وحدت نیوز(لاہور) مجلس وحدت مسلمین کے سربراہ علامہ راجہ ناصرعباس جعفری نے علامہ ڈاکٹر طاہرالقادری ،چوہدری شجاعت حسین،صاحبزادہ حامد رضاکے ہمراہ مجلس وحدت مسلمین کے صوبائی سیکرٹریٹ میں پریس کانفرنس سے خطاب کرتے ہوئے کہا کہ کہا کہ ہم 35سال سے لاشیں اٹھا رہے ہیں ،دھرنے دیے ،احتجاج کیا،،مگر یہ حکمران ٹس سے مس نہیں ہوئے، ہماری امنیت اور امن پسندی کو کمزوری نہ سمجھا جائے ، آج یومِ شہادتِ قائد شہید ہے ،ہمارے شہیدقائدعلامہ عارف حسینی کے قاتلوں کو نواز حکومت نے رہاکیا ،شہادتوں کا تسلسل آج تک جاری ہے، ماڈل ٹاؤن کا سانحہ اسی ظلم کی ایک کڑی ہے ، یہ ظالم حکمران اپنے اوچھے ہتھکنڈوں سے مجبور کر رہے ہیں کہ ہم غیر اعلانیہ مارچ کریں ، احتجاج کریں ،تو یہ سن لیں اگر ہمارا راستہ روکا گیا تو پورا پاکستان جام کر دیا جائے گا،ہم پاکستان میں تکفیریوں کو اپنا ایجنڈا مسلط نہیں کر نے دیں گے ۔ ان کا مذید کہنا تھا کہ قاتلوں اور جلادوں کی حوصلہ شکنی نہیں کی جارہی۔آج قائداعظم اورعلامہ اقبال کے بیٹے شیعہ اور سنی مل کر اس ملک سے دہشت گردوں ،تکفیریوں کو نکال باہر کریں گے۔ہر جبر کا مقابلہ مل کرکریں گے۔انہوں نے انقلاب مارچ کے حوالے سے گفتگو کرتے ہوئے کہاکہ حکمرانوں نے پر امن احتجاج کو روکنے کی کوشش کی تو پورے ملک کو جام کر دینگے ملک کا ہرگلی کوچہ مال روڈ اور ڈی چوک بن جائے گا۔انہوں نے کہا کہ چھوٹی چھوٹی رکاوٹوں کو ہٹانے کے لیے خواتین کے منہ میں گولیاں مار کر شہید کیا گیااب کوئی ظالم ہمیں ملکی استحکام و ترقی اور عوامی حقوق کی جدو جہد سے پیچھے نہیں ہٹا سکے گا ہم نے اپنی مظلومیت کو اب عوامی طاقت میں بدل دی ہے وہ وقت دور نہیں جب ظالم اپنے انجام کو پہنچ جائینگے اور مظلوموں اور مستضعفین کو فتح و نصرت نصیب ہونگے۔