وحدت نیوز (پشاور) وطن عزیز کی سالمیت اور استحکام کے لئے پاک فوج سے مکمل تعاون اور شانہ بشانہ لڑنے کے لئے تیار ہیں لیکن اپنے دینی اور روایتی اصولوں سے ایک قدم بھی پیچھے نہیں ہٹیں گے، ان خیالات کا اظہار سیکرٹری جنرل مجلس وحدت مسلمین خیبر پختونخوا علامہ سبطین حسینی نے مدرسہ اہل بیت (ع) انوار المدارس اورکزئی کلایہ میں شہداء یوم عاشور کے ایصال ثواب کی مجلس عزاء سے خطاب میں کیا۔ ان کا کہنا تھا کہ عزاداری کا مقصد بیداری، استقامت، شجاعت، حمیت، وطن دوستی اور انسان دوستی ہے، یہ سفر 1400 سو سال سے جاری ہے اور جاری رہے گا، ہم کل بھی مملکت خداداد پاکستان کی نظریاتی اور جغرافیائی سرحدوں کے امین تھے، اب بھی ہیں اور آئندہ بھی رہیں گے۔ میزائل، مارٹر حملے حسینیت (ع) کا راستہ نہیں روک سکتے، انہوں نے کہا کہ آج ہمیں آپس میں اتحاد و اتفاق کو فروغ دیتے ہوئے کردار حسینی اپنانے کی اشد ضرورت ہے۔