وحدت نیوز (سکردو) ن لیگ کی صوبائی حکومت کے گڈگورننس کے دعوے کھوکلے ثابت ہوئے، سابقہ اور موجودہ حکومت کی کارکردگی میں کوئی فرق نہیں ، کرپشن ، اقرباءپروری اور متعصبانہ سوچ علاقائی امن کے لئے ناسوربن رہی ہے، جی بی کی ن لیگی حکومت یہاں کے محروم عوام کو دھوکے کے سوا کچھ دینے کے قابل نہیں، گلگت بلتستان کے عوام کے آئینی حقوق سے کم کسی چیز پر راضی نہیں ہوں گے، ان خیالات کا اظہار مجلس وحدت مسلمین گلگت بلتستان کے صوبائی ڈپٹی سیکریٹری جنرل علامہ آغا علی رضوی نے وحدت ہاوس سے جاری بیان میں کیا۔
ان کاکہنا تھا کہ موجودہ حکومت کی سو دنوں کی کارکردگی انتہائی مایوس کن اور سابقہ حکومتی کارکردگی کی عکاس ہے، موجودہ حکومت کا کام عوام کی فلاح وبہبود کے لئے اقدامات کرنانہیں بلکہ سیاسی مخالفین کے خلاف بیان بازی کرنا رہ گیا ہے، مسلم لیگ ن کے سربراہ میاں نواز شریف نے الیکشن سے قبل گلگت بلتستان کے عوام سے کیئے کسی وعدے کو اب تک پورا نہیں کیا، تمام وفاقی جماعتیں گلگت بلتستان کی آئینی حیثیت کو اسی طرح متنازع رکھ کراپنے اقتدار کو طول دینا چاہتی ہیں ، لیکن گلگت بلتستان کے عوام اب مذید ان دھوکے بازوں کے فرب کا شکار نہیں ہوں گے۔
