وحدت نیوز(سکردو)  مجلس وحدت مسلمین پاکستان بلتستان ڈویژن کے سربراہ آغا علی رضوی اپنے ایک تعزیتی بیان میں کہا کہ فخرپاکستان عبدالستار ایدھی کی دکھی انسانیت کیلئے کی گئی خدمات اور کوششوں کو فراموش نہیں کیا جائے گا، انکی وفات سے پاکستان میں جو خلا پیدا ہوگیا ہے اسے پر کرنا ممکن نہیں۔دکھی انسانیت کی خدمت میں سرگرم عمل ایک باب پاکستان کے لیے بند ہوگیا جو کہ نہایت افسوس کا مقام ہے۔ انکی وفات سے پوری قوم سوگ کی حالت میں ہے۔انکی زندگی جہد مسلسل سے عبارت ہے۔ پاکستان کی تاریخ میں انہوں نے جو نقوش مرتب کیے اور دیگر اقوام کے لیے نمونہ عمل ہے۔ اسکی شخصیت پاکستان کے باعث فخر ہے۔ پوری دنیا میں ایدھی جیسی شخصیت گنتی میں موجود ہے۔ انہوں نے غریبوں ، یتیموں ،مسکینوں ، بے نواوں کی خدمت انسانی بنادوں پر کی۔ خدمت انسانی کے جذبے سے سرشار عبدالستار ایدھی پاکستان کے حکمرانوں اور عوام کے لیے نمونہ عمل ہے۔عبدالستار کی جہاں زندگی قابل رشک ہے وہاں انکی موت بھی قابل رشک تھی۔ انکا شمار پاکستان کے ان شخصیات میں ہوتا ہے جنہوں نے دلوں پر حکومت کی، اور دلوں پر حکومت کرنے والے کبھی نہیں مرتے۔ وہ ہمیشہ زندہ رہے گا انکی خدمات اور انکے نقوش کبھی ختم نہیں ہو سکتے۔