وحدت نیوز(ڈی آئی خان) مجلس وحدت مسلمین خیبر پختونخوا کے صوبائی صدر علامہ جہانزیب جعفری نے ڈیرہ اسماعیل خان میں تسلسل سے جاری دہشت گردی کی شدید مذمت کرتے ہوئے کہا ہے کہ ٹارگٹ کلنگ رکنے کا نام ہی نہیں لے رہی۔ آئے روز کسی نہ کسی بے گناہ کو بے دردی سے قتل کر دیا جاتا ہے، حکومتی رٹ مکمل ناکام ہو چکی ہے۔ گزشتہ دو دہائیوں سے یہ قتل و غارتگری کا سلسلہ جاری ہے جس میں ایک ہی مسلک کے افراد کو نشانہ بنایا جا رہا ہے اگر یہی صورتحال رہی تو لوگ نقل مکانی کرنے پر مجبور ہو جائیں گے، پہلے بھی کئی متاثرہ خاندان ڈیرہ اسماعیل خان سے دیگر علاقوں میں منتقل ہو چکے ہیں۔

انہوں نے کہا کہ سالہاسال سے جاری دہشت گردی کو سنجیدگی سے روکنے کی کوشش ہی نہیں کی گئی اگر سنجیدہ اور مربوط انداز سے ان سفاک قاتلوں کے ساتھ نمٹا جاتا تو یہ ظلم وبربریت کا سلسلہ تھم چکا ہوتا، حکومتی رٹ مکمل طور پر ناکام نظر آتی ہے، بےحسی اور ناکامی کی یہ حالت ہے کہ آج تک کسی ایک قاتل کو بھی گرفتار کر کے کیفرِ کردار تک نہیں پہنچایا گیا، الٹا جن خود کش بمباروں کو عوام نے زندہ پکڑ کر قانون نافذ کرنیوالے اداروں کے حوالے کیا ہے انکے انجام کا بھی کوئی پتہ نہیں۔

انہوں نے کہا کہ گزشتہ روز دہشت گردوں کی بزدلانہ کارروائی کا نشانہ بننے والے اسلم خان کے خاندان سے پہلے بھی 27 افراد ٹارگٹ کلنگ کا نشانہ بن چکے ہیں لیکن افسوسناک اور درد ناک پہلو یہ ہے کہ آج تک ایک قاتل بھی قانون کی گرفت میں نہیں آ سکا، ہم حکومت وقت سے مطالبہ کرتے ہیں کہ وہ اس دہشت گردی سے آہنی ہاتھوں سے نمٹنے میں کوئی کسر اٹھا نہ رکھے۔ اگر دہشت گردانہ کارروائیوں کو نہ روکا گیا تو ملت جعفریہ ایک مرتبہ پھر دھرنا دینےپر مجبور ہوجائے گی اس دفعہ ملکی سطح پر دھرنے کی حمایت میں ساتھ دینے کی اپیل کرینگے۔