وحدت نیوز(جامشورو) مجلس وحدت مسلمین صوبہ سندھ کی شوریٰ کا سہہ ماہی دوروزہ  اجلاس مرکز تحقیقات وتبلیغات اسلامی جامشورو میں صوبائی سیکریٹری جنرل علامہ مقصودعلی ڈومکی کی زیر صدارت منعقد ہوا، جس میں اراکین صوبائی کابینہ سمیت تمام اضلاع کے سیکریٹری جنرل اور ڈپٹی سیکریٹری جنرلز صاحبان نے شرکت کی ، اجلاس کےدوسرے روز صوبائی پولیٹیکل کونسل کا اجلاس بھی منعقد کیا گیا جس میں خصوصی شرکت مرکزی سیکریٹری امور سیاسیات سید اسد عباس نقوی نے کی، پولیٹیکل کونسل کے اجلاس سے صوبائی سیکریٹری امور سیاسیات علی حسین نقوی اور مرکزی سیکریٹری امور سیاسیات اسد عباس نقوی نے خطاب کیا، جبکہ پولیٹیکل کونسل کے خصوصی اراکین عبداللہ مطہری،سید کاظم شاہ اور ثمر زیدی بھی موجود تھے،مرکزی سیکریٹری امور سیاسیات سید اسد عباس نقوی نے اپنے خطاب میں کہا کہ ایم ڈبلیوایم سندھ نے ہمیشہ سیاسی میدان میں اپنا بھر پور کردار ادا کیا ہے، جو کہ قابل ستائش ہے، امید ہے کہ ایم ڈبلیوایم صوبہ سندھ آئندہ انتخابات 2018میں بھی اپنا اہم رول پلے کرے گی، انشاءاللہ ایم ڈبلیوایم آئندہ انتخابات میں ٹارگٹڈ حلقوں میں عوامی خدمت کے بل بوتے پر اپنے اہل امیدوار انتخابی میدان میں اتارے گی،   اجلاس میں جماعت کی گذشتہ تین ماہ کی کارکردگی کا جائزہ لیا گیا، جبکہ آئندہ تین ماہ کے پروگرامات کا اعلان بھی کیا گیا ، بعد ازاں علامہ مقصو دڈومکی نے اپنی کابینہ کے اراکین کے ناموں کااعلان کیا اور صوبائی شوریٰ سے ان کے ناموں کی منظوری لی جن میں ڈپٹی سیکریٹری جنرل علامہ دوست علی سعیدی، ڈپٹی سیکریٹری جنرل یعقوب حسینی ،سیکریٹری امور تنظیم سازی آغا منور جعفری، سیکریٹری تحفظ عزاداری سید علی اکبر شاہ ،سیکریٹری امورسیاسیات علی حسین نقوی، سیکریٹری تبلیغات مولانا محمد نقی  حیدری، سیکریٹری امور تعلیم آفتاب میرانی، سیکریٹری اطلاعات آصف صفوی، ڈپٹی سیکریٹری اطلاعات مختار دایو، سیکریٹری فلاح وبہبودالفت عالم کربلائی، سیکریٹری نشرواشاعت آغا ندیم جعفری ،سیکریٹری مالیات ظہیرحیدرزیدی، سیکریٹری شماریات طارق حسین بدوی اور سیکریٹری وحدت یوتھ فدا حسین سولنگی شامل ہیں ۔

وحدت نیوز(لاہور) مجلس وحدت مسلمین کے مرکزی رہنما علامہ اعجاز حسین بہشتی نے جامع مسجد قصر بتول شادمان میں 2ستمبر وزیر اعلیٰ ہاوس دھرنا کے سلسلے میں آگاہی مہم سے خطاب کرتے ہوئے کہا کہ حکمرانوں کی بے حسی اور مطالبات پر عملدرآمد نہ ہونے کے سبب ہم احتجاج پر مجبور ہیں،پنجاب کے حکمران عوامی ایشوز کو ایڈریس کرنے سے زیادہ میٹرو میٹرو کھیلنے میں مصروف ہیں،کیونکہ ان کا مقصد عوامی خدمت نہیں اپنے مفادات کا حصول ہے،لاہور کو پیرس بنانے کے دعویداروں کی قلعی دو دن کی بارش نے کھول دی ہے،انہوں نے کہا ہم ہر صورت دو ستمبر کو دھر نا دینگے اور مطالبات پر عملدرآمد تک یہ جاری رہیگا،پنجاب میں ہمارے خلاف منظم منصوبہ بندی کیساتھ کاروائیاں جاری ہیں،نیشنل ایکشن پلان پنجاب میں آل شریف کے مخالفین پر لاگو ہیں،دہشتگرد اور ان کے سہولت کار اقتدار کے مزے لوٹ رہے ہیں،علامہ اعجاز بہشتی نے کہا کہ پاکستان کے خلاف ہرزہ سرائی کرنے والے ہر سیاستدان کیخلاف کاروائی حکومت اور ریاستی اداروں پر فرض ہے،پاکستان ازل سے ہیں اور ابد تک رہے گا اور اس کے دشمن رسوا ہو کررہیں گے۔

وحدت نیوز(کوئٹہ) ایم پی اے آغا رضا نے علاقے میں تعلیمی اداروں کے قیام کیلئے مسلسل کوششوں سے پی بی 2 میں ریزیڈینشل اسکول اور یونیورسٹی کا کام شروع کیا، جو آئیندہ سالوں میں اپنی تکمیل کو پہنچ جائے گا اور تعلیم کو عام کرنے میں اہم کردار ادا کرے گا جو کہ ایک مثبت اقدام ہے مگر افسوس کی بات ہے کہ تعلیمی ادارے بنانے کے دوران بھی ایک نام نہاد اسٹوڈنٹ فیڈریشن اپنے بیانات سے قوم کی دل آزاری کر رہی ہے۔ تخریبی سوچ رکھنے والے ہمیشہ تخریبی اندازے ہی لگاتے ہیں اور اپنی بے وقوفانہ سوچ سے آگے کبھی بڑھ ہی نہیں پاتے، فاشسٹ ٹولہ اپنی انا سے آگے بڑھے اور قوم کیلئے کچھ سوچیں۔ ایک فاشسٹ ٹولہ جو خود کو قومی جماعت اور طلباء کے نمائندے سمجھتے ہیں ، مسلسل تعلیمی اداروں کے قیام کے خلاف اپنے بیانات سے اپنی تعلیم دشمنی کا مظاہرہ کر رہے ہیں۔ مجلس وحدت مسلمین کوئٹہ ڈویژن کے ترجمان محمد ھادی جعفری نے کہا ہے کہ ایک اسٹوڈنٹ فیڈریشن کا تعلیم کے خلاف بیان سمجھ سے بالا تر ہے۔ فاشسٹ ٹولہ اور نام نہاد اسٹوڈنٹ فیڈریشن قوم کو گمراہ کرنے میں مصروف نظر آ رہے ہیں اور تعلیمی اداروں کے خلاف کام کرکے قوم کو تاریکی میں رکھنا چاہتے ہیں۔ انہوں نے کہا کہ پی بی 2 کے نمائندے نے مسلسل جدوجہد کے بعد اپنے علاقے میں یونیورسٹی اور ریزیڈینشل اسکول کے پروجیکٹ کو منظور کروایا اور اسکا کام شروع ہوا مگر اب ایک نام نہاد اسٹوڈنٹ فیڈریشن ان پروجیکٹس کے خلاف کام کرنے میں مصروف ہیں۔اگر اتنا کام فاشسٹ ٹولہ قوم کی خدمت کیلئے کرتا تو آج قوم کو منہ دیکھانے کے قابل ہوتا۔ بیان میں مزید کہا گیا کہ پی بی 2 کے نمائندے ایم پی اے آغا رضا نے علاقے میں بنیادی ضروریات کو مد نظر رکھتے ہوئے اقدامات اٹھائے۔ عوام کے پانی کے مسئلے پر کام ہوا، کھیل کیلئے کام ہوا، تعلیمی اداروں کے ضروریات کیلئے فنڈز فراہم کئے گئے،طلباء میں فنڈز تقسیم کئے گئے،معیاری تعلیم کو عام کرنے کی کوششیں کی گئی اور اسکے علاوہ بے شمار اقدامات کے ذریعے قوم کی خدمت کی گئی مگر اسکے باوجود قوم دشمن اور فاشسٹ ٹولہ اپنے بیانات سے ان عناصر کی دل جوئی کر رہا ہے جو قوم کو تاریکی میں رکھنا چاہتے ہیں۔ آج فاشسٹ ٹولہ اپنے بیانات سے ہمارے دشمنوں کی زبان سے ادا ہونے والے الفاظ پیش کر رہا ہے، جو ان کے تعلیم و قوم دشمنی کی واضح دلیل ہے۔ بیان کے آخر میں کہا گیا کہ ہماری قوم تعلیم سے محبت رکھنے والی قوم ہے، ہمارے نوجوان باہنر اور محنتی ہیں ۔ ہم تعلیم کے فروغ کیلئے اپنا کام جاری رکھیں گے اور مسترد شدہ فاشسٹ ٹولے کے عزائم ناکام بنا دیں گے۔

وحدت نیوز(لاہور) مجلس وحدت مسلمین پاکستان نے تحفظ عزاداری دھرنا 2 ستمبر کے کیلئے اپنی سرگرمیاں تیز کر دی ہیں اور پنجاب حکومت کے خلاف مطابات پر عمل درآمد کے لئے دو ستمبر کو وزیر اعلی ہاوس کے سامنے دھرنا دینے کا اعلان کیا ہے اس سلسلے میں لاہور اور گردو نواح کاور ڈویژنل سطح پر عوامی رابطہ مہم کا غاز کر دیا گیا ہے ،صوبائی سیکرٹری جنرل علامہ سید مبارک علی موسوی نے نے اسلام پورہ اور کرشن نگر میں عوامی اجتماعات سے خطاب کیا اور کہا کہ دو ستمبر کا دن ملت جعفر یہ کے حقوق کے حصول کا تاریخی دن ثابت ہو گا، ہم تحفظ عزاداری کے لیئے اپنے خون کا خری قطرہ تک بہا دیں گے مگر عزاداری پر کوئی سمجھوتہ نہیں کریں گے ،پنجاب میں ہمارے خلاف غیر اعلانیہ متعصبانہ کاروائیاں جاری ہیں اور ہم اس بات سے باخبر ہیں کہ یہ ایک منظم سازش کا حصہ ہے۔

انہوں نے کہا کہ نیشنل ایکشن پلان کا رخ مظلوموں کی طرف موڑ لیا ہے جو ہم کسی بھی صورت قبول نہیں کریں گے،پیپلز کالونی اور امامیہ کالونی میں عوامی اجتماعات سے ضلعی سیکرٹری جنرل مولانا سید حسن رضا ہمدانی اور اسلام پورہ میں یوتھ کے اجلاس سے مرکزی سیکرٹری یوتھ ڈاکٹر محمد یونس حیدری نے خطاب کیا ، اور عوام نے اس عزم کا اظہار کیا کہ ہم علامہ راجہ ناصر عباس جعفری کے ہر حکم پر لبیک کہیں گے،اور عصر حاضر کے ظالموں کیخلاف میدان میں حاضر رہیں گے،مرکزی ترجمان علامہ مختار احمد امامی ضلع قصور میں عوامی رابطہ مہم پرہیںجہاں انہوں چونیاں میں عوامی اجتماع سے خطاب کیا اور زعما ملت سے ملاقاتیں کیں۔

وحدت نیوز (ڈیرہ اسماعیل خان) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے اپنے دورہ ڈی آئی خان کے آخری روز مقامی ہوٹل میں پریس کانفرنس سے خطاب کرتے ہوئے کہا ہے کہ حکومت اور ریاست کی بنیادی ذمہ داری اپنے شہریوں کو تحفظ فراہم کرنے کی ہے، جبکہ وطن عزیز میں تکفیر کے نام پر نفرتیں باںٹی جا رہی ہیں۔ شہریوں کے درمیان نفرت و نفاق کی وجہ سے ملک کو سنگین خطرات لاحق ہیں۔ ڈی آئی خان جو کہ پرامن شہر تھا، آج دہشتگردی کی آگ میں جل رہا ہے۔ اس شہر کے باسی ایک دوسرے محبت کرنے والے انتہائی پرامن لوگ تھے، مگر آج دہشت گردی نے اس شہر کی تہذیب، ثقافت، ماحول کو تباہ کرکے رکھ دیا ہے۔ آج اس شہر کے گوشے گوشے میں بے گناہوں کا خون بہایا جا رہا ہے، یہ خونریزی کرنے والا تکفیری ٹولہ ہے۔ آخر یہ تکفیری ٹولہ کیسے اتنا منظم ہوگیا ہے کہ ملک کا کوئی ادارہ اور شہری ان سے محفوظ نہیں۔

قائد وحدت کا مزید کہنا تھا کہ ڈیرہ میں چن چن کر لوگوں کو قتل کیا گیا، ضیاء الحق ملعون، فضل الحق کے دور سے ہمیں مسلسل نشانہ بنایا جا رہا ہے، مگر اس کے باوجود ہم اس ملک کے ساتھ مخلص ہیں۔ یہ ہمارا ملک ہے۔ ہمارے لئے آج پورے ملک کو ڈی آئی خان اور غزہ بنا دیا گیا ہے۔ بیس ہزار سے زائد ہمارے شہداء ہیں، لیکن اس کے باوجود وطن کے ساتھ ہمارے اخلاص میں کوئی فرق نہیں آیا۔ ایک طرف ہمیں تکفیری ٹولہ قتل کرتا ہے، جبکہ دوسری جانب ریاستی اداروں نے ہمارے نوجوانوں کو اغواء کیا ہوا ہے۔ علامہ راجہ ناصر نے کہا کہ مسنگ پرسنز کا معاملہ انتہائی نازک مسئلہ ہے، ہم انہیں نہیں بھول سکتے۔ ریاستی اداروں کے پاس ہمارے افراد اگر زندہ ہیں تو انہیں عدالتوں میں پیش کیا جائے، اگر انہیں شہید کر دیا گیا ہے تو ان کی میتیں ہمارے حوالے کی جائیں۔ انہوں نے سوال کیا کہ آخر اس ظلم کی کیا حد ہے، جیلوں میں ہمارے لوگ محفوظ نہیں ہیں، حکومتی سرپرستی میں جیل کے اندر انہیں ذبح کیا جاتا ہے، ریاستی اداروں کی قید میں افراد کی لاشیں دریا کے کنارے سے ملتی ہیں۔

علامہ راجہ ناصر عباس جعفری نے دوٹوک الفاظ میں حکومت سے مطالبہ کیا کہ ہمارے مسنگ پرسنز ظاہر کئے جائیں۔ آن دی ریکارڈ ہے کہ جیل پر حملے سے ایک ہفتہ پہلے خاص شخصیت نے جیل کا دورہ کیا تھا۔ رپورٹس میں جن لوگوں کو ذمہ دار قرار دیا گیا ہے، ان کے خلاف تادیبی کارروائی کی جائے۔ انہوں نے یہ بھی انکشاف کیا کہ جیل حملے کی ذمہ دار شخصیات کو مزید حساس عہدوں پر تعینات کر دیا گیا ہے، جو کہ باعث تشویش ہے۔ ایم ڈبلیو ایم کے مرکزی سیکرٹری جنرل نے خیبر پختونخوا حکومت اور چیئرمین پی ٹی آئی کو مخاطب کرکے کہا کہ بلوچستان میں ہونے والے خودکش حملے میں وکلاء کے جانی نقصان پر آپ کو تشویش بھی ہے اور ان کے خانوادوں کا درد بھی محسوس کرتے ہیں، کیا ڈی آئی خان میں شہید ہونے والے وکلاء پاکستانی شہری نہیں تھے کہ ان کیلئے نہ ہی عمران خان آپ آئے اور نہ ہی وزیراعلٰی نے آنے کی ضرورت محسوس کی۔ ان کا کہنا تھا کہ حکمران احساس سے عاری ہوچکے ہیں، شہیدوں کا، مظلوموں کا درد محسوس کرنا چاہیئے نہ کہ سیاسی پوائنٹ سکورنگ کا ذریعہ بنانا چاہیئے۔ راجہ ناصر نے مزید کہا ہے کہ آج کا پاکستان قائداعظم کا پاکستان کم اور تکفیری ٹولے کا پاکستان زیادہ ہے۔ قائداعظم کے پاکستان میں 25 فیصد اقلیتیں تھیں، آج پانچ فیصد ہیں۔ قائداعظم کی کابینہ میں تمام مکاتب و مذاہب کے لوگ شامل تھے، آج کیا صورت حال ہے۔ انہوں نے کہا ہے کہ نیشنل ایکشن پلان ایک مذاق بن کر رہ گیا ہے، صرف کراچی میں اس کا وجود نظر آتا ہے مگر وہاں بھی تکفیری ٹولہ آزاد ہے۔

قائد وحدت نے صحافیوں سے گفتگو کرتے ہوئے کہا کہ عزاداری پر کسی بھی قسم کی قدغن ناقابل قبول ہے۔ عزاداری کو محدود کرنے میں دہشت گرد ناکام و نامراد ہوئے ہیں۔ عزاداری کے خلاف جو کام دہشت گرد نہیں کرسکے، وہی کام ریاستی ادارے کر رہے ہیں۔ نیشنل ایکشن پلان کے نام پر عزاداری کی راہ میں ایسی رکاوٹیں کھڑی کی جا رہی ہیں، جو غیر اسلامی ممالک میں بھی نہیں ہیں۔ علامہ راجا ناصر نے صحافیوں سے سوال کیا کہ کیا مجالس اور سٹیج حسینی (ع) سے کبھی دہشتگردوں یا طالبان کی حمایت کی گئی تھی، جو مجالس پر ایف آئی آرز درج کی گئی ہیں۔؟ انہوں نے مزید کہا کہ بریلویوں اور شیعہ کو دباؤ میں رکھ کر دہشت گرد ٹولے کو آزاد چھوڑا گیا۔ جس کے نتیجے میں آج کوئی ملک میں کوئی شے، کوئی ادارہ محفوظ نہیں۔ علامہ راجہ ناصر عباس کا مزید کہنا تھا کہ افغانستان کی جنگ امریکہ اور آل سعود کا ایجنڈا تھا۔ ریاستی اداروں کی طرف سے مخصوص سوچ رکھنے والوں کو مجاہد بنایا گیا، جن کو اب انڈیا نے خرید لیا ہے اور وہ اب مادر وطن کی سلامتی کے لئے خطرہ بن چکے ہیں۔

انھوں نے کہا کہ نیشنل ایکشن پلان مذاق بن چکا ہے، کراچی کے علاوہ کہیں بھی آپریشن نہیں کیا جا رہا، نیشنل ایکشن پلان کے مطابق پانچ شعبوں میں کام کرنا تھا، جن میں عسکری شعبہ، سیاسی، سوشل، معاشی اور نظریاتی شعبہ تھا، لیکن نیشنل ایکشن پلان کو دہشت گردوں کے بجائے مظلوم طبقہ کے خلاف استعمال کیا جا رہا ہے۔ عزاداری کو محدود کرنے کے لئے کئی سالوں سے دہشت گرد کوششیں کرتے رہے لیکن ناکام رہے، اب ریاستی اداروں کی طرف سے عزاداری کو محدود کرنے کی کوششوں کی مذمت کرتے ہیں اور یہ کسی صورت نہیں ہوسکتا۔ انھوں نے کہا کہ ہم پاکستان کے غیرت مند اور با وفا بیٹے ہیں. بیس ہزار سے زائد شہادتیں دینے کے باوجود ہم نے کبھی بھی ریاست کے خلاف بات تک نہ کی، لیکن ریاستی اداروں کے غلط فیصلوں کے خلاف بات کرتے رہیں گے۔ انھوں نے کہا کہ ایک طرف دہشت گرد ہمیں بسوں سے اتار اتار کر مار رہے ہیں اور بم دھماکے و ٹارگٹ کلنگ کا ذریعے نسل کشی کر رہے ہیں جبکہ دوسری طرف ریاستی اداروں کی طرف سے بھی ہم پر ظلم ڈھائے جا رہے ہیں۔ ڈیرہ اسماعیل خان کے کئی نوجوانوں کو گرفتار کیا گیا جن میں کئی کی لاشیں مختلف مقامات پر پھینکی گئی، جو ڈرل سے ظلم کی گئی تھی، جبکہ کئی نوجوان اب گذشتہ کئی سال سے غائب ہیں. مسنگ پرسنز کے معاملے پر کسی صورت خاموش نہیں بیٹھیں گے۔ گرفتار افراد اگر کسی جرم میں ملوث ہیں تو عدالت میں پیش کرکے مقدمات چلائے جائیں اور زندہ یا مردہ جو بھی صورتحال ہے، ہمیں مسنگ پرسنز دیت جائیں، بصورت دیگر اس معاملے کو پورے پاکستان میں اٹھائیں گے۔ انھوں نے کہا کہ پولیس میں دہشت گردی میں ملوث افراد کو بھرتی کیا گیا، بدلتے حالات کے مطابق پولیس کو مضبوط کرنے کی ضرورت ہے۔

انھوں نے کہا کہ مجلس وحدت مسلمین پاکستان میں ڈکٹیٹر شپ کے حق میں نہیں۔ آئین کے مطابق جمہوریت کے حق میں ہیں۔ الطاف حسین کے حوالے سے پوچھے گئے سوال کے جواب میں انھوں نے کہا کہ کوئی بھی غیرت مند بیٹا ماں دھرتی کو گالی نہیں دے سکتا۔ اہل تشیع کے بیس ہزار سے زائد افراد کو شہید کیا گیا، لیکن اہل تشیع نے ملک اور ریاست کے خلاف ایک لفظ تک نہ بولا اور اگر لاکھوں بھی شہید ہو جائیں، تب بھی وطن عزیز کے خلاف نہیں ہوسکتے، کیونکہ پاکستان ہمارا وطن ہے جو ہمارے آباؤ اجداد کی بے پناہ قربانیوں کے بعد حاصل ہوا، لیکن اب قائد اعظم و علامہ اقبال کا پاکستان گم ہوچکا ہے۔ ہم قائد اعظم کے پاکستان چایتے ہیں، جس میں تمام مسلمان و اقلیتوں کو حقوق ملیں۔ ایم ڈبلیو ایم کے سربراہ نے کہا کہ پاکستان کو باہر سے نہیں اندر سے خطرہ ہے، بیرونی خطرے کا مقابلہ ایٹم بم سے کیا جاسکتا ہے، مگر اندرونی خطرے کا مقابلہ ایٹم بم بھی نہیں کرسکتا۔ روس کو باہر سے ایٹم بم کے ذریعے نہیں توڑا گیا، بلکہ وہ اندر سے ٹوٹا۔ آج پاکستان کو اندرونی خطرات کا سامنا ہے۔ تکفیری ٹولوں کے نظم و نسق اور تربیت کا پارلیمنٹ سے کوئی بل منظور نہیں ہوا تھا۔ کشمیر کے نام پر تکفیری ٹولے کو نوازا گیا اور طاقت کا توازن خراب کیا گیا، آج وہی عدم توازن ایک سنگین مسئلہ ہے۔ ریاست یا ریاستی اداروں کو خطرہ باہر سے نہیں بلکہ اسی ٹولے سے ہے، جس کو انہوں نے خود پالا پوسا۔

انہوں نے مزید کہا کہ ہمیں احتجاج کرنے سے روکا جاتا ہے، احتجاج پر ایف آئی آرز چاک کی جاتی ہیں، جبکہ احتجاج نہ کرنے کا نتیجہ ہے کہ بے گناہوں کی لاشیں کوئی اٹھانے کو تیار نہیں۔ شہید رضی الحسن ایڈووکیٹ کی میت سربازار پڑی رہی، کوئی اٹھانے کو تیار نہیں تھا۔ ان کا کہنا تھا احتجاج ریاستی اداروں، پولیس کی حمایت ہے۔ میڈیا کے نمائندوں کے سوالات کا جواب دیتے ہوئے علامہ راجہ ناصر کا کہنا تھا کہ 2 ستمبر کو ہم پنجاب اسمبلی کے سامنے دھرنا دیں گے۔ ریاست سے غلطی ہوئی ہے کہ اس نے ایک مخصوص ٹولے کو وسائل اور تربیت دیکر طاقتور کیا اور آج وہی ہمارا دشمن بنا ہوا ہے۔ عمران خان کی جماعت نے مولانا سمیع الحق کو بھتہ دیا ہے، مولانا سمیع الحق جو کہ طالبان کا باپ ہے۔ انہوں نے یہ بھی کہا کہ پولیس کی استعداد بڑھانے کی ضرورت ہے، کیونکہ موجودہ پولیس کی تربیت دہشت گردوں سے مقابلے کے تناظر میں نہیں کی گئی۔ ریاستی اداروں میں گھسی ہوئی کالی بھیڑوں کو باہر نکالنے کی ضرورت ہے۔ ہمارے جسموں کے ٹکڑے ٹکڑے بھی کر دیئے جائیں تو بھی ہم ریاست وطن کے خلاف کبھی بھی نہیں جائیں گے۔ پولیس میں دہشتگردوں کی بھرتی کا سلسلہ ختم ہونا چاہیئے۔ شہر میں دہشتگردی کا مزید کوئی سانحہ ہوا تو حکومت اور ادارے اس کے ذمہ دار ہوں گے۔ پریس کانفرنس کے بعد صحافیوں کے اعزاز میں پرتکلف ظہرانہ دیا گیا۔

وحدت نیوز(کراچی) مجلسِ وحدت مسلمین شعبہ خواتین کراچی ضلع وسطی کی خواہران کی جانب سے،کراچی ڈویژن کی جنرل سیکرٹری خواہر ہما جعفری اور ضلع وسطی کی انچارج خواہر زرین کی سربراہی میں، ایک وفد کی صورت، شھید امجد صابری کے گھر تشریف لے جاکر ہدیہ تعزیت  پیش کیا گیا۔وفد میں ضلع وسطی کی ڈپٹی سیکرٹری جنرل خواہر نایاب، شعبہ تعلیم و تربیت کی زمہ دار خواہر ندیم زہرہ, شعبہ فلاح و بہبود کی خواہر یاسمین،شعبہ توسیع و تنظیم کی خواہر حنا شامل تھیں۔خانوادہِ شھید کی جانب سے مجلسِ وحدت مسلمین شعبہ خواتین کراچی ضلع وسطی کی خواہران کا پُر احترام استقبال کیا گیا اور شھید امجد صابری کے گھر انکی والدہ محترمہ، زوجہ، بچوں، بہن اور  خانوادہ کی دیگر خواتین سے ملاقات ہوئی۔ خانوادہِ شھید اور انتہائی غم زدہ والدہ زوجہ اور بہن سے خواہر ہما جعفری اور خواہر زرین اور خواہر ندیم زہرہ نے گفتگو کی اور ملتِ تشیع کی واحد نمائندہ جماعت کےُبطورملت کی تمام خواتین مائیں، بہنوں اور بیٹیوں کی جانب سے ملتِ پاکستان کے اس عظیم ترین غم اور ناقابلِ تلافی نقصان پر انتہائی دلی دکھ کیساتھ تعزیت پیش کی اور شدید دکھ و غم کا اظہار کیا۔ گفتگو کے دوران شھید کی زندگانی پر تفصیلی روشنی ڈالی گئ اور  انکے عظیم  خیالات و افکار پر تفصیلی تذکرہ کیا۔بلا شبہ شھید امجد صابری ملک و ملت کے لئے بہترین سرمایہ تھے جنھوں نے ہمیشہ اپنے کلام سے ملت کو آپسی محبت و رواداری کا سبق دیا۔شھید نے ہمیشہ اپنے اندازِ کلام سے اُمتِ مسلمہ کو عشقِ سرکار(ص) و آہلبیت(ع) کا طریقہ انداز سیکھایا۔اور یقیناً یہ قبولیت کا ہی انداز تھا کہ جناب امجد صابری کو اس عظیم رُتبہ شھادت سے خدا نے نوازا۔اور خانوادہ شھید کو اس عظیم آزمائش اور قربانی کے لیے منتخب کیا۔

والدہِ شھید نے انتہائی فخر سے بتایا کہ کسطرح شھید محمد(ص)و آلِ محمد(ص) کے عاشق تھے اور ہمیشہ اپنے کلام میں انکی مدح اور فضائل بیان کرکے اجرِرسالت(ص) کا حق ادا کرتے۔اور یہی عشق و الفت و محبت امجد صابری کی وجہِ شھادت بنا۔بے شک اسکی کمی ہمیشہ سوگوار کرے گی مگر مجھے فخر ہےکہ میرا بیٹا محمد(ص) و آلِ محمد(ص) کے عشق اور زکر پہ قربان ہوا۔شھید کی بہن اور زوجہ نے شھید کی اہلبیت(ع) سے عقیدت اور انکے اظہارِ عقیدت کے حوالے سے تفصیلی روشنی ڈالی۔خانوداہ شھید سے گفتگو کے دوران بار بار  شدت سے اندازہ ہو رہا تھا کہ خانوادہِ شھید محمد(ص) و آلِ محمد(ص) سے بے پناہ عقیدت و محبت رکھتے ہیں۔دورانِ گفتگو آنکھوں سے مسلسل اشک جاری رہے۔اس دوران ملتِ تشیع کے تمام شھداء کا بھی تزکرہ ہوا۔ شھید کی والدہ نے ملتِ تشیع پاکستان کو شھادت جیسے عظیم مرتبے اٹھانے والی قوم کہ کر مخاطب کیا اور اس بات کا زکر کیا کہ ملتِ تشعیو پاکستان بھی وہ قوم ہے جو مسلسل شھادتوں کے سفر سے گزر رہی ہے۔ہمارا دکھ اور مقصد و منزل بھی  ایک ہی ہے۔اور وہ ہے اتحادِ بین المسلمین اور اس مقصد کی خاطر ہم ملتِ تشیع پاکستان کے ساتھ ہمیشہ میدان میں موجود رہیں گی۔آخر میں تمام شھداء ملت اور بلخصوص شھید امجد صابری کے درجات کی بلندی کے لئے دعا اور فاتحہ خوانی کی گئی۔ خانوادہ شھید کی جانب سے اور بلخصوص والدہِ شھید کی جانب سے ملتِ تشیع کی نمائندگی کرتے ہوئے مجلسِ وحدت مسلمین شعبہ خواتین کا بےحد شکریہ ادا کیا گیا۔ اور انکی آمد کو بےحد سراہا۔ اور خانوادہِ شھید کی جانب سے  تمام خواہران کو قرآنِ پاک بطور تحفہ پیش کیا گیا۔