وحدت نیوز (کوئٹہ) مجلس وحدت مسلمین پاکستان کوئٹہ ڈویژن کے مرکزی الیکشن آفس علمدار روڑ کی افتتاحی تقریب منعقد ہوئی. تقریب میں سیاسی سماجی شخصیات علاقہ عمائدین اور جوانوں کی کثیر تعداد نے شرکت کی.اس موقع پر سابق ممبر بلوچستان اسمبلی اور سابق وزیر قانون جناب سید محمد رضا (آغا رضا) نے شرکاء سے خطاب کیا ,انہوں نے خطےکی موجودہ سیاسی, اقتصادی اور معاشرتی حالات کی حساسیت ,مسائل اور راہ حل پر روشنی ڈالی, تقریب میں شریک تمام بزرگ شخصیات اور جوانوں نے مجلس وحدت مسلمین پاکستان کے نامزد امیدوار سید محمد رضا کی گذشتہ کاردگی پر اطمینان کا اظہار کرتے ہوئے الیکشن 2018 میں مجلس وحدت مسلمین پاکستان کوئٹہ ڈویژن سے نامزد امیدوار برائے صوبائی اسمبلی حلقہ #PB_27 اور قومی اسمبلی حلقہ #NA_265 جناب سید محمد رضا ( آغا رضا )کی بھر پور حمایت کا اعلان کیا۔

وحدت نیوز (جیکب آباد) مجلس وحدت مسلمین سندہ کے سیکریٹری جنرل علامہ مقصودعلی ڈومکی نے کہا کہ استعماری افواج مل کر بھی یمن کی بہادر عوام اور انصار اللہ کے شجاع حسینیوں کو شکست دینے میں ناکام رہیں، یمن کی انصار اللہ نے ایک بار پھر ثابت کر دیا کہ اللہ کے دین کی مدد کا اگر صادقانہ جذبہ ہو تو دنیا کے شیاطین مل کر بھی اللہ والوں کا مقابلہ نہیں کر سکتے۔ صبر و استقامت اور توکل علی اللہ اھل حق کا ہتھیار ہے۔ یمن کی انصار اللہ اور لبنان کی حزب اللہ پر عالم اسلام کو ناز ہے۔ انہوں نے کہا کہ جارح افواج کا یمن فتح کرنے کاخواب ناقابل تعبیر ہے، یمن عزم و استقامت کی سرزمین ہے۔ آل سعود نے اسلام دشمن قوتوں کیساتھ مل کر دنیائے اسلام میں قتل و غارت اور دھشت گردی کا بازار گرم کر رکھا ہے۔

انہوں نے کہا کہ نائیجریا کے مظلوم حسینی آج بھی اپنے بہادر قائدعلامہ محمد ابراہیم زکزاکی کی رہائی کے لئے سراپا احتجاج بنے ہوئے ہیں۔ ابراہیم زکزاکی فقط نائیجریا کے نہیں بلکہ عالم اسلام اور عالم انسانیت کا عظیم سرمایہ اور قابل فخر لیڈر ہیں۔ مادی مفادات میں غرق دنیا میں ابراہیم زکزاکی جیسے عاشقان خدا کمیاب ہیں۔ جنہیں چھ جوان بیٹوں کی شہادت اور طویل عرصہ جیل اور قید و بند کی صعوبتیں بھی راہ حق سے دور نہ کر سکیں۔انہوں نے مطالبہ کیا کہ ابراہیم زکزاکی کو جلد قید سے رہا کیا جائے اور نائیجریا میں جاری شیعہ نسل کشی کو روکا جائے۔

وحدت نیوز (ملتان) مجلس وحدت مسلمین پاکستان نے تحریک انصاف کے مکمل حمایت کا اعلان کردیا، مخدوم شاہ محمود قریشی کی جانب سے ایم ڈبلیو ایم کے سربراہ علامہ راجہ ناصر عباس جعفری کا خصوصی شکریہ، ملک بھر میں پی ٹی آئی کے اُمیدواروں کی بھرپور حمایت کریں گے، علامہ اقتدار نقوی کی پریس کانفرنس، تفصیل کے مطابق ملتان میں پریس کانفرنس سے خطاب کرتے ہوئے علامہ اقتدار حسین نقوی نے اہل تشیع کی نمائندہ جماعت اور ملتان بھر کے شیعہ عمائدین کی جانب سے مخدوم شاہ محمود قریشی اور پی ٹی آئی کے اُمیدواروں کی حمایت کا اعلان کیا، اس موقع پر ایم ڈبلیو ایم کے رہنما مہر سخاوت سیال ،سلیم عباس صدیقی، علامہ قاضی نادر حسین علوی، مولانا ہادی حسین ہادی،مولانا وسیم عباس معصومی، مولانا اعجاز حسین بہشتی،مولاناعمران ظفر،سید قمر عباس زیدی،سردار مرید حسین خان،مہر اکرم سیال،زاہد عاربی، حسنین کربلائی،زاہد قریشی، اسماعیل شاہ، تابش رضا،مرزا وجاہت علی، سید دلاور عباس زیدی، ڈاکٹر تنویر عباس، اقبال حسین خان کشفی،ملک غلام حسنین انصاری، شہوار حسین، طالب حسین ، سید وسیم عباس زیدی ،محتشم نقوی ، اُمیدوار صوبائی اسمبلی جاوید اختر انصاری اور دیگر بھی موجود تھے۔

علامہ اقتدار حسین نقوی نے کہا کہ ہم نے ملک بھر میں پی ٹی آئی کے اُمیدواروں کی حمایت کا فیصلہ کیا ہے، کیونکہ پی ٹی آئی ہی اس ملک کی تقدیر بدل سکتی ہے۔ مخدوم شاہ محمود قریشی نے پریس کانفرنس سے خطاب کرتے ہوئے کہا کہ میں ایم ڈبلیو ایم کے سربراہ علامہ راجہ ناصر عباس جعفری ، علامہ اقتدار حسین نقوی، ان کی جماعت ملتان کے شیعہ عمائدین کا شکریہ ادا کرتا ہوں جنہوں نے میری اور میری جماعت کی حمایت کا اعلان کیا۔ مخدوم شاہ محمود نے کہا کہ سندھ میں پولیس گردی اور کرپشن کی داستانیں ہیں،تحریک انصاف کرپشن فری پاکستان بنانے کا پختہ ارادہ کر چکی ہے جس نے کرپشن کی ہے وہ قانون کی گرفت میں آئے گا، مجھے سندھ کی ہوا بھی بدلتی دکھائی دے رہی ہے ۔ شاہ محمود قریشی نے مزید کہا کہ پیپلزپارٹی کی بنیاد رکھنے والے آج آصف زرداری سے حق مانگ رہے ہے،انہوں نے حق نہیں دیا،اب صبرکاپیمانہ لبریزہورہاہے،امین فہیم کے خاندان کاسیاست میں حق مانگناتبدیلی کا پیش خیمہ ہے۔ گزشتہ روزنوازشریف اور شہبازشریف کیاندازبیان میں تضادتھا۔انہوں نے مزید کہا کہ عمران خان پارٹی کے اندرانتخابات بھی کرواتے ہیں ،ہم وراثت کی سیاست سے ہٹ کر بات کرتے ہیں،تحریک انصاف نے جلسوں کااسٹائل اورسیاست کا رخ تبدیل کردیاہے،مسلم لیگ (ن) کی ترجیح ہیومن ڈویلپمنٹ نہیں تھی،عدالت کے فیصلے پرعمل درآمد کرانے کیلئے ہرممکن کوشش کریں گے۔

وحدت نیوز (اسلام آباد) مجلس وحدت مسلمین شعبہ خواتین اسلام آباد کی پہلی باضابطہ میٹنگ E 1 1 میں منعقد کی گئی اس میٹنگ کا مقصد تنظیم سازی کے سلسلے کو آگے بڑھانا تھا ۔ میٹنگ کی صدارت کرتے ہوئے ضلعی رہنما قندیل زہرہ کاظمی نے کہا کہ اس پلیٹ فارم کا مقصدسب کو بلا تفریق متحد کرنا ہے ۔ محترمہ صدیقہ اور محترمہ صبا کاظمی کو اسلام آباد کی ضلعی آرگنائزر کے طور پر فرائض سر انجام دینے کے لیے ہدایات دیتے ہوۓ کہا کسی بھی میدان میں کامیابی کے لئے خلوص نیت اور بلند حوصلے کی ضرورت ہوتی ہے اس لئے اپنی ذمہ داریوں کا درک کرتے ہوۓ صبر کے دامن کو کبھی ہاتھ سے مت چھوڑیں اور اپنی پوری محنت اور دیانتداری کے ساتھ اپنے فرائض سرانجام دیں۔

 انہوں نے کہا بی بی ع کی سیرت پر عمل اور کار زینبی کو آگے بڑھانا ہم پرلازم ہے،اس موقع پرمحترمہ تسکین ظفر کواسلام آباد کی کانفرنس کی سوشل میڈیا کے لیے رپورٹ بنانے کی ذمہ داری سونپی گئی اور اس بہتر بنانے ک لیے اہم نکات سے آگاہ کیا گیا۔خواتین شرکا نے پوری لگن کے ساتھ اپنی ذمہ داریاں ادا کرنے کا عہد کیا۔اختتام اجلاس پر شہداء کیلئے سوره فاتحہ پڑھی گئی اور دعا کی گئی کہ اس تنظیم کو اللّه پاک بی بی ع کے صدقےمیں بہت آگے تک لے کر جائے اور ہم اپنے نیک مقصد میں کامیاب ہو ۔

وحدت نیوز (ٹنڈو محمد خان) مجلس وحدت مسلمین کی سعید پور ٹکر میں سید ذوالفقار شاہ ہاؤس میںپریس کانفرنس۔ پریس کانفرنس میں پاکستان تحریک انصاف کے ڈویژنل وائس پریزیڈنٹ اور پی ایس 69کے نامزد امیدوار سید ذوالفقار شاہ بھی موجود تھے مجلس وحدت مسلمین کے ضلعی سیکریٹری جنرل نے پاکستان تحریک انصاف کے نامزد امیدوار سید ذوالفقار شاہ کی بھرپور حمایت کااعلان کیا اور انکا مزید کہنا تھا کہ پی ٹی آئی سے ہمارا اتحاد صرف الیکشن کیوجہ سے نہیں ہمارا اتحاد الیکشن سے پہلے بھی تھا اور انشاءاللہ آئندہ بھی ہمارا اتحاد رہیگا انکا مزید کہنا تھا کہ پیپلز پارٹی نے گذشتہ دس سالوں کی حکومت میں عوام کو غریبی اور لاچاری کے سواء کچھ نہیں دیا گذشتہ حکومت نے سندھ کو مال غنیمت سمجھ کر لوٹا ہے ہم ان لٹیروں کو انکے مقاصد میں کامیاب ہونے نہیں دینگے ہم پاکستان تحریک انصاف کے نامزد امیدوار سید ذوالفقار شاہ کی بھرپور حمایت کرتے ہیں اور انشاءاللہ ہم سب ملکر اس پاک سرزمین سے ان لٹیروں کا صفایا کرینگے۔

 اس دؤران سید ذوالفقار شاہ نے پریس کانفرنس سے خطاب کرتے ہوئے مجلس وحدت مسلمین سے اظھار تشکر کرتے ہوئے کہا کہ میں مجلس وحدت مسلمین اور حلقہ کی عوام کو یقین دلاتا ہوں کہ میں عوام کی امیدوں پہ پورا اترنے کی کوشش کرونگا اس دؤران مجلس وحدت مسلمین کے ضلعی رہنما محمد اشرف خاصخیلی۔سجاد ڈومکی اور جمشید جعفری بھی پریس کانفرنس میں شریک تھے۔۔

وحدت نیوز (لاہور)  مجلس وحدت مسلمین کے سیکرٹری امور جوانان سید سجاد نقوی نے ایون فیلڈ ریفرنس فیصلے سے متعلق اپنے بیان میں کہا کہ نواز شریف نیلسن منڈیلا نہیں ہیں ۔ انہوں نے پاکستان کو لوٹا ہے اور قوم ان کی گرفتاری سے خوش ہوگی۔وہ کوئی عوام کے لئے جیل نہیں جارہے بلکہ انہوں نے پاکستان کو لوٹا ہے اور اس پر وہ جیل جارہے ہیں۔ انہوں نے کہا کہ نواز شریف کی اربوں کی جائیدادیں ہیں اور ان کا نواز شریف جواز پیش نہیں کر سکے اور یہی کرپشن ہے ۔سجاد نقوی کا مزید کہنا تھا کہ  نواز شریف اور اس کے خاندان کو انتہائی منصفانہ سزا دے کر آخر کار پاکستانی قوم کی تکلیفوں کا مداوا کیا گیا کیونکہ پاکستان کو ترقی کے سفر میں پیچھے دھکیلنے کے ذمہ دار یہ لوگ ہیں۔ پاکستانی قوم کی تکلیفوں اور مصیبتوں کے ذمہ داروں کو سزا دی گئی جس پر وہ نیب کورٹ اور سپریم کورٹ کو خراج تحسین پیش کرتے ہیں۔