وحدت نیوز(گمبہ اسکردو) مجلس وحدت مسلمین کےزیر اہتمام مالک اشتر چوک گمبہ اسکردو پر سانحہ ہزارہ گنجی کوئٹہ اور گوادر کوسٹل ہائی وے بلو چستان کے خلاف احتجاج کیا گیا۔ اس موقع پر رہنماوں نے خطاب کیا۔ حجتہ الاسلام سید احمد شاہ امام جمعہ، شیخ رضا، مولانا شیر محمد ناصری،عسکری کیانی اور ابراہیم آزاد نے اپنے خطاب میں کہا کہ دہشتگردوں نے بلوچستان میں بے گناہ مسلمانون کو شہید کرکے ایک طرف فرقہ واریت کو ہوا دینے کی کوشش کی تو دوسری طرف پاکستان کے چہرے کو مسخ کرنے کی کوشش کی۔ ان دہشتگردوں کو قرار واقعی سزا ملنی چاہیے جنہوں نے انسانوں کی جانوں کے ساتھ کھیلا اور ریاستی رٹ کو چیلنچ کرتے ہوئے وطن عزیز پاکستان کی ساکھ کو پوری دنیا میں شدید نقصان پہنچایا۔
انہوں نے کہا کہ انتہاء پسندی جس شکل میں ہو ناقابل برداشت ہے۔ سانحہ کوئٹہ سمیت دیگر دہشتگردی کے واقعات میں ملوث دہشتگردوں اور سہولت کاروں کو سزا دینا ریاستی اداروں اور عدلیہ کی ذمہ داری ہے۔ اگر دہشتگردوں کے ساتھ کسی بھی قسم کا سمجھوتہ کیا جائے تو انکے حوصلے مزید بلند ہوںگے اور ملک میں افراتفری کی فضاء قائم ہوگی۔ ہمارا روز اول سے مطالبہ رہا ہے کہ دہشتگرد ملک و قوم کے غدار ہیں اور اس غداری کے جرم میں نرم گوشہ رکھنے والے تکفیری برابر کے شریک ہیں۔ ملک میں تکفیر کرنے اور دہشتگردی کے ذریعے عدم استحکام پیدا کرنے والوں کا انجام تختہ دار ہونا چاہیے۔ پروگرام کے آخر میں شہدائے سانحہ کوئٹہ اور شہدائے پاکستان کے درجات کی بلندی کے لیے دعا مانگی گئی۔
