وحدت نیوز(گلگت) وطن عزیز کی خاطر اپنی جان کا نذرانہ پیش کرنے والے پاک فوج کے جوان قوم کے محسن ہیں۔ملک کو اندرونی اور بیرونی خطرات سے بچانے میں پاک آرمی کی خدمات کو قدر کی نگاہ سے دیکھتے ہیں اور یوم دفاع کے موقع پر شہدائے پاک فوج کو سلام پیش کرتے ہیں ۔ان خیالات کا اظہار مجلس وحدت مسلمین کے صوبائی سیکرٹری جنرل شیخ نیئرعباس مصطفوی نے وحدت ہاؤس میں ایک تقریب سے خطاب کرتے ہوئے کیا ۔ انہوں نے کہا کہ وطن عزیز کی بنیادوں کو کھوکھلا کرنے والے انتہا پسندجو بیرونی ایجنڈے کی تکمیل میں مصروف عمل تھے اور اس ملک کے حکمرانوں نے سیاسی مصلحتوں کی وجہ سے ان کو کھلی چھٹی دے رکھی تھی جو آئے روز بے گناہ عوام اور سیکورٹی فورسز پر مسلسل حملے کررہے تھے پاک فوج نے ان ملک دشمنوں کے عزائم کو خاک میں ملادیا اور آج ملک عزیز کے شہری سکھ کا سانس لے رہے ہیں۔ انہوں نے حالیہ بارشوں کے دوران چلاس نیاٹ کے علاقے میں قدرتی آفت کے نتیجے میں ایک ہی خاندان کے 8 افراد کی ہلاکت پرلواحقین سے دلی ہمدردی کا اظہار کیااور صوبائی حکومت سے مطالبہ کیا کہ اس سانحے میں متاثرہ خاندان کے دکھوں کا مداوا کیا جائے۔