وحدت نیوز(گلگت) مجلس وحدت مسلمین گلگت بلتستان کے سیکرٹری جنرل علامہ نیئر عباس مصطفوی نے اپنے ایک بیان میں کہا ہے کہ علامہ امین شہیدی کی ضمانت منسوخ کرنا ایک سوچی سمجھی سازش کا حصہ ہے، پنجاب حکومت گھٹیا حرکتوں سے باز آئے ورنہ پورے پاکستان میں نواز لیگ کو ننگا کر دیں گے۔ اپنے سعودی فرمانرواؤں کی خوشنودی حاصل کرنے کی غرض سے پنجاب حکومت نے علامہ امین شہیدی پر جھوٹا مقدمہ قائم کیا ہے۔ انہوں نے کہا کہ حکومت پنجاب دہشت گردوں سے ساز باز کرکے ملت تشیع کے جوانوں کے خلاف جھوٹے مقدمے قائم کرکے ہراسان کر رہی ہے، جس کا انہیں بھرپور جواب دیا جائیگا۔ علامہ امین شہیدی بین الاقوامی شہرت کے حامل فرد ہیں، جن کی پوری زندگی اتحاد بین المسلمین کے فروغ پر صرف ہوئی ہے، جس نے اپنی تحریروں اور تقریروں کے ذریعے بکھری ہوئی پاکستانی قوم میں اتحاد و وحدت کی سوچ پیدا کی ہے اور موصوف اہل تشیع سے زیادہ اہل تسنن میں ایک مقبول رہنما کے طور پر پہچانے جاتے ہیں۔ نواز لیگ ایم ڈبلیو ایم کو اپنے راستے کی دیوار سمجھتی ہے چونکہ مجلس وحدت کی اعلٰی قیادت اور رہنماؤں کی دن رات انتھک محنت سے آج ملک میں سنی شیعہ وحدت قائم ہوئی ہے، دہشت گرد گروہوں اور ان کے پشت پناہوں کے خلاف سنی اور شیعہ ایک پیج پر جمع ہیں اور یہ سب کچھ علامہ امین شہیدی اور علامہ راجہ ناصر عباس کی محنتوں کی برکت ہے۔ علامہ امین شہیدی کو ایک جھوٹے مقدمے میں ملوث کرنا حقیقت سے آنکھیں چرانے کے مترادف ہے اور ہم سمجھتے ہیں کہ نواز حکومت نے یہ سب کچھ اپنے آقاؤں، سعودی فرمانرواؤں اور پاکستان میں دہشت گرد گروہوں کی خوشنودی اور آشیر باد حاصل کرنے کیلئے کیا ہے۔ انہوں نے کہا کہ حکومت اگر شیعہ رہنماؤں کو تنگ کرنے سے باز نہ آئی تو ملک گیر احتجاج کیا جائیگا۔