڈالی اور اظہار خیال کرتے ہوئے کہا کہ اس کائنات کی بہت سی چیزوں کو دوسری چیزوں پر فوقیت حاصل ہے‘ مثلاً جمعہ کے دن کو باقی دنوں پر ‘ماہ رمضان کو باقی گیارہ مہینوں پر اور لیلۃ القدر کو رمضان کی باقی راتوں پر۔اسی طرح اس کائنات میں بہت سے انسان ایسے ہیں جن کو تمام بنی نوعِ انسان پر مختلف خصوصیات کی بنا پر فوقیت حاصل ہے‘ مثلاً انبیاء کو غیر انبیاء پر اورپھر انبیاء کرام میں سے نبی کریم ﷺ کو باقی سب پر فوقیت حاصل ہے۔اسی طرح وہ عورتیں جو نبی کریم ﷺکے نکاح میں رہیں(چاہے کم مدت یا زیادہ مدت‘جنہیں ازواج مطہرات اور اُمہات الموٴمنین کے لقب سے یاد کیا جاتا ہے) ان کو بھی بنی نوعِ انسان کے طبقہ نسواں پر فضیلت اور برتری حاصل ہے۔ان ازواج مطہرات میں سے بھی اوّلیت اور فضیلت حضرت خدیجہ(سلام اللہ علیھا) کو حاصل ہے، جو نبی مکرم (صلی الله علیہ و آلہ و سلم)کی پہلی زوجہ اور اس اُمت کی پہلی ”ماں“تھیں۔
انہوں نے کہا کہ انسانی تاریخ میں حضرت خدیجۃ الکبریٰ طاہرہ ؓ کی طرح کی خواتین کم ہی نظر آتی ہیں، جنہوں نے خواتین کے لئے عمل کی راہیں آسان تر اور روشن تر بنائی ہیں۔ اُن کی یہ عظمت تو قابل رشک ہے ہی کہ وہ حضور نبی کریم ؐ پر پہلی ایمان لانے والی خاتون ہیں، مگر اُن کی یہ عظمت ہماری نظروں سے پوشیدہ رہتی ہے کہ انہوں نے خود اپنے لئے اُس ذات بابرکات کو تلاش کیا اور منتخب کیا۔انہوں نے عرب کی مالدار ترین خاتون ہوتے ہوئے امیر ترین رؤسائے عرب کے رشتے ٹھکرائے اور اُس دُرِّ یتیم کو جسے محبوب دو جہاں بننا تھا۔ اس وقت پہچانا جب ابھی اُن ؐ کے گوہر کو اللہ نے آشکار نہ کیاتھا۔ یہ حضرت خدیجہ کی بصیرت کی انتہا تھی اور ان کے مقدر کی خوش نصیبی کہ حضور نبی کریم نے اُن کاپیغام قبول کیا اور روئے زمین کا سب سے خوشبخت جوڑا ہونے کا اعزاز پایا۔
اس کانفرنس میں محترمہ نرگس سجاد جعفری مرکزی سیکرٹری سیاسیات ،سیدہ قندیل زہراء کاظمی مرکزی سیکرٹری زینبیہ گائیڈ،خواہران زینب، (س)، ممبر شعبہ خواتین ادارہ منہاج القرآن راولپنڈی آپا زبیدہ، محترمہ روبینا شاہ مرکزی مسئول آفس ایم ڈبلیوایم شعبہ خواتین ،محترمہ لیلی کیانی ایڈووکیٹ اسلام آباد ہائی کورٹ،محترمہ خدیجہ ناظمہ شعبہ خواتین امامیہ آرگنائزیشن پاکستان راولپنڈی ریجن،محترمہ صدیقہ کائنات ضلعی سیکرٹری جنرل ایم ڈبلیوایم اسلام آباد، محترمہ بانو ذوالفقار صاحبہ ضلعی ڈپٹی سیکرٹری جنرل مجلس وحدت مسلمین راولپنڈی نے بھی خطاب کیا ۔
وحدت نیوز(سکردو)مجلس وحدت مسلمین گلگت بلتستان کے سیکرٹری جنرل سید علی رضوی نے کہا ہے کہ ملک میں امریکی اجارہ داری ہرگز قبول نہیں، جو لوگ امریکی خوشنودی کیلئے ملک کا سودا کرنے کی کوشش کر رہے ہیں تاریخ ان کو معاف نہیں کریگی۔
ایک بیان میں ایم ڈبلیو ایم کے صوبائی سیکریٹری جنرل کا کہنا تھا کہ حد تو یہ ہے کہ ملک میں اکثریت امریکی اشاروں پر چل رہی ہے۔ ہم رہبر بت شکن حضرت امام خمینی کے حکم پر چلتے ہوئے پچھلے سال کی طرح اس سال بھی بھرپور طریقے سے یوم القدس کو منائیں گے۔ پورے پاکستان کی طرح پورے گلگت بلتستان میں بھی ریلیاں اور جلسے جلوس کا انعقاد کرینگے۔ کارکنان ابھی سے تیاری شروع کریں اور امریکہ نواز سیاستدانوں کو یہ باور کرائیں کہ امریکہ کبھی بھی ہمارا دوست نہیں ہو سکتا۔
وحدت نیوز (اسلام آباد) مجلس وحدت مسلمین پاکستان کے مرکزی ترجمان مقصودعلی ڈومکی نے بلدیاتی انتخابات کے سلسلے میں منعقدہ اجلاس سے خطاب کرتے ہوئے کہا ہے کہ بلدیاتی انتخابات جمہوریت کا حسن ہیں مگر جمہوری ادوار میں ہمیشہ بلدیاتی انتخاب تاخیر سے کرائے جاتے ہیں۔ بلدیاتی الیکشن کے حوالے سے انہوں نے عوام سے اپیل ہے کہ وہ ووٹ کو امانت سمجھ کر ایسے اھل انسان کے حوالے کریں جو شریف دیانتدار اور خدمت کا جذبہ رکھنے والا ہو۔
انہوں نے کہا کہ عوام کرپٹ نالائق اور نا اھل انسان کو ہرگز ووٹ نہ دیں چاہے وہ پیسے والا ہو۔ ایک غریب غربت کے درد کو سمجھتا ہے۔ الیکشن کمیشن انتخابات میں پئسے کے بے دریغ استعمال اور ووٹوں کی خرید و فروخت کا سدباب کرے۔ ہمیں ووٹ میرٹ پر باصلاحیت انسان کو دینا چاہیے۔
انہوں نے کہا کہ ایم ڈبلیو ایم بلدیاتی انتخابات میں حصہ لے رہی ہے کارکن ہر سطح پر صالح باکردار اور خدمت کے جذبے سے سرشار افراد کو بلدیاتی الیکشن میں سامنے لائیں۔ پاراچنار کے بلدیاتی الیکشن میں ایم ڈبلیو ایم کی بہترین کارکردگی سے کارکنوں کے حوصلے بڑھے ہیں۔
