وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نےشہداد کوٹ پریس کلب میں تحفظ پاکستان و بیداری امت کانفرنس سے خطاب کرتے ہوئے کہا کہ ملک و قوم کے دفاع کے لیے بیدار رہنا انتہائی ضروری ہے۔اسی بیداری کا درس شاعر مشرق علامہ محمد اقبال نے اپنی شاعری کے ذریعے پوری قوم کو دیا۔سامراجی و طاغوتی طاقتوں کے خلاف امام خمینی ایک تحریک بن کر منظر عام پر آئے اورجابرشہنشاہیت کے خلاف کلمہ حق ادا کرکے حقیقی اسلام کا عملی نمونہ پیش کیا۔اسی فکر کے پیروکار آج نائجیریا سے یمن اورلبنان سے شام تک فرعونی طاقتوں کے خلاف مضبوط آواز بن کر ابھر رہے ہیں، اس موقع پر مجلس وحدت مسلمین صوبہ سندھ کے سیکریٹری جنرل علامہ مقصودڈومکی ، گلگت بلتستان کے صوبائی سیکریٹری جنرل علامہ آغاسید علی رضوی اور پریس کلب کے صدر حافظ عاشق نے بھی خطاب کیا۔

علامہ راجہ ناصرعباس جعفری نے مزید کہاکہ اس ملک کے حکمرانوں کو وطن عزیز سے زیادہ اپنے سرمائے کی فکر ہے۔غریب عوام پر ٹیکسوں کے بے تحاشہ بوجھ ڈال کر سٹیل اور شوگر کی ذاتی ملیں مضبوط کی جا رہی ہیں۔جمہوریت کے نام پر ملک میں جمہوری اقدار کا خون کیا جا رہا ہے۔حکمرانوں کا ہدف اقتدار کو اپنی اولاد کی طرف منتقل کر کے اپنی بادشاہت کو قائم رکھنا ہے۔انہوں نے کہا کہ پاکستان کی حفاظت کی ذمہ داری ریاستی اداروں اور پاک فوج کی ہے۔کسی اور عسکری قوت یا لشکر کو مسلح سرگرمیوں کی اجازت دینا قومی سلامتی کے منافی اور ملک و قوم کے لیے سنگین خطرے کا باعث بن سکتا ہے۔اس ملک کو سب سے بڑا خطرہ تکفیری قوتوں سے ہیں جنہوں نے مذہب کے نام پر قتل و غارت کا بازار گرم کر رکھا ہے۔ماضی میں اس فکر کے پیروکار قیام پاکستان کے مخالف تھے اور قائد اعظم محمد علی جناح کو برملا کافر قرار دیتے رہے۔یہود و نصاری کے ان ایجنٹوں سے چھٹکارا حاصل کر کے ارض پاک کو امن کا گہوارہ بنایا جا سکتا ہے۔انہوں نے کہا کہ مادر وطن پاکستان ہمیں اپنی زندگی سے زیادہ عزیز ہے۔کوئی بھی قوت جو وطن عزیز کے مفاد کے منافی سرگرمیوں میں مصروف ہے ہماری اس سے کھلی دشمنی ہے۔

وحدت نیوز (اسلام آباد) مجلس وحدت مسلمین پاکستان کے مرکزی ترجمان علامہ مختار امامی نے پٹرول کی قیمتوں میں اضافے پر شدید ردعمل کا اظہار کرتے ہوئے کہا ہے کہ میٹرو بس منصوبوں پر اربوں روپے کی دی جانے والی سبسڈی کی رقم پوری قوم سے وصول کی جا رہی ہے۔چند شہروں میں پرتعیش سفری سہولیات دے کر ووٹ بینک بڑھانے کی کوشش کواحمقانہ عمل کے علاوہ کوئی نام نہیں دیا جا سکتا۔ریاست کی بیس کروڑ آبادی میں چند مخصوص خاندانوں کو چھوڑ کر پورا ملک استحصال اور ریاستی جبر کی چکی میں پس رہا ہے۔بڑھتی ہوئی مہنگائی نے عام آدمی کی زندگی اجیرن کر رکھی ہے۔لوگ غربت کے ہاتھوں مجبور ہو کر خودکشیاں کر رہے ہیں۔جس ملک میں پانچ سو روپے کے عوض پندرہ سالہ بچے خودکش بمبار بننے پر محض اس لیے راضی ہو جائے کہ اس کے گھر میں بھوکے بہن بھائی دو وقت کی روٹی کھا لیں گے اس ریاست کے حکمران پوری قوم کے مجرم ہیں۔انہوں نے کہا کہ تیل کی بڑھتی ہوئی قیمتیں ہر چیز پر اثر انداز ہوتی ہیں۔اس سے مہنگائی میں مزید اضافہ ہو گا جس کی قوم متحمل نہیں ہے۔قومی سرمایہ بیرونی ممالک منتقل کرنے والے حکمران عوام کو مزید آزمائش میں مت ڈالیں۔غریب عوام کے گھر کا چولہا پہلے ہی بڑی مشکل سے جلتاہے۔انہوں نے حکومت سے مطالبہ کیاہے کہ تیل کی قیمتوں میں اضافہ کا فیصلہ فی الفور واپس لیا جائے۔

وحدت نیوز (ڈی آئی خان) سہارا سنٹر کی بندش کو فِی الفور کھولا جائے اور ضلعی حکومت ناجائز قبضہ واپس لے کر بلڈنگ سہارا سنٹر کے حوالے کرے۔ معذور افراد کے ساتھ زیادتی پر ضلعی حکومت کی بھرپور مذمت کرتے ہیں۔ ان خیالات کا اظہار خیبر پختونخوا کے صوبائی سیکرٹری ویلفیئر مجلس وحدت مسلمین تہور عباس شاہ نے اپنے ایک بیان میں کیا۔ ان کا کہنا تھا کہ ضلعی حکومت کے اس ناجائز اقدام کی سخت مذمت کرتے ہیں اور کہا کہ پچھلے 15 سال سے یہ سنٹر اس بلڈنگ میں قائم ہے اور معذور افراد کو مختلف سہولیات و سروسز مہیا کر رہا ہے، لیکن ضلعی حکومت اس کو خالی کرانے کے درپے ہے، باوجود اسکے کہ ضلعی حکومت کے پاس کئی سرکاری عمارتیں اور خالی پلاٹس موجود ہیں، جن میں وہ اپنا دفتر باآسانی بنا سکتے ہیں۔ ہم مطالبہ کرتے ہیں کہ ضلعی حکومت اس اقدام کو واپس لے اور فوراََ بلڈنگ سہارا سنٹر کے حوالے کرے، ورنہ سول سوسائٹی، سیاسی و مذہبی تنظیمیں معذور افراد کے ساتھ سڑکوں پر ہوں گی اور اپنے حق کے لئے آخری حد تک جائیں گی۔

وحدت نیوز (کوئٹہ) مجلسِ وحدت مسلمین بلوچستان کے صوبائی سکریٹری جنرل علامہ برکت علی بلوچ نے اپنے بیان میں کہا ہے کہ کرپشن اور دہشت گردی دونوں جڑواں بھائی ہیں دونوں آپس میں لازم وملزوم ہیں وطن عزیز خصوصاً صوبہ بلوچستان میں دولت کی ریل پیل اس وقت شروع ہوئی جب اسلام کے نام پر  امریکن ڈاکٹرائن جہادی کلچر کا آغاز ہوا جس سے وطن عزیز سمیت پورا خطہ دہشتگردی کی لپیٹ میں آگیا اداروں کو کرپشن زدہ کر دیا گیا تاکہ دہشت گرد دندناتے پھرتے رہیں , یونیورسٹیوں اور جامعات میں قلم کلچر کی بجائے کلاشنکوف کلچر کا آغاز ہوا. ڈالروں کی ریل پیل کے زریعے تکفیری سوچ کو پروان چڑھایا گیا تاکہ مسلمان جو قرآن کریم کے مطابق آپس میں ایک دوسرے کے بھائی ہیں ایک دوسرے کو دائرہ اسلام سے خارج قرار دے کر ایک دوسرے کے خون کے پیاسے بن جائے. پیسہ پھینک تماشہ دیکھ کے فارمولے کو استعمال کرتے ہوئے بعض خود ساختہ آلہ کاروں کے زریعے اسلامی مسالک کے درمیان نفرتیں پھیلانے کی مذموم کوششیں کی گئی اور بلوچستان میں بسنے والی برادر اقوام بلوچ , پشتون , ہزارہ , پنجابی وغیرہ کو اپنے زرخرید افراد کے زریعے آپس میں دست و گریباں کرنے کی مذموم سازشیں کی گئی ان تمام حالات میں بلوچستان کی سیاسی شخصیات , شیعہ و سنی علماء کرام لائق تحسین ہیں جنہوں نے اپنی جدوجہد اور انتھک کاوشوں کے زریعے دشمن کے ناپاک عزائم خاک میں ملا دیئے اسی طرح گزشتہ کچھ عرصے سے پاک فوج کا بیانیہ کرپشن اور دہشتگردی کا گٹھ جوڑ  ختم کر دیں گے عوام کے لئے کافی امید افزا ہے کرپشن کے خاتمے کے بغیر وطن عزیز پاکستان اور صوبہ بلوچستان میں امن و امان کا بحال ہونا ممکن نہیں ہے جو اقتصادی ترقی کی راہ میں سب سے  بڑی رکاوٹ ہے ہم حکومت اور اداروں پر زور دیتے ہیں کہ وہ ہر سطح پر کرپشن کا خاتمہ کر کے دہشتگردوں اور ان کے سہولت کاروں کا صفایا کرتے ہوئے مکمل  امن و امان قائم کریں تاکہ وطن عزیز پاکستان اور صوبہ بلوچستان ترقی اور خوشحالی کی راہ پر گامزن ہو سکے.

وحدت نیوز(سکردو) مجلس وحدت مسلمین سکردو سٹی کے مولانا فدا علی ذیشان نے اپنے پریس ریلیز میں کہا کہ نئے امریکی صدر نے اپنے حلف کے ساتھ ہی کئی مسلم ممالک کے شہریوں کی امریکہ داخلہ پر پابندی عاید کردی اور پاکستان سمیت بیشترممالک کے شہریوں پر کڑی شرائط عاید کرکے انکی بھی انٹری روکنے کی تیاری کا عندیہ دیا ہے۔ عالمی قوانین کے مطابق یہ عمل بجائے خود ان اقوام کے ساتھ تعصب اور انکی توہین ہے جو کہ کسی بھی غیرتمند ریاست کیلئے ناقابل قبول ہے۔ دنیائے اسلام کا اہم ترین ملک ہونے کے ناطے پاکستانی حکومت کی ذمہ داری ہے کہ ایسی امتیازانہ سلوک کو برداشت نہ کریں اور پتھر کا جواب اینٹ سے دینے کی روش کو فورا اپنائیں۔ پاکستان کو دیگر مسلم ممالک کیلئے بھی قابل تقلید ملک بننے کی ضرورت ہے جس کیلئے ضروری ہے کہ ہم بولڈا قدم اٹھانے میں تاخیر نہ کریں۔

 انہوں نے اپنے بیان میں کہا کہ دوسروں پر انحصار کرنے اور اپنے وسائل سے استفادہ نہ کرنے کے نتیجے میں ہم اہم ترین اسٹریٹجک خطے اور قدرتی و انسانی وسائل سے مالا مال ہوتے ہوئے بھی دیگر ممالک کے محتاج ہیں۔ ضرورت اس امر کی ہے کہ ہم دوسریے ممالک کی طرفسے سے نافذ کرنیوالی پالیسیوں پر چلنے کی بجائے غیرتمندی کا مظاہرہ کریں، اپنے وسائل سے استفادہ کریں اوراپنے اندر موجود قابل ، محنتی اور دیانتدار لوگوں کو مواقع فراہم کرکے ان پر اعتماد کریں تاکہ دنیا میں ہم ترقی یافتہ اقوام کی صف میں شریک ہوں اور ہمارا امیج ایک روشن و تابناک ملک کے طور پر ابھرجائے۔

وحدت نیوز (کراچی) مجلس وحدت مسلمین پاکستان کراچی ڈویژن کے زیر اہتمام عظیم الشان شب یاد شہداءو کانفرنس کا انعقاد 4 فروری بروز ہفتہ بعد نماز مغربین خیر العمل روڈ، انچولی سوسائٹی، ایف بی ایریا میں منعقد کیا جائے گا، جس سے مرکزی خطاب ایم ڈبلیو ایم کے سربراہ علامہ راجہ ناصر عباس جعفری خطاب کرینگے۔ وحدت ہاو س کراچی میں ایم ڈبلیو ایم کراچی ڈویژن کے سیکریٹری جنرل سید میثم عابدی کی زیر صدارت کابینہ اجلاس منعقد ہوا، اجلاس میں شب یاد شہداءو کانفرنس کے انتظامات کو حتمی شکل دیتے ہوئے انتظامی کمیٹیاں تشکیل دی گئیں۔ کانفرنس کی تفصیلات کے حوالے سے میثم عابدی نے بتایا کہ دہشتگردی کا شکار مظلوم شہدائے ملت جعفریہ کو خراج عقیدت پیش کرنے اور خانوادہ شہداءسے اظہار یکجہتی کیلئے کراچی کے علاقے انچولی سوسائٹی میں خیر العمل روڈ پر 4 فروری بروز ہفتہ بعد نماز مغربین شب یاد شہداءو کانفرنس کا انعقاد کیا جائے گا، کانفرنس سے مرکزی خطاب علامہ راجہ ناصر عباس جعفری کرینگے، جبکہ علامہ سید حسن ظفر نقوی، علامہ عباس کمیلی، علامہ مرزا یوسف حسین، علامہ احمد اقبال رضوی، علامہ نثار قلندی، علامہ فرقان حیدر عابدی و علمائے کرام و رہنما بھی خطاب کرینگے، کانفرنس میں خانوادہ شہداءبھی خصوصی طور پر شرکت کرینگے، کانفرنس کے حوالے سے شہر بھر میں تشہیری مہم مکمل ہو چکی ہے۔