وحدت نیوز(کراچی) مجلس وحدت مسلمین صوبہ سندھ کے سیکریٹری جنرل علامہ سید باقرعباس زیدی نے سندھ کے مختلف اضلاع میں دوران عشرہ مجالس عزا بجلی کی لوڈشیڈنگ اور واپڈا کی جانب سے سالہائے گذشتہ کی طرح اس سال ٹرانسفارمرز کی عدم فراہمی کی اطلاعات پر تشویش اور مذمت کا اظہار کیا ہے ۔ شیدی محلہ امام بارگاہ ماتلی، امام بارگاہ ملاح ٹنڈومحمد خان،سبحان کالونی ٹنڈوالہیار ،جمن شاہ امام بارگاہ ٹنڈو طیب،کامل شاہ امام بارگاہ ٹنڈو علی محمد ، ورکشاپ امام بارگاہ ضلع سانگھڑ میں دوران مجالس بجلی کی عدم فراہمی کسی بھی نا خوشگوار سانحے کا سبب بن سکتی ہے ۔

میڈیا کو جاری بیان میں انہوں نے کہا کہ عزاداران امام حسینؑ کو سہولیات کی فراہمی حکومت اور عوامی اداروں کا فرض اولین ہونا چاہئیے، لیکن افسوس اسلام کے نام پر وجود میں آنے والے ہمارے وطن عزیز میں نواسہ رسول ؐ کی یاد منانے والوں کواذیتیں فراہم کی جاتی ہیں، سندھ کے مختلف اضلاع سے رات کو مجالس عزا کے دوران لوڈ شیڈنگ اور بجلی کے ٹرانسفارمر کی عدم دستیابی باعث تشویش ہے ۔

انہوںنے کہا کہ ملت جعفریہ نے 3 دہائیوں میں ہزاروں عزاداروں کی قیمتی جانوں کی قربانی پیش کی ہے، سکیورٹی خدشات کے باوجود دوران عزاداری بجلی کی طویل لوڈ شیڈنگ اور کوئی متبادل سہولت فراہم نہ کرنا واپڈا کی نااہلی اور عزاداروں کی جانوں سے کھیلنے کی دانستہ سازش معلوم ہوتی ہے ۔ سندھ حکومت اس شکایت کا فوری نوٹس لے اور عزاداروں کو سہولیات کی فراہمی کے ساتھ ان کی جان ومال کا تحفظ بھی یقینی بنائے۔