وحدت نیوز(سکردو) رکن جی بی کونسل و پولیٹیکل سیکریٹری مجلس وحدت مسلمین گلگت بلتستان شیخ احمد علی نوری نے اپنے ایک بیان میں کہا کہ سویڈن میں قرآنِ پاک کے نسخے کو نذر آتش کرنے کے افسوسناک واقعے کی شدید الفاظ میں مذمت کرتے ہیں۔

انہوں نے کہا کہ ایسے واقعات کے خلاف تمام مسلمانوں کو متحد مؤقف اپنانا چاہیے اور عالمی سطح پر ایسی قانون سازی کرنی چاہیے جو ایسے واقعات کو روکے اور ان میں ملوث افراد کو کیفرِ کردار تک پہنچائے. آزادی اظہار کی آڑ میں قرآن مجید کو نذرآتش کرکے گھناؤنے فعل کا ارتکاب کیا گیا جو کسی بھی طور پر قابل قبول نہیں۔ جس سے پوری دنیا کے مسلمانوں کی دل آزاری ہوئی۔

لہذا مسلم حکمرانوں کو چاہئے کہ یو این سے مطالبہ کریں کہ سویڈش حکومت کی جانب سے اس قبیح فعل کی اجازت دینے پہ سویڈن کے خلاف سخت کاروائی کی جائے۔کیونکہ ایسے اقدامات سے انتہا پسندی جنم لیتی ہے۔مسلم ممالک کے سربراہان کو چاہیے کہ اس دلخراش واقعہ پر یکجا ہو کر احتجاج ریکارڈ کرائیں اور متفقہ لائحہ عمل ترتیب دیں۔

انہوں نے مزید کہا کہ مغرب یہ جان لے دوسرے مذاہب کی مقدسات کی توھین کرنا کبھی بھی اظہار رائے کی آزادی نہیں کہلاتا، بلکہ تنگ نظری، خباثت کہلائے گا۔