وحدت نیوز(لاہور) مجلس وحدت مسلمین کے صوبائی دفتر لاہور میں مجلس وحدت مسلمین شعبہ خواتین لاھور کی ضلعی کابینہ کی تقریب حلف برداری کا انعقاد کیا گیا۔ جس میں ضلعی سیکرٹری جنرل محترمہ حنا تقوی نے نامزد اراکین کابینہ سے حلف لیا۔ اس موقع پر ڈپٹی سیکرٹری جنرل محترمہ عظمی نقوی بھی موجود تھیں۔ ضلعی کابینہ کے منتخب عہدہ داران کو درج ذیل شعبہ جات کی ‎ذمہ داریاں سونپی گئیںہیں ۔

سیکرٹری تعلیم ، محترمہ فرحانہ، سیکرٹری تنظیم سازی ، محترمہ رضوانہ رضا ،سیکرٹری روابط عندلیب سید، سیکرٹری سیاسیات محترمہ حمیرا ،سیکرٹری نشر و اشاعت محترمہ نیئر زھرا ،سیکرٹری تحفظ عزاداری محترمہ بشریٰ شیرازی،سیکرٹری میڈیا سیل محترمہ نگین رضوی ،معاون محترمہ کرن ،سیکرٹری مالیات محترمہ نادیہ ،سیکرٹری امور فلاح و بہبود محترمہ ناصرہ اظھر،سیکرٹری شعبہ عالمات و ذاکرات محترمہ عصمت بتول ،سیکرٹری شعبہ تربیت محترمہ نجبہ،سیکرٹری شماریات محترمہ فریحہ ،سیکرٹری یوتھ محترمہ کلثوم ،معاون محترمہ عذرا ،سیکرٹری ورکنگ وومن محترمہ عذرا ،معاون محترمہ رباب ،سیکرٹری شعبہ اطفال محترمہ افشین، معاون محترمہ ساجدہ ۔

حلف برداری کے بعد ضلعی سیکرٹری جنرل محترمہ حنا تقوی نے تمام اراکین سے خطاب کیا اور مجلس وحدت مسلمین پاکستان کے مذہبی اور سیاسی منشور سے آگاہ کیا۔ جس کا اولین مقصد دین کا احیاء اور مملکت خداداد پاکستان کی سالمیت اور استحکام کے لیے عملی کوشش کرنا ہے۔ اسلامی حکومت کے قیام کے لئے عملی جدوجہد مختلف ادیان مذاہب اور مسالک کے مابین روابط اور ہم آہنگی کا فروغ تعلیمات قرآن اور محمد و آل محمد علیہم السلام کی روشنی میں امام حسین کے ذکر اور افکار کا فروغ اور اس کا تحفظ اور امر بالمعروف اور نہی عن المنکر کا احیاء تنظیم کا نصب العین ھے۔ تمام اراکین کابینہ نے قومی یکجہتی اور اتحاد بین المسلمین کے لئے جدوجہد جاری رکھنےکے عزم کا اعادہ کیا ۔

وحدت نیوز(اٹک) غیبت امام مھدی علیہ سلام میں ہماری ایک ذمہ داری یہ بھی ہے کہ معرفت امام ع اور منتظرین امام کی صفات  و خصوصیات کے عنوان پر ذیادہ سے ذیادہ محافل منعقد کی جائیں ۔عصر حاضر میں ہم مشاھدہ کریں تو دیکھیں گے کہ دنیا ظلم و جور سے پر ہو چکی ہے عدل و انصاف نا پید ہو چکا ہے ہر طرف قتل و غارت کا بازار گرم ہے۔ شیطانی و طاغوتی طاقتیں دنیا کا نظام اپنے قابو میں کرنا چاہتی ہیں ۔نفسا نفسی کے اس دور میں صرف گنتی بھر لوگ ایسے ہیں جو استکباری و سامراجی طاقتوں اور نظام کے خلاف کلمہ حق اور الہی نظام کی بات کرتے ہیں ۔ ان خیالات کا اظہار مجلس وحدت مسلمین شعبہ خواتین کی مرکزی سیکرٹری شماریات محترمہ فرح دیبا نے ضلع اٹک میں منعقدہ “ امام زمانہ ع اور ہماری ذمہ داریاں” سیمینار سے خطاب کرتے ہوئے کیا ۔

انھوں نے مزید کہا کہ ظلم کے سامنے سر جھکانا اور خاموشی سے سہ لینا یہ عمل ہمارے مکتب کی تعلیمات کے برخلاف ہیں ہمیں اپنی بساط کے مطابق باطل قوتوں کے سامنے اپنی آواز  بلند کرنی چاہیے اور ظلم و شقاوت کے اس نظام کے خلاف برسرپیکار رہنا چاہیے۔ ایم ڈبلیو ایم شعبہ خواتین ضلع اٹک کے زیر اہتمام منعقدہ سیمینار میں خواتین نے بھرپور شرکت کی اس موقع پر محترمہ صائمہ ، محترمہ ندا حیدر اور محترمہ سعدیہ بتول نے بھی سیمینار سے خطاب کیا اور نہایت مفید موضوعات و ارشادات کو سامعین کے گوش گزار کیا۔

وحدت نیوز(ملتان) مجلس وحدت مسلمین ملتان کے ضلعی آفس کا افتتاح کردیا گیا، ضلعی آفس کا افتتاح مرکزی سیکرٹری جنرل مجلس وحدت مسلمین پاکستان علامہ راجہ ناصر عباس جعفری  نے اپنے دست مبارک سے کیا جبکہ اس موقع پر صوبائی سیکرٹری جنرل جنوبی پنجاب علامہ اقتدار نقوی ،علامہ غلام مصطفیٰ انصاری ، ڈویثرنل صدر آئی ایس او برادر عاطف ضلعی سیکرٹری جنرل برادر مرزا وجاہت علی سمیت علاقہ معززین اور ایم ڈبلیوایم کے کارکنان بڑی تعدادمیں موجود تھے۔ علامہ راجہ ناصرعباس جعفری نے ضلعی آفس کے افتتاح کے بعد ملک وقوم کی ترقی ،خوشحالی اور سلامتی کیلئے خصوصی دعا بھی کروائی ۔

وحدت نیوز(سکردو) مجلس وحدت مسلمین بلتستان اور گلگت بلتستان یوتھ الائنس کی جانب سے ملک بھرمیں جاری شیعہ جوانوں کی جبری گمشدگیوں کے خلاف اور کراچی میں جاری دھرنے کے شرکاء سے اظہار یکجہتی کے لئے یاد گار شہداء سکردو پر علامتی دھرنادیا گیا اور احتجاج کیا گیا ۔

علامتی احتجاجی دھرنےسے سیکریٹری جنرل ایم ڈبلیوایم گلگت بلتستان اور مجاہد عالم دین آغا سید علی رضوی ، چیئرمین گلگت بلتستان یوتھ الائنس شیخ حسن جوہری، سیکرٹری جنرل ایم ڈبلیو ایم ضلع سکردو شیخ فدا ذیشان،صدر آئی ایس او بلتستان ڈویژن برادر موسی علی اور دیگر رہنماؤں سے خطاب کیا ۔

مقررین نے کہاکہ کراچی میں شیعہ لاپتہ افراد کے اہل خانہ کےاحتجاجی دھرنے کی مکمل حمایت کا اعلان کرتے ہیں۔ ریاستی ادارے گناہ گاروں کو عدالتوں میں پیش کریں اور بے گناہوں کو رہا کریں۔ جبری گمشدگیاں آئین پاکستان کی سراسر خلاف ورزی ہے ۔

اگر خانوادہ اسیران ملت جعفریہ کے مطالبات تسلیم نا ہوئے تو علامتی احتجاجی دھرنے مستقل دھرنوں میں تبدیل ہوجائیں گے اور یہ سلسلہ پوری ملک میں پھیل جائے گا۔

وحدت نیوز(اسلام آباد) عالمی استعماریت کے شکنجے میں جکڑے پاکستان میں محنت کش فاقہ کشی پر مجبور ہے۔ ملکی ترقی اور مزدور دشمن قوانین سے نجات کے لئے مظلوموں کو متحد ہونا ہوگا ۔حکومت عالمی یوم مزدور پر فقط بیانات پر اکتفا کرنے کے بجائے مزدور طبقے کی بہتری کے لئے اقدامات کا اعلان کرے ،ان خیالات کا اظہارسربراہ مجلس وحدت مسلمین پاکستان علامہ راجہ ناصر عباس جعفری نےعالمی یوم مزدور کے موقع پر میڈیا سیل سے جاری بیان میں کیا۔

 انہوں نے کہا کہ ملک کے مزدور اور متوسط طبقے کی مشکلات ناقابل برداشت ہیں کسی بھی ملک کی ترقی میں انڈسٹری کو اقتصادی ڈھانچے میں ریڑھ کی ہڈی کی حیثیت حاصل ہوتی ہے اور صنعتوں کا دارومدار مزدور طبقے پر ہے افسوس ناک پہلو یہ ہے کہ مزد ور طبقے کے حقوق کے لئے لیبرقوانین انتہائی کمزور اور فرسودہ ہیں مزدوروں کی مزدوری بڑھتی ہوئی گرانی سے مطابقت نہیں رکھتی ۔

انہوںنے کہاکہ حکومت کو ملکی ترقی کے اہم ستون مزدور طبقے کی خوشحالی اور لیبر قوانین کے لئے سنجیدہ اقدامات کرنا ہونگے۔ انہوں نےمزید کہا کہ ہم انشااللہ مزدوروں کی فلاح بہبودکے لئے اور ملک سے مزدور دشمن قوانین کے خاتمے کے لئے جدو جہد جاری رکھیں گے۔

وحدت نیوز(اسلام آباد) مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری نے میڈیا سیل سے جاری اپنے بیان میں کہاہے کہ کراچی میں جاری شیعہ گمشدگان کے اہل خانہ کےدھرنے کی حمایت کرتے ہیں۔

انہوں نے کہاکہ حکومت پاکستان اور ریاستی ادارے خانوادہ اسیران کہ جذبات و احساسات کا خیال رکھتے ہوئے ان گمشدہ پاکستانیوں کی فوری بازیابی کو یقینی بنائیں ۔ ایسی صورتحال پیدا نہ کریں کہ لوگ ریاست و حکمرانوں سے مایوس ہوجائیں ۔ جو ملزم ہیں انکو عدالتوں میں پیش کیاجائے اور بیگناہوں کی فوری بازیابی کو یقینی بنایا جائے ۔

علامہ راجہ ناصرعباس جعفری نے کراچی کے تمام مومنین ومومنات سے گذارش کی کہ وہ اس احتجاجی دھرنے میں بھرپور شرکت کو یقینی بنائیں اور اپنے اہل خانہ کے ہمراہ شریک ہوکرخانوادہ اسیران ملت کے عزم وحوصلے میں اضافے کا سبب بنیں جوکہ اپنے عزیزوں اور پیاروں کی جبری گمشدگیوں کے بعد اس انتہائی اقدام پر مجبور ہوئے ہیں ۔