وحدت نیوز(شکارپور)مجلس وحدت مسلمین پاکستان کے مرکزی رہنماء علامہ مقصود علی ڈومکی نے کہا ہے کہ صوبہ سندھ میں امن و امان کی بگڑتی صورتحال پر عوام کو شدید تشویش ہے۔ بدامنی کے سبب نظام زندگی مفلوج ہو چکا ہے اور تاجر مزدور کسان شہری سبھی پریشان ہیں۔ چوری ڈاکے اغوا برائے تاوان روز کا معمول بن چکا ہے۔ یہ بات انہوں نے ضلعی نائب صدر دولہا دریا خان جتوئی، تحصیل جنرل سیکرٹری سعید احمد خروس اور وحدت یوتھ ونگ کے رہنماء مستنصر مہدی کے ہمراہ گڑھی یاسین پریس کلب میں پریس کانفرنس سے خطاب کرتے ہوئے کہی۔ انہوں نے کہا کہ سندھ میں امن و امان کی صورتحال انتہائی خراب ہو چکی ہے، اور یوں لگتا ہے جیسے امن کا پرندہ یہاں سے اڑ چکا ہے۔ بڑھتی ہوئی بدامنی کے باعث شہری اور ہندو تاجر نقل مکانی پر مجبور ہو رہے ہیں۔ لوگوں کی جان و مال اور جائیداد غیر محفوظ ہو چکی ہے۔ ہر گزرتے دن کے ساتھ چوری، ڈکیتی اور گھروں میں ڈاکے بڑھتے جا رہے ہیں، جبکہ پولیس خاموش تماشائی بنی ہوئی ہے۔ ایسا محسوس ہوتا ہے کہ یہاں جنگل کا قانون نافذ ہے اور قانون نافذ کرنے والے ادارے کہیں نظر نہیں آ رہے ہیں۔

انہوں نے کہا کہ شکار پور کے ضلع صدر ایم ڈبلیو ایم اور جنرل سیکرٹری کی کاریں چوری ہوئیں۔ نائب صدر کی بھینس اور موٹر سائیکل چوری ہوئی۔ جیکب آباد کے وسطی علاقے میں، سٹی تھانے کی حدود میں، سینما روڈ پر دن دہاڑے مسلح افراد نے دکاندار عطا محمد خارانی سے ایک لاکھ روپے نقد اور موبائل فون چھین لیا اور باآسانی فرار ہو گئے۔ روزانہ درجنوں ایسے واقعات رونما ہو رہے ہیں۔ جن میں مسلح افراد باآسانی واردات کرکے نکل جاتے ہیں اور پولیس کا کوئی کردار نظر نہیں آتا۔ آخر قانون نافذ کرنے والے ادارے کب حرکت میں آئیں گے؟ یہ سمجھ سے بالاتر ہے۔ انہوں نے کہا کہ ہم حکومت سندھ، سندھ پولیس اور دیگر قانون نافذ کرنے والے اداروں کو خبردار کرتے ہیں کہ وہ اپنی پالیسی درست کریں اور شہریوں کے جان و مال کو محفوظ بنائیں۔ ہم بار بار یہ مطالبہ کر رہے ہیں کہ ڈاکو راج کے خلاف فوج اور رینجرز کا آپریشن ناگزیر ہو چکا ہے۔ شہروں میں CCTV کیمرے کا نیٹ ورک بحال کیا جائے اور پولیس کا گشت بڑھایا جائے۔ بصورت دیگر ہم شہریوں کے ساتھ مل کر احتجاج کرنے پر مجبور ہوں گے۔

وحدت نیوز(سکردو) یوم ولادت باسعادت جگر گوشہ بتول حضرت امام حسین علیہ السلام کے سلسلے میں ایم ڈبلیو ایم سیکرٹریٹ سکردو میں ایک پروقار جشن ولادت کا اہتمام کیا گیا۔ جشن کے پروگرام میں بلتستان کے معروف منقبت خوانوں نے نذرانہ عقیدت پیش کیے۔

 جشن ولادت کی تقریب میں ایم ڈبلیو ایم کے رہنماؤں کے ساتھ زندگی کے مختلف شعبوں سے تعلق رکھنے والی شخصیات اور عوام کی کثیر تعداد شریک ہوئی۔ اس موقع پر جشن ولادت حضرت امام حسین کا کیک بھی کاٹا گیا۔

وحدت نیوز(تہران) ایرانی پارلیمنٹ کی خصوصی دعوت پر اپوزیشن لیڈر گلگت بلتستان اسمبلی محمد کاظم میثم ،ممبر جی بی کونسل و پولیٹیکل سیکریٹری مجلس وحدت مسلمین گلگت بلتستان شیخ احمد علی نوری ،رکن اسمبلی سید سہیل عباس اور رکن اسمبلی وزیر محمد سلیم نے ایرانی پارلیمنٹ کے ادارہ برائے قانون سازی و تحقیق کا دورہ کیا۔ اس موقع پر ایرانی پارلیمنٹ کے ریسرچ انسٹیٹیوٹ برائے قانون سازی کے سربراہ موجود تھے۔ انہوں نے ایرانی پارلیمنٹ میں ہونے والی قانون سازی اور اس کے طریقہ کار پر مفصل بریفنگ دی۔

انہوں کہا کہ مذکورہ ادارہ پارلیمنٹ کا بنیادی اور مرکزی ادارہ ہے کسی بھی ایکٹ کو اسمبلی سے لانے سے مختلف ماہرین اس کی تکنیکی نوعیت کاجائزہ لیتا ہے۔ جائزہ لینے کے بعد اسمبلی میں قانون پیش کرنے سے قبل پائلٹ پروجیکٹ کیا جاتا ہے اور عوامی رائے بھی طلب کی جاتی ہے۔اسکے بعداسمبلی میں ٹیبل کرکے مختلف مراحل سے گزرنے کے بعد قانون کی شکل اختیار کیا جاتا ہے۔ ادارہ کے خصوصی دعوت پر آنے پر گلگت بلتستان کے پارلیمانی وفدکا خیرمقدم بھی کیا۔

اپوزیشن لیڈر اور اراکین اسمبلی نے کہا کہ ایران اور پاکستان کا ثقافتی و تاریخی ورثہ صدیوں پر محیط ہے۔ دونوں ممالک کے تعلقات کو بہتر بناکر خطے کی تعمیر و ترقی کو یقینی بنائی جاسکتی ہے۔ اپوزیشن لیڈر نے کہا کہ دونوں ممالک کے پارلیمانی تجربات و مشاہدات کی منتقلی کا آغاز مستحسن ہے۔ پارلیمنٹ کسی بھی ملک کا بنیادی ادارہ ہے جس پر عوام کا اعتماد ہوتا ہے۔ پاکستان میں پارلیمانی روایات ایران سے بھی قدیمی ہے۔ اس سلسلے میں دونوں ممالک مزید پارلیمانی تجربات کو ایکسچینج کرنے کے لیے اقدامات اٹھانے کی ضرورت ہے۔

وحدت نیوز(قم)جامعہ روحانیت گلگت بلتستان کے زیراہتمام ایک عظیم الشان محفل کا انعقاد ہوا جس میں پارلیمانی لیڈر ایم ڈبلیو ایم جی بی کاظم میثم و اپوزیشن لیڈر گلگت بلتستان اسمبلی،رکن جی بی کونسل و پولیٹیکل سیکریٹری مجلس وحدت مسلمین گلگت بلتستان شیخ احمد علی نوری ،رکن جی بی اسمبلی وزیر محمد سلیم اور رکن جی بی اسمبلی سید سہیل عباس نے بحیثیت مہمان خصوصی شرکت کی۔

 اس اجتماع میں قم میں زیرتعلیم گلگت بلتستان کے علماۓ کرام کی بڑی تعداد نے شرکت کی۔ جامعہ روحانیت نے اپوزیشن لیڈر اور دیگر رفقائے کرام کی سیاسی جدوجہد کو سراہا اور قومی سطح پر علاقائی حقوق کے لیے جاری کاوشوں کا خیرمقدم کیا۔ اپوزیشن لیڈر نے علمائے قم کی جانب سے عزت افزائی پر ان کا شکریہ ادا کیا۔

 انہوں نے اپنی گفتگو میں کہا کہ معاشرہ کی تعمیر و ترقی کے لیے ضروری ہے کہ معاشرہ علم و منطق پر قائم ہو۔ معاشرہ میں علم و حکمت حاوی نہ ہو تو اس معاشرہ کا شیرازہ بکھرنے میں دیر نہیں لگتی۔

 انہوں نے مزید کہا کہ گلگت بلتستان کی سماجیات میں علماء کے کرادار کو نظرانداز نہیں کیا جاسکتا۔ تہذیب و ثقافت کو حفظ کرنا ہو یا حقوق کی جدوجہد کرنی ہو علمائے کرام کی سرپرستی قابل تحسین رہی ہے۔ انہوں نے مزید کہا کہ ہم ایران میں پاکستان کے نمائندہ ہیں۔ ہم جزیات پر یااندرونی معاملات پہ بات نہیں کریں گے۔ ملک کی حمیت و وقار کا خیال رکھنا ہم سب کی ذمہ داری ہے۔ ہمارا ملک کسی سے بھی انسانی و قدرتی وسائل کے اعتبار سے کم نہیں ہے۔ ہم میں سے ہر کوئی نظام کی بہتری کے اپنا حصہ ڈالیں تو اسلامی ممالک کو لیڈ کرنے کی صلاحیت ہم رکھتے ہیں۔ ہم اندرونی موضوعات کو ملک سے باہر ڈسکس ہی نہیں کریں گے۔ ہماری اپنی پہچان اور اپنا مقام ہے۔

اپوزیشن لیڈر نے مزید کہا کہ گلگت بلتستان میں عوامی بیداری میں مسلسل اضافہ ہو رہا ہے۔ اس معاشرہ پر علم و حکومت کو حاوی کرنی کی ضرورت ہے۔ نوجوانوں کے شعور کو جہت دینا وقت کی سب سے بڑی ضرورت ہے۔ گلگت بلتستان کے علما نے پوری دنیا میں اپنا مقام بنایا ہوا ہے۔ علمی فکری طور پر علما کو عالمی سطح پر تسلیم کیا جاتا ہے۔ اسی طرح دیگر سماجی، اقتصادی، سیاسی اور دیگر میدانوں میں دنیا میں پہچان بنانے کی ضرورت ہے۔

اپوزیشن لیڈر نے کہا کہ قم مشہد نجف اور دیگر حوزوں میں زیرتعلیم علمائے کرام گلگت بلتستان کی تہذیب و ثقافت اور فکر و شعور کے حفاظت کے ضامن ہیں۔ علما کا سماج میں نقش سب سے بین اور واضح ہے۔