وحدت نیوز (کراچی) مجلس وحدت مسلمین صوبہ سندھ کے پولیٹیکل سیکریٹری سید علی حسین نقوی نے کہا ہے کہ انشاءاللہ مجلس وحدت مسلمین پی ایس 70 بدین کے ضمنی انتخاب میں بھرپور حصہ لے گی، سیاسی میدان کسی صورت خالی نہیں چھوڑیں گے ،موروثی سیاسی جماعتوں نے غریب عوام کا جینا دوبھر کردیا ہے ۔ان خیالات کا اظہار انہوں نے ایم ڈبلیوایم ضلع ماتلی کے وفد سے گفتگو کرتے ہوئے کیا۔ وفد میں میر طارق تالپر ، اسد لغاری ودیگر رہنما شامل تھے ۔

اس موقع پر علی حسین نقوی نے مزید کہاکہ مجلس وحدت مسلمین کے نامزد امیدوار انتخابی میدان میں بھرپور قوت کے ساتھ اتریں گے اور عوام کے حقوق کی درست ترجمانی کرتے ہوئے اپنا کردارادا کریں گے ، انہوں نے کہاکہ ستر برس سے زائد کا عرصہ گذر جانے کےباوجود سندھ کے عوام صاف پانی، صحت ، تعلیم اور دیگر بنیادی سہولیات سے محروم ہیں۔