وحدت نیوز(کراچی) مجلس وحدت مسلمین پاکستان کے زیر اہتمام پارٹی چیئرمین سینیٹر علامہ راجہ ناصر عباس جعفری کی اپیل پر جمعتہ الوداع کو عالمی یوم القدس کے طور پر منایا، اس سلسلے میں ایم ڈبلیو ایم کے زیر اہتمام ملک کے چاروں صوبوں، گلگت بلتستان، آزاد جموں و کشمیر سمیت تمام چھوٹے بڑے شہروں میں قبلہ اوّل کی آزادی اور مظلوم فلسطینیوں سے اظہار یکجہتی کیلئے بعد از نماز جمعہ ریلیاں اور اسرائیلی مظالم کے خلاف مظاہرے کئے گئے، جس میں خواتین، بچے، بزرگوں اور جوانوں نے کثیر تعداد میں شرکت کی۔ اندرون سندھ کے مختلف اضلاع میں القدس ریلیاں نکالی گئیں اور غزہ کے مظلومین کی حمایت اور اسرائیلی بربریت کے خلاف شرکاء نے امریکا و اسرائیل کے پرچم بھی نذر آتش کئے، جبکہ شہر کراچی میں ایم ڈبلیو ایم کی جانب سے مرکزی احتجاجی مظاہرہ جامع مسجد نور ایمان ناظم آباد کے باہر کیا گیا، جس علامہ باقر عباس زیدی، علامہ مبشر حسن، علامہ حیات عباس نجفی و دیگر نے خطاب کیا، مظاہرین نے امریکا و اسرائیل مردہ باد کے نعرے لگائے اور غزہ جنگ بندی کا مطالبہ کیا۔

احتجاجی مظاہرے سے خطاب کرتے ہوئے علامہ باقر عباس زیدی نے کہا کہ جمعتہ الوداع یوم مظلومین ہے، اسرائیلی جارحیت کے خلاف حکومتی خاموشی مجرمانہ ہے، قائداعظم محمد علی جناحؒ سے لیکر ذوالفقار علی بھٹو اور بے نظیر بھٹو کا فلسطینیوں کیلئے مؤقف واضح تھا، اسرائیل غاصب ریاست ہے، کبھی تسلیم نہیں کریں گے۔ انہوں نے کہا کہ امریکا خدا نہیں، ملکی حکمران خوف خدا کریں، پاکستان کو امریکا کی جانب سے کھلی دھمکیوں کی بھرپور مذمت کرنی چاہئے، ملکی حکمران امریکی کاسہ لیسی چھوڑیں، پاکستان کے داخلی خودمختاری میں کسی بھی طاقت کی مداخلت غداری ہے، 1948ء سے قابض اسرائیل آج تک فلسطینیوں کی نسل کشی کر رہا ہے۔

مقررین نے کہا کہ پتھر اور غلیلوں سے لڑنے والے مظلوم آج بھاری اسلحہ سے جواب دے رہے ہیں، ظالم اسرائیل کے خلاف مجاہدین اور فلسطین کی عوام کو سلام پیش کرتے ہیں، ملکی حکمران غزہ جنگ بندی کی قرارداد پیش کریں، حکومت فلسطینی عوام کیلئے بلاتعطل امداد کا اعلان کرے، حکومت عالمی ادارے انصاف میں اسرائیل کے خلاف جنگی جرائم کے مقدمات قائم کروائے۔ مقررین نے امام خمینیؒ کی آواز پر جمعتہ الوداع اتحاد امت اور مظلومین فلسطین سے اظہار یکجہتی کا دن منانے پر ان کو خراج تحسین پیش کیا۔مقررین نے ملک میں اسرائیلی مصنوعات کے بائیکاٹ سمیت امریکی و برطانیہ سفارتخانہ بند کرنے کا مطالبہ کیا۔ احتجاجی مظاہرے کے آخر میں امریکا و اسرائیل کے پرچم نذر آتش کئے۔