وحدت نیوز(اسلام آباد) پچیس جولائی پاکستان کی تقدیر بدلنے کا دن ہے ،،عوام ووٹ ڈالنے کیلئے گھروں سے نکلیں،ایم ڈبلیو ایم وطن عزیز میں تکفیریت کے آگے سیسہ پلائی دیوار ہے ۔پاکستان کو سب سے زیادہ نقصان انتہاپسندی و تکفیریت نے پہنچایا ان خیالات کا اظہار مجلس وحدت مسلمین کے مرکزی سکرٹری سیاسیات سید اسد عباس نقوی نے انتخابی مہم کے دوران کیا۔ انہوں نے کہا کہ مجلس وحدت مسلمین پاکستان نے اپنے شروع دن سے ہی مذہبی انتہا پسند ی تکفیریت اور عسکریت پسندی کے خلاف آواز بلند کی اور اس وجہ سے ملک بھر میں ہمارے کئی کارکن دہشت گردی میں شہید کردیئے گئے ۔ ملکی سیاست اور اداروں میں موجود تکفیری سوچ کو اکھاڑ پھنکنا وقت کی اہم ضرورت ہے ۔ مجلس وحدت مسلمین ایک ملک گیر جماعت ہے جو عوامی جدوجہد پر یقین رکھتی ہے ۔ملک کی سیاسی قوتوں کے ہمراہ ملکی ترقی اور خوشحالی کی جدوجہد کے لئے کوشاں ہے۔ پاکستان میں سیاسی عمل کے تسلسل کی حمایت کرتے ہیں ۔وطن عزیز کو انجینئرڈ نظام نے پہلے بھی نقصان ہی پہنچایا پاکستان مذید کسی تجربے کا متحمل نہیں ہو سکتا۔ ہم وطن عزیز میں امن ،رواداری کا فروغ چاہتے ہیں اور اپنے منشور کے مطابق پاکستان کو قائد اعظم اور علامہ محمد اقبال کا پاکستان بنانے کے جدوجہد جاری رکھیں گے ۔
وحدت نیوز(لاہور) مجلس وحدت مسلمین پنجاب کے صوبائی سیکرٹریٹ شادمان لاہور میں پاکستان تحریک انصاف کے نامزد امیدواران برائے قومی اسمبلی حلقہ این اے 127 اور 124 سے جمشید چیمہ اور نعمان قیصر نے ایم ڈبلیو ایم کے صوبائی سیکرٹری جنرل پنجاب علامہ سید مبارک علی موسوی، مرکزی سیکرٹری سیاسیات سید اسد نقوی، سیکرٹری سیاسیات پنجاب حسن کاظمی، سیکرٹری جنرل لاہور سید حسن رضا ہمدانی، کوآرڈینیٹر پولیٹکل سیل سید حسین زیدی، نقی مہدی، سجاد نقوی اور ایم ڈبلیو ایم کی صوبائی کابینہ سے خصوصی ملاقات کی۔ ملاقات میں جمشید چیمہ اور نعمان قیصر نے ایم ڈبلیو ایم کے عہدیداران سے حلقے میں انتخابی حمایت کی درخواست کی، جبکہ ملاقات میں حلقے سے متعلق سیاسی حکمت عملی اور ڈور ٹو ڈور الیکشن کیمپین سے متعلق تفصیلی تبادلہ خیال کیا گیا۔ مجلس وحدت مسلمین کے عہدیداران نے انتخابات میں پاکستان تحریک انصاف کے امیدواروں کی بھرپور حمایت اور الیکشن کیمپین ساتھ مل کر چلانے کے عزم کا اعادہ کیا۔
اس موقع پر گفتگو کرتے ہوئے مجلس وحدت مسلمین کے صوبائی سیکرٹری جنرل پنجاب علامہ سید مبارک علی موسوی کا کہنا تھا کہ ایم ڈبلیو ایم اور پاکستان تحریک انصاف قائد اعظم اور اقبال کا پاکستان حاصل کرنے کے لئے مشترکہ اہداف رکھتے ہیں، دونوں جماعتوں کی جدوجہد ہے کہ پاکستان سے دہشتگردی اور کرپشن کا خاتمہ کیا جائے، تاکہ پاکستان کو دنیا میں عظیم ملک بنایا جائے. تقریب سے گفتگو کرتے ہوئے مرکزی سیکرٹری سیاسیات سید اسد عباس نقوی کا کہنا تھا کہ ہم قائد وحدت علامہ راجہ ناصر عباس جعفری کے حکم پر پنجاب اور سندھ میں مختلف قومی و صوبائی حلقوں پر پاکستان تحریک انصاف کے امیدواروں کی مکمل حمایت کرتے ہیں، انہوں نے کہا کہ 25 جولائی کو زیادہ سے زیادہ ووٹرز کو پولنگ اسٹیشنز تک نکال کر پاکستان میں تکفیری اور کرپٹ ذہنیت کو شکست دیں گے، دونوں جماعتوں کے رہنماؤں نے مستقبل قریب میں بھی ساتھ چلنے کا عزم کیا۔
وحدت نیوز (پاراچنار) مجلس وحدت مسلمین کے رہنماؤں نے کہا ہے کہ پاراچنار سمیت قبائلی علاقوں میں پولنگ اسٹیشنوں پر خواتین کے لئے صرف خواتین عملہ ہی تعینات کیا جائے اور عوام انتخابی عمل کے دوران بھائی چارے اور امن کا مظاہرہ کریں۔ پاراچنار میں مشترکہ پریس کانفرنس سے خطاب کرتے ہوئے مرکزی ڈپٹی سیکرٹری جنرل مجلس وحدت مسلمین ناصر شیرازی، ذوالفقار علی، آصف رضا ایڈووکیٹ، شفیق طوری اور این اے 46 سے امیدوار شبیر ساجدی نے کہا کہ ملک بھر میں قیام امن کے لئے ایم ڈبلیو ایم کی خدمات کسی سے پوشیدہ نہیں اور ہمیں توقع ہے کہ پاراچنار سمیت پاکستان کے عوام وحدت کے امیدواروں کو ترجیح دیں گے۔
رہنماؤں کا کہنا تھا کہ الیکشن کمیشن کی پالیسی کے مطابق پانچ سو ووٹرز کیلئے ایک پولنگ بوتھ رکھا گیا ہے، جبکہ این اے 46 میں ایک ہزار سے زائد ووٹرز کیلئے ایک پولنگ بوتھ قائم کیا جا رہا ہے، جس سے نہ صرف ووٹرز کا وقت ضائع ہوگا، بلکہ یہ اقدام ٹرن آؤٹ میں بھی کمی کا باعث بنے گا۔ مجلس وحدت مسلمین کے رہنماؤں کا کہنا تھا کہ پاراچنار کے قبائل انتخابی عمل کو سیاسی عمل سمجھ کر حصہ لیں، نہ کہ انتخابی عمل سے آپس کی دشمنیاں پیدا کریں۔ رہنماؤں نے کہا کہ امیدوار بھی مثبت سیاست کو فروغ دیں اور ایسے اقدامات اور تقاریر سے گریز کریں، جس سے عوام کے مابین دراڑیں پیدا ہوں۔ مجلسِ وحدت مسلمین کے رہنماؤں نے یہ بھی مطالبہ کیا کہ پولنگ اسٹیشنوں میں داخلی اور خارجی راستے الگ بنائے جائیں۔
وحدت نیوز (کراچی) مجلس وحدت مسلمین اور پاکستان تحریک انصاف کے مشترکہ امیدوار برائے صوبائی اسمبلی حلقہ پی ایس 89 ملیر علی حسین کی ایم ڈبلیوایم ضلع ملیر شعبہ خواتین سے ملاقات ہوئی، اس موقع پر مرکزی ڈپٹی سیکریٹری جنرل علامہ سید احمد اقبال رضوی،، مرکزی سیکریٹری جنرل شعبہ خواتین محترمہ زہرا نقوی، مرکزی ڈپٹی سیکریٹری جنرل شعبہ خواتین محترمہ ام البنین ،ڈویژنل سیکریٹری جنرل علامہ صادق جعفری و دیگر کی شرکت اور خطاب،ایم ڈبلیوایم کے قائدین اور نامزد امیدوار کی خواتین کارکنان اور عہدیداران سے پی ایس 89کی انتخابی حکمت عملی، فعالیت اور عوامی رابطہ مہم کے حوالے سے تفصیلی گفتگوکی خواتین کارکنان کا عزم وحوصلے کے ساتھ انتخابی مہم میں بھر پور فعالیت کا عہدکیا۔
وحدت نیوز (حیدرآباد) مجلس وحدت مسلمین کے مرکزی پولیٹیکل سیکرٹری اسد عباس نقوی نے جمعیت علمائے پاکستان کے صدر اور امیدوار NA-227 ڈاکٹر صاحبزادہ ابوالخیر محمد زبیر کے ہمراہ پریس کلب حیدرآباد میں مشترکہ پریس کانفرنس سے خطاب کرتے ہوئے کہا کہ صاحبزادہ ابو الخیر محمد زبیر نے ملک میں فرقہ واریت کو ختم کرنے اور دہشتگردوں اور ملک دشمن جماعتوں کا پورے ملک میں مقابلہ کیا ہے اور امت مسلمہ کو جوڑنے کیلئے آپ کی کوششیں لائق تحسین ہیں، آپ کے ان ہی کارناموں کی بنیاد پر مجلس وحدت مسلمین نے حلقہ NA 227 پر صاحبزادہ ابو الخیر محمد زبیر کی مکمل حمایت کا اعلان کیا ہے۔اسد عباس نقوی نے کہا کہ ہم صاحبزادہ ابو الخیر محمد زبیر کو اپنی جماعت کی طرف سے یقین دلاتا ہوں کہ یہ الیکشن صاحبزادہ ابوالخیر محمد زبیر اور JUPکا الیکشن نہیں ہے بلکہ اب مجلس وحدت المسلمین کا بھی الیکشن بن گیا ہے، ان شاء اللہ صاحبزادہ ابو الخیر محمد زبیر 25 جولائی کو ہونیوالے انتخابات میں کامیاب ہوکر پارلیمنٹ میں پہنچیں گے اور اتحاد امت کیلئے بھر پور کردار ادا کریں گے۔ انہوں نے کہا کہ ہم نے اپنی جماعت کے تمام ذمہ داران کو ہدایت کر دی ہے کہ وہ صاحبزادہ ابوالخیر محمد زبیر کی الیکشن مہم چلائیں اور ہر فورم پر ان کی کامیابی کیلئے کردار ادا کریں۔
اسد نقوی نے مزید کہا کہ ہمیں امید ہے کہ صاحبزادہ ابوالخیر محمد زبیر کامیاب ہوکر دنیا بھر میں اتحاد امت کیلئے کوششیں جاری رکھیں گے اور پاکستان کے مظلوموں کی آواز بن کر اُبھریں گے اور فرقہ واریت کے خاتمے کیلئے بھرپور کردار ادا کریں گے۔جے یو پی کے صدر ڈاکٹر صاحبزادہ ابوالخیر محمد زبیر نے کہا کہ ہم راجہ ناصر عباس کا اور مجلس وحدت مسلمین کا شکریہ ادا کرتے ہیں، انہوں نے ہماری حمایت کی ہمارا یہ اتحاد یہیں نہیں بلکہ ملی یکجہتی کونسل میں بھی ہم ساتھ کام کر رہے ہیں، سازشی عناصر جو پاکستان میں فرقہ وارانہ آگ بھڑکانے کی سازشیں کر رہے ہیں، ایک دوسرے مسالک کیخلاف زہر اگل رہے ہیں، ایک دوسرے کے قتل کے منصوبے بنا رہے ہیں، ایک دوسرے کی مساجد اور خانقاہوں اور امام بارگاہوں پر حملہ کرکے اور ایک دوسرے کو کافر کہہ کر اُمت کے اتحاد کو پارہ پارہ کرنے کی سازشیں کرتے رہے ہیں، ان سازشی عناصر کا مقابلہ کرنے کیلئے اتحاد امت کا عمل مظاہرہ کریں گے۔ انہوں نے مزید کہا کہ سیکولر عناصر مغربی ایجنڈے کو کسی صورت کامیاب نہیں ہونے دیں گے، ہم اتحاد کے ذریعے اسلام اور مسلمانوں کو لڑانے کی ہر سازش کو ناکام بنائیں گے اور امت مسلمہ میں اتحاد یگانگت اور بھائی چارے کی فضاء قائم کر کے اخوت اور بھائی چارے کو فروغ دیں گے۔
واضح رہے کہ اسدعباس نقوی نے دورہ حیدرآباد کے دوران معروف سیاسی رہنما صفدرعباسی اور ناہید خان سے بھی ان کے دفتر میں ملاقات کی، اسد عباس نقوی ، ناہید خان اور صفدر عباسی کے درمیان موجودہ ملکی سیاسی صورتحال اور قومی انتخابات کے حوالے سے تفصیلی بات چیت ہوئی، اس موقع پر ایم ڈبلیوایم کے دیگر صوبائی اور ضلعی رہنمابھی موجود تھے ۔
وحدت نیوز (پنڈی گھیپ) مجلس وحدت مسلمین کی جانب سے پنڈی گھیپ میں اتحادی جماعت پی ٹی آئی کے امیدوار برائے قومی اسمبلی میجر (ر) طاہر صادق اور امیدوار برائے صوبائی اسمبلی کرنل(ر) انور خان کی 14 دیہاتوں سے حمایت کے سلسلے میں منعقدہ تقریب میں مرکزی رہنما مجلس وحدت مسلمین برادر نثار فیضی نے خطاب کرتے ہوئے کہا کہ انشااللہ ملک بھر میں مجلس وحدت مسلمین کے کارکنان الیکشن مہم کو چیلنج کے طور پر چلائیں گے، پاکستان تحریک انصاف کے ساتھ ہمارا الائنس ملک سے دہشتگردوں ان کے سرپرستوں اور تکفیری گروہ کو شکست دینے میں معاون ثابت ہوگا۔
انہوں نے کہا کہ انشااللہ 25جولائی پاکستان اور پاکستانی عوام کی فتح کا دن ثابت ہوگا،کارنر میٹنگ میں مجلس وحدت مسلمین کے چودہ یونٹس کے کارکنان و ذمہ داران شریک ہوئے پاکستان تحریک انصاف کے امیدوار برائے قومی اسمبلی کرنل(ر)انور خان نے اپنے خطاب میں مجلس وحدت مسلمین کے قائدین کا شکریہ ادا کرتے ہوئے کہا کہ ایم ڈبلیوایم نے عملی طور پر تحریک انصاف کا ساتھ دے ثابت کیا ہے کہ یہ جماعت اور اس کے قائدین قول وفعل کے سچے ہیں انشااللہ ہمارا یہ سفر پرامن مستحکم اور شدت پسندی سے پاک پاکستان کے حصول تک جاری رہے گاپنڈی گھیپ میں مجلس وحدت مسلمین کے لوکل رہنماوں اور کارکنان کی کثیر تعداد کارنر میٹنگ میں شریک ہوئے۔
