وحدت نیوز (لاہور) پاکستان عوامی تحریک یوتھ ونگ کے زیر اہتمام نیشنل یوتھ الائنس کے حوالے سے آل پارٹیز یوتھ ونگ کا اجلاس منہاج القرآن کے مرکزی آفس لاہور میں منعقد کیا گیا جس میں تمام سیاسی اور مذہبی جماعتوں کے یوتھ ونگ کے نمائندگان نے شرکت کی. اجلاس میں وحدت یوتھ ونگ لاہور کے وفد نے سیکرٹری یوتھ لاہور سید سجاد نقوی کی قیادت میں مجلس وحدت مسلمین یوتھ ونگ کی نمائندگی کی. اجلاس کا مقصد جوانوں کے مسائل کو عوامی سطح پر حل کرنے کے لیے ایک خود مختار پلیٹ فارم مہیا کرنا تھا تاکہ نیشنل یوتھ الائنس کے ذریعے طلباء اور جوانوں کو ایک ایسا فورم مہیا کیا جائے جہاں وہ قومی مفادات میں جوانوں کی نیشنل سطح پر نمائندگی کر سکیں. اجلاس میں سیکرٹری وحدت یوتھ لاہور سید سجاد نقوی نے جوانوں کے مسائل اور ان کے بہتر حل کے حوالے سے گفتگو کی. سید سجاد نقوی کا کہنا تھا کہ جوانوں کے لیے بہتر تعلیمی پالیسی مرتب کی جانی چاہیے تاکہ مستقبل کا جوان سیرت حضرت علی اکبر علیہ السلام پسر حضرت امام حسین علیہ السلام پر عمل کرتے ہوئے میدان عمل میں رہے اور قومی مفادات میں اپنی جان مال اور وقت دینے کے لیے ہمیشہ تیار رہے. سجاد نقوی نے کہا کہ نیشل یوتھ الائنس کا قیام  خوش آئیند ہے اور وحدت یوتھ لاہور اپنے بزرگان کی ہدایات پر عمل کرتے ہوئے ہمیشہ اس الائنس کے نیک مقاصد کے حصول کے لیے صف اول میں دکھائی دے گی۔

وحدت نیوز (اسکردو) مجلس وحدت مسلمین شعبہ تربیت کے مرکزی سیکریٹری علامہ اعجاز حسین بہشتی کا جامع مسجد کچورا سکردو میں خطاب کرتے ہوئے کہنا تھا کہ سکردو میں مشکوک سرگرمیاں باعث تشویش ہے لہذا انتظامیہ یہاں کی پرامن فضا کو مدنظر رکھتے ہوئے سیکورٹی کی صورت حال کو بہتر بنائیں خصوصا باہر سے آنے والے افراد پر کڑی نظر رکھیں جو یہاں تبلیغات، کاروبار و سیر و تفریح کے نام پر آتے ہیں اور بلتستان کے امن امان و ثقافت کو تباہ کرنا چاہتے ہیں۔ چوں سی پیک معاہدہ کے بعد دشمنوں کو گلگت بلتستان کی پرامن فضا ہضم نہیں ہو رہی ہے ہم کسی کو اجازت نہیں دیں گے کی وہ یہاں کے امن و امان کو خراب کریں لیکن حکومت سے بھی کہنا چاہتے ہیں کی وہ جی بی کے آئینی و قانونی حقوق کو غصب نہ کریں اور ملک دشمن عناصر کو موقع نہیں دیں کی وہ یہاں انتشار پھیلائیں ۔آئینی و صوبائی حقوق ہمارا حق ہے جس کو دینے میں جتنی دیر کرینگے اتنی ہی مشکلات جنم لے سکتے ہیں۔ ملکی حالات پر گفتگو کرتے ہوئے علامہ اعجاز حسین بہشتی  کا کہنا تھا کہ حکومت و دیگر زمہ دار ادارے بے گناہ  لاپتہ نوجوانوں کو جلد از جلد رہا کریں اور ہمیں بتایا جائے کہ ان کو کس جرم میں اور کس قانون کے تحت گھروں سے لاپتہ کیا گیا ہے ۔  میں سلام پیش کرتا ہوں مجاہد عالم دین علامہ حسن ظفر نقوی، علامہ احمد اقبال اور دیگر علماء و بزرگان کا جنہوں نے بےگناہ شیعہ لاپتہ جوانوں کی رہائی کے لئے رضاکارانہ طور پر گرفتاریاں پیش کی اور جیل بھرو تحریک کا آغاز کیا ہے۔

وحدت نیوز(لاہور) مجلس وحدت مسلمین پاکستان کے مرکزی ڈپٹی سیکریٹری جنرل سید ناصرعباس شیرازی کی جانب سے مسلم لیگ ن کے متعصب صوبائی وزیر قانون پنجاب راناثناءاللہ کی عدلیہ کی فرقہ وارانہ تقسیم کی کوشش کے تناظر میں اسمبلی رکنیت سے نااہلی کیلئے انٹرا کورٹ اپیل دائر کردی گئی ہے، بروز پیر اپیل کی پہلی سماعت ہائی کورٹ کے ججز کا دو رکنی بنچ کرے گا، تفصیلات کے مطابق چند ہفتے قبل ایم ڈبلیوایم کے مرکزی رہنما ناصرشیرازی کی جانب سے راناثناء اللہ کی نااہلی کیلئے پٹیشن  عدالت میں دائر کی گئی تھی جسے فاضل جج شاہد کریم نے پہلی سماعت کے ایک ہفتے کے وقفے کے بعد یہ اعتراض لگاکر خارج کردیا تھا کہ فریق کی جانب سے تحریری بیان عدالت میں پیش کیا گیا جب کے کوئی ویڈیو ثبوت پیش نہیں کیا گیا،محض ایک اخباری بیان کی بنیاد پر کیسے ایک رکن اسمبلی کی رکنیت کو خارج کرکے اسے نااہل قرا ردیا جاسکتا ہے ۔

ناصرشیرازی نے وحدت نیوزسے ٹیلیفونک گفتگو کرتے ہوئے کہا کہ ایک رکنی بنچ کے فیصلے کے خلاف ہم نے فوری طور پر انٹرا کورٹ میں اپیل دائر کی تھی جس کے نتیجے میں اب معززججز پر مشتمل دو رکنی بنچ کیس کی سماعت کرے گا اور ان ججز کا فیصلہ ہائی کورٹ کی جانب سے حتمی فیصلہ قرار دیا جائے گا، انہوں نے کہا کہ انٹراکورٹ اپیل اس لحاظ سے بھی بڑی اہمیت کی حامل ہے کے اس میں  پچھلے جج کو بھی فریق بنایا جاتا ہے کہ اس کا فیصلہ غلط تھا،ہم نے پہلے جج کے اعتراض کو مد نظر رکھتے ہوئے رانا ثناء اللہ کے خلاف ویڈیو ثبوت بھی اپیل کے ساتھ عدالت کو فراہم کردیئے ہیں اور فاضل عدالت سے درخواست کی ہے کہ سماعت کے دوران کمرہ عدالت میں پروجیکٹر کا انتظام کیا جائے تا کہ ثابت کیا جا سکے کے کیسے راناثناءاللہ نے عدلیہ اور معزز جج صاحبان کو فرقہ وارانہ بنیادوں پر تقسیم کرنے کی کوشش ہے۔

وحدت نیوز(لاہور) مجلس وحدت مسلمین پاکستان کے مرکزی سیکرٹری جنرل علامہ راجہ ناصرعباس جعفری نے لاہور میں عالمی حسینی کانفرنس بعنوان "تکفیریت اور پاکستان کو درپیش چیلنجز" سے خطاب کرتے ہوئے کہا کہ شیعہ سنی فطری اتحادی ہیں، قائداعظم اور علامہ اقبال کی سوچ کو فروغ دیا جائے۔ انہوں نے کہا کہ اتحاد امت ہی تمام مسائل اور پریشانیوں کا حل ہے۔ علامہ راجہ ناصر عباس نے مزید کہا کہ دہشتگردی میں بیرونی قوتیں ملوث ہیں، جنہوں نے مقامی شرپسندوں کو اپنا ایجنٹ بنا کر استعمال کیا اور کافر کافر کے نعرے لگوا کر پاکستان کی سالمیت کو نقصان پہنچانے کی سازش کی، لیکن سلام پیش کرتے ہیں ملت تشیع پاکستان کو جس نے ہزاروں جنازے اٹھائے، لیکن پاکستان کیخلاف ایک لفظ تک نہیں کہا، نہ ہی ملکی اداروں پر حملے کئے۔ انہوں نے کہا کہ پاکستان میں دہشتگردی میں صرف ایک گروہ ملوث ہے، اسی فکر کے لوگوں نے ہر دور میں اسلام کو نقصان پہنچایا ہے اور یہی لوگ اسلام کے مخالف بھی تھے۔

 انہوں نے کہا کہ پاکستان کے تمام شیعہ اور سنی متحد ہیں اور ان کے اتحاد سے ہی تکفیری آج تنہا ہوچکے ہیں۔ انہوں نے کہا کہ جی ایچ کیو سے لے کر اے پی ایس پر حملے تک، ایک ہی گروہ کے لوگ ملوث ہیں، آج تک کوئی شیعہ فوج یا اداروں پر حملوں میں نہیں پکڑا گیا۔ اس کے باوجود شیعہ نوجوان لاپتہ ہیں، جن کے بارے میں کسی کو کوئی علم نہیں۔ انہوں نے کہا کہ ہم مطالبہ کرتے ہیں کہ لاپتہ شیعہ افراد کو فوری بازیاب کرایا جائے اور اگر ان کیخلاف کوئی کیسز ہیں تو عدالتوں میں چلائیں جائیں، ہم مجرموں کی حمایت نہیں کریں گے، لیکن بے گناہ نوجوانوں کا لاپتہ ہو جانا ہمارے سکیورٹی اداروں کی کارکردگی پر بہت بڑا سوالیہ نشان ہے۔

علامہ راجہ ناصر عباس نے کہا کہ پاکستان شیعہ اور سنیوں نے مل کر بنایا تھا اور اس کی حفاظت بھی وہی کریں گے۔ انہوں نے کہا کہ دہشت گرد گروہ کو کچھ اداروں نے ماضی میں استعمال کیا، لیکن آج وہی دہشتگرد پاکستان کی سالمیت کے درپے ہوچکے ہیں، جن کا تدارک نہ کیا گیا تو حالات مزید خراب ہو جائیں گے۔ انہوں نے کہا کہ دہشت گردوں کے سہولت کار حکومتوں کی صفوں میں موجود ہیں، جن کیخلاف سخت کارروائی کرنا ہوگی، حکومتی صفوں میں بھی آپریشن ردالفساد کرنے کی ضرورت ہے۔ علامہ راجہ ناصر عباس نے کہا کہ دہشت گردی ابھی ختم نہیں ہوئی، کوئٹہ میں ہزارہ برادری کو ٹارگٹ کیا جا رہا ہے، لیکن حکومت اور سکیورٹی ادارے خاموش تماشائی بنے ہوئے ہیں، اب مزید خبریں آ رہی ہیں کہ داعش نے پاکستان کا رخ کر لیا ہے، لیکن ہمارے ادارے آنکھیں موندے بیٹھے ہیں، پاکستان کا ایٹمی پروگرام بھی خطرے میں ہے، اس پر سرجیکل اسٹرائیک کرنے اور اس پر قبضے کی باتیں ہو رہی ہیں، امریکہ نے اگر پاکستان کے ایٹمی پروگرام کی جانب میلی آنکھ سے دیکھا تو اسے دن میں تارے دکھا دیں گے۔ انہوں نے کہا کہ پاکستان کا ایٹمی پروگرام محفوظ ہاتھوں میں ہے، اگر امریکی کمانڈوز پاکستان کی زمین پر اترے تو ان کی لاشیں ہی جائیں گی۔