وحدت نیوز(سکردو) سیکرٹری جنرل مجلس وحدت مسلمین گلگت بلتستان مجاھد ملت آغا سید علی رضوی کی سربراہی میں رضوی ہاؤس سکردو میں تکریم شہداء کے عنوان سے ایک پرنور پروگرام منعقد ہوا جس میں خصوصی طور پر سانحہ پشاور کے شہید علی مرتضیٰ شاد کے والد محترم حاجی زرمست خان (صوبائی رہنما مجلس وحدت مسلمین) نے شرکت کی۔

اس پرنور محفل میں ممبر گلگت بلتستان کونسل شیخ احمد علی نوری،منسٹر ایگریکلچر گلگت بلتستان محمد کاظم میثم،ممبر گلگت بلتستان اسمبلی شیخ اکبر علی رجائی،مرکزی رہنما ایم ڈبلیو ایم شیخ اعجاز حسین بہشتی،ڈپٹی سیکرٹری جنرل مجلس وحدت مسلمین گلگت بلتستان شیخ علی محمد کریمی،سیکرٹری جنرل ایم ڈبلیو ایم ضلعی سکردو شیخ فدا ذیشان،سیکرٹری جنرل ایم ڈبلیو ایم ضلع شگر شیخ اشرف شگری،صوبائی رہنما ایم ڈبلیو ایم کاچو زاھد علی خان اور دیگر ضلعی و صوبائی رہنماؤں نے شرکت کی۔

اجلاس میں شھید علی مرتضیٰ شاد اور مرکزی رہنما ایم ڈبلیو ایم شیخ اعجاز حسین بہشتی کے والدہ محترمہ اور دیگر شہداء ملت جعفریہ کی ایصال ثواب کے لئے خصوصی دعا اور فاتحہ خوانی کی۔

وحدت نیوز(اسلام آباد)مجلس وحدت مسلمین پاکستان کے مرکزی ترجمان مقصود علی ڈومکی نے کہا ہے کہ عوام بلدیاتی الیکشن میں خیمے کے نشان پر مہر لگا کر ایم ڈبلیو ایم کے امیدواروں کو کامیاب کریں۔ بلدیاتی انتخابات میں مجلس وحدت مسلمین نے مڈل کلاس سے تعلق رکھنے والے باکردار امیدوار متعارف کرائے ہیں جو انقلابی سوچ کے ساتھ خدمت کا جذبہ رکھتے ہیں۔

انہوں نے کہا کہ بلدیاتی انتخابات جمہوریت کا حسن ہیں۔ عوام میرٹ پر باکردار امیدواروں کو آگے لائیں ووٹ کو قومی امانت سمجھ کر اس کے اھل تک پہچائیں۔انہوں نے کہا کہ ملت جعفریہ وطن عزیز پاکستان میں اپنے آئینی اور شہری حقوق کے حصول کے لئے سیاسی میدان میں بھرپور کردار ادا کرے۔

چھوٹا حلقہ انتخاب اور کم لاگت و اخراجات کے باعث بلدیاتی الیکشن میں ملت ہمت و کوشش سے مناسب نمائندگی حاصل کر سکتی ہے۔ بلدیاتی الیکشن میں غیر سنجیدہ رویہ ملت کے لئے ناقابل تلافی نقصان کا باعث ہوگا۔ بلدیاتی الیکشن میں اپنے امیدواروں کو تنہا چھوڑنے کی بجائے ملت متحد ہوکر اپنے امیدواروں کو کامیاب کرے۔

وحدت نیوز(لاہور)مجلس وحدت مسلمین پنجاب کے سیکرٹری جنرل علامہ عبدالخالق اسدی نے کہا ہے کہ پاکستان کے سیاسی کلچر میں عدم برداشت کا عنصر پروان چڑھ رہا ہے اور موجودہ صورتحال میں تمام جماعتوں کے قائدین کی کلیدی ذمہ داری ہے کہ اپنے سیاسی منشور میں برداشت، رواداری، اور وضع داری کو فروغ دیں ورنہ سیاسی تصادم سے کسی کی عزت نفس محفوظ نہیں رہے گی۔

علامہ اسدی نے کہا کہ اس صورتحال میں لگتا ہے کہ سیاسی جماعتوں نے پاکستان کو جغرافیائی اعتبار سے بانٹ لیا ہے، جو سب سے زیادہ خطرناک ہے، اس سے کسی سیاسی جماعت کو اسمبلیوں میں واضع اکثریت نہیں مل سکے گی اور ہر اسمبلی اتحاد کی بناء پر چلے گی۔ علامہ اسدی نے کہا کہ ایم ڈبلیو ایم نئی نسل کیلئے قائداعظم محمد علی جناحؒ اور علامہ اقبالؒ کے فرمودات کی روشنی میں سیاسی تربیت کے مواقع پیدا کر رہی ہے، دینی اقدار کے پیش نظر صالح قیادت سامنے آ سکتی ہے، سیاست سے دین کو جدا کرنے سے ہی موجودہ صورتحال پیدا ہوئی ہے۔ انہوں نے کہا کہ سیاست میں رواداری کیلئے مذہبی قیادت کو آگے آنا ہوگا۔

وحدت نیوز(لاہور) یوم انہدام جنت البقیع کے موقع پر لاہور میں کربلا گامے شاہ سے احتجاجی ریلی نکالی گئی۔ ریلی کا اہتمام مجلس وحدت مسلمین کی جانب سے کیا گیا۔ ریلی کی قیادت ایم ڈبلیو ایم پنجاب کے ڈپٹی سیکرٹری جنرل علامہ حسن رضا ہمدانی نے کی جبکہ علامہ وقارالحسنین نقوی، علامہ حافظ کاظم رضا نقوی، علامہ صبیح حیدر شیرازی سمیت دیگر رہنماوں نے شرکت کی۔ اس موقع پر شہریوں کی بڑی تعداد ریلی میں شریک ہوئی جنہوں نے پلے کارڈز، بینرز اور پرچم اٹھا رکھے تھے۔ ریلی کے شرکاء نے جنت البقیع کے انہدام کی مذمت کرتے ہوئے آل سعود کیخلاف نعرے بازی کی۔ ریلی کے شرکاء نے سعودی حکومت سے فی الفور جنت البقیع تعمیر کرنے کا مطالبہ کیا۔

علامہ حسن رضا ہمدانی نے میڈیا سے گفتگو کرتے ہوئے کہا کہ اتنی عظیم ہستیوں کے مزاروں سے یہ ناروا سلوک کسی غیر مسلم یا کافر و مشرک حکومت نے نہیں کیا بلکہ یہ اقدام خادم حرمین شریفین کہلانے والے سعودی حکمرانوں کے ناپاک فیصلوں کے تناظر میں انجام پایا۔ انہوں نے کہا کہ اگر آلِ سعود کو عالم اسلام کا ڈر خوف نہ ہو تو رسولِ اکرمؐ کے روضہ اقدس کو بھی منہدم کرنے سے دریغ نہ کرتے۔ انہوں نے کہا کہ آلِ سعود نے نہ صرف جنت البقیع جیسے تاریخی قبرستان کو منہدم کیا ہے بلکہ مکہ مکرمہ شھر کے اندر بہت سی تاریخی اور رسولِ اکرم ؐ کی ذات گرامی سے منسوب مقدس جگہوں کو ہوٹلوں اور شاہی محلوں میں تبدیل کر دیا ہے۔

انہوں نے کہا کہ حرم الہیٰ اس وقت بلند و بالا فائیو سٹار ہوٹلوں اور آلِ سعود کے طاغوتی محلات کے سائے میں آچکا ہے۔ جس شھر سے توحید کا پیغام بلند ہوا تھا، اُس میں کئی صیہونی اور یہودی علامات کو باقاعدہ سازش کے تحت نصب کیا گیا ہے۔ یاد رہے کہ سعودی حکومت نے 1925 میں 8 شوال 1349ھ کو جنت البقیع میں دختر رسول حضرت فاطمہ زہرا سلام اللہ علیہا اور آئمہ کے مزارات کو مسمار کر دیا تھا۔ جس کیخلاف ہرسال 8 شوال کو دنیا بھر میں یوم انہدام جنت البقیع منایا جاتا ہے۔