وحدت نیوز(نصیر آباد) ایم ڈبلیوایم بلوچستان ضلع نصیرآباد کے زیراہتمام گوٹھ میرغلام مصطفٰی خان گولہ میں سالانہ مجلس عزاء سے خطاب کرتے ہوئے صوبائی جنرل سیکرٹری مجلس وحدت مسلمین کا کہنا تھا کہ فرقہ پرست عناصر سامراجی ایجنٹ بن کر امت مسلمہ کے درمیان اختلاف و انتشار کو ہوا دے رہے ہیں۔یزیدیت کے پیروکار عزاداری کیخلاف نت نئی سازشوں میں مصروف ہیں، علامہ مقصود علی ڈومکی نے کہا ہے کہ کربلا ہر دور کی باطل طاغوتی قوتوں کے خلاف قیام اور جدوجہد کا درس دیتی ہے۔ حسینی تحریک اب حسینی انقلابی تحریک میں بدل چکی ہے۔ دنیا بھر کے کروڈوں حریت پسند انسانوں کا شہدائے کربلا سے تجدید عہد عالمی تحریک کا نقطہ آغاز بن سکتا ہے۔ انہوں نے کہا کہ پاکستان میں شیعہ سنی ملکر نواسہ رسول (ص) حضرت امام حسین (ع) عالمی مقام کا غم مناتے ہیں جو اتحاد بین المسلمین کا عملی مظاہرہ ہے۔ یزیدیت کے پیروکار اتحاد امت سے خائف ہیں۔ لہذا عزاداری اور حسینی تحریک کیخلاف نت نئی سازشوں میں مصروف ہیں۔ فرقہ پرست عناصر سامراجی ایجنٹ بن کر امت مسلمہ کے درمیان اختلاف و انتشار کو ہوا دے رہے ہیں۔ شیعہ سنی مسلمان اپنے اتحاد سے دشمن کے عزائم خاک میں ملا دیں۔ اس موقع پر ایم ڈبلیو ایم کے ضلعی رہنما راجہ خان گولہ، میر غلام مصطفیٰ خان، مولانا سید ظفر عباس شمسی اور دیگر نے بھی خطاب کیا۔