وحدت نیوز(ملتان) مجلس وحدت مسلمین اور امامیہ اسٹوڈنٹس آرگنائزیشن کی جانب سے شہید مقاومت، شہید راہ قدس سید حسن نصراللہ و شہید ہاشم صفی الدین کی تشیع نماز جنازہ کے موقع پرامام بارگاہ حسین آباد دولت گیٹ میں مجلس ترحیم کا انعقاد کیا گیا۔ اس موقع پر لائیو تشیع جنازہ دکھایا گیا۔ شہداء کے ایصال ثواب کے لیے قرآن خوانی، مجلس عزا اور شہدا سے ایفائے عہد کے لیے شمعیں روشن کی گئیں، مقررین نے کہا کہ آج یوم عہد ہے ہم فلسطین کی آزادی اور قبلہ اول بیت المقدس کی آزادی تک سکون سے نہیں بیٹھیں گے، فلسطین فلسطینیوں کا ہے، ہم ہر خیانت کا بھرپور جواب دیں گے، شہید سیدحسن نصر اللہ اور شہید سید ہاشم صفی الدین کا مقدس خون رنگ لائے گا، فلسطین اور بیت المقدس فلسطینیوں کو مل کر رہے گا، پوری دنیا سے حریت پسندوں نے شہدا کا نماز جنازہ پڑھ کر امریکہ اور اسرائیل کے تابوت میں آخری کیل ٹھونک دی ہے۔

اس موقع پر صوبائی صدر مجلس علمائے مکتب اہلبیت جنوبی پنجاب علامہ قاضی نادر حسین علوی، پرنسپل جامعة العباس علامہ ڈاکٹر غضنفر علی حیدری، علامہ غلام مصطفی انصاری، ریجنل صدر آئی ایس او پاکستان جنوبی پنجاب احتشام اظہر نے شرکا سے خطاب کیا، سید کاشف زیدی، عاصم گیلانی نے منقبت پڑھی۔ علامہ سلطان احمد شاہ، علامہ احسان رضی، یافث نوید ہاشمی، ملک اظہر کھوکر، سید وسیم زیدی، غلام حسین انصاری، ضلعی صدر ایم ڈبلیو ایم فخر نسیم، ضلعی صدر آئی ایس او علی مصدق، عرفان چاون سمیت صوبائی و ضلعی کارکنان نے شرکت کی۔ 

وحدت نیوز(بولان) مجلس علمائے مکتب اہلبیت صوبہ بلوچستان اور  مجلس وحدت مسلمین ضلع بولان کی طرف سے قائدمقاومت علامہ شہید سید حسن نصراللہ سے تجدید عہد کے لئے آج نماز مغربین کےبعد مرکزی امام بارگاہ ڈھاڈر میں مجلس عزا منعقد ہوئی۔مجلس عزاسےخطاب کرتے ہوئے مجلس علمائے مکتب اہلبیت صوبہ بلوچستان کےجنرل سیکریٹری علامہ ذوالفقارعلی سعیدی نے قائد مقاومت کو زبردست خراج تحسین پیش کیا۔ انہوں نےکہاکہ شہید حسن نصراللہ ساری زندگی امام حسین ع   کے نقش قدم پرچلتے رہے  اور امام کی طرح انہوں نے اپنی جان قربان کی اور کسی ظالم کے سامنے اپنا سر نہ جھکایا۔

وحدت نیوز(بیروت) سربراہ مجلس وحدت مسلمین پاکستان سینیٹر علامہ راجہ ناصر عباس جعفری نے بیروت میں شہدائے قدس کی تشیع جنازہ کے موقع پر اپنے پیغام میں کہا ہے کہ ‏آج کا دن امتِ مسلمہ کے لیے صبر، عزم اور تجدیدِ عہد کا دن ہے۔ آج ہم شہیدِ راہِ قدس، سید حسن نصراللہ اور شہید ہاشم صفی الدین کی تشیعِ جنازہ کے غم انگیز لمحے سے گزر رہے ہیں، آج ہم غزہ کے شہداء، بالخصوص شہید اسماعیل ہنیہ اور شہید مجاہد یحییٰ سنوار سمیت شہدائے غزہ و فلسطین و لبنان کو عقیدت و محبت کے نذرانے پیش کر رہے ہیں۔ وہ سب جو معرکۂ حق و باطل میں راہِ قدس کے شہداء میں شامل ہوئے، آج ہم ان کی عظیم قربانیوں کو یاد کرتے ہیں، ان کی راہ پر چلنے کا عہد کرتے ہیں۔‏یہ شہداء محض فرد نہیں، بلکہ ایک نظریہ، ایک پیغام، اور ایک لازوال داستان ہیں ایسی داستان جو ہمیں سکھاتی ہے کہ ظلم کے ایوانوں کو لرزانے کے لیے اسلحے سے زیادہ ایمانی قوت درکار ہوتی ہے۔ آج ہم اس مبارک سرزمین انبیاء علیھم السلام (فلسطین و لبنان)کے ان جاں نثاروں کو سلام پیش کرتے ہیں جنہوں نے اپنی قیمتی جانوں کا نذرانہ دے کر یہ ثابت کیا کہ مظلوموں کی حمایت میں ڈٹ جانے والے کبھی کمزور نہیں ہوتے۔

انہوں نے کہا کہ حزب اللہ، حماس، اور مقاومتِ اسلامی کے وہ غیور مجاہدین، جنہوں نے یمن و عراق کے میدان کارزار میں اپنی جانیں ہتھیلی پر رکھ کر غزہ و فلسطین کے مظلومین کی حمایت میں وقت کے فرعونوں کو للکارا، وہ درحقیقت امت کے ضمیر کی آواز ہیں، ‏یہ قربانیاں رائیگاں نہیں جائیں گی۔ وہ دن اب زیادہ دور نہیں جب بیت المقدس آزاد ہوگا، جب مظلوموں کی صدائیں  اور استقامت ظالموں کے تخت و تاج الٹ دیں گی، جب امریکہ اور اسرائیل جیسی غاصب طاقتوں کا نام و نشان مٹ جائے گا۔ آج ہم غزہ وفلسطین کے مجاہدین کو یہ پیغام دیتے ہیں کہ دنیا بھر کے تمام باشعور انسان آپ کے ساتھ ہیں، ‏یہ معرکہ حق اور باطل کے درمیان ہے، اور کامیابی، ان شاء اللہ، اہلِ حق کا مقدر ہے۔

وحدت نیوز (بیروت) مجلس وحدت مسلمین پاکستان کے سربراہ  حجتہ الاسلام علامہ راجہ ناصرعباس جعفری حفظہ اللہ نے قائدمقاومت شہید سید حسن نصراللہ ؒ اور نامزد سیکریٹری جنرل حزب اللہ لبنان سید ہاشم صفی الدینؒ کی تشیع جنازہ کے موقع پربیروت (لبنان) سے ملت تشیع پاکستان کے نام ایک خصوصی پیغام جاری کیا ہے۔ جس کا متن پیش خدمت ہے ۔

بسم اللہ الرحمن الرحیم

خصوصی پیغام برائے تشیعِ جنازہ شہدائے راہ قدس

قال اللہ تعالیٰ:
“وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا ۚ بَلْ أَحْيَاءٌ عِندَ رَبِّهِمْ يُرْزَقُونَ” (آل عمران: 169)

ترجمہ: “اور جو لوگ اللہ کی راہ میں قتل کیے گئے ہیں، انہیں ہرگز مردہ نہ سمجھو، بلکہ وہ زندہ ہیں، اپنے رب کے پاس رزق پاتے ہیں۔”

شہداء راہِ قدس، خصوصاً شہید حسن نصراللہ اور شہید ہاشم صفی الدین کی عظیم قربانی کو خراجِ عقیدت پیش کرنے کے لیے مجلس وحدت مسلمین پاکستان کی جانب سے ملک بھر کی تمام مساجد میں خصوصی دعائیہ اجتماعات کے انعقاد کی اپیل کی جاتی ہے۔ یہ شہداء امتِ مسلمہ کے لیے فخر کا باعث ہیں، جنہوں نے مظلوموں کی حمایت اور قدس کی آزادی کے لیے اپنی جانوں کا نذرانہ پیش کیا۔

میں تمام علمائے کرام، خطباء، اور عوام سے درخواست کرتا ہوں کہ وہ ان اجتماعات میں بھرپور شرکت کریں، شہداء کے بلند درجات کے لیے دعا کریں، اور عہد کریں کہ ان کے مقدس مشن کو جاری رکھیں گے۔

اللّٰہ تعالیٰ شہدائے اسلام کو اعلیٰ مقام عطا فرمائے اور ہمیں ان کے نقشِ قدم پر چلنے کی توفیق دے۔الٰہی آمین