وحدت نیوز(کوئٹہ)مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے کہا ہے کہ علمدار روڈ اور ہزارہ ٹاؤن کے عوام نے ہمیشہ ایم ڈبلیو ایم کا ساتھ دیا ہے، ہم ان کے اعتماد پر پورا اتریں گے۔ یہ بات انہوں نے ایم ڈبلیو ایم ضلع ہزارہ ٹاؤن کوئٹہ کی کابینہ سے ملاقات کے موقع پر کہی۔ اس موقع پر ضلعی صدر سید ابراہیم شاہ، نائب صدر آغا ضیاء، آغا محمد رضا، اراکین ضلعی کابینہ اور صوبائی سیکرٹری تربیت علامہ سید عباس موسوی شریک تھے۔ علامہ مقصود علی ڈومکی نے ضلعی کابینہ سے موجودہ صورت حال، تنظیمی فعالیت اور انتخابات کے حوالے سے تبادلہ خیال کیا۔ انہوں نے کہا کہ مجلس وحدت مسلمین کوئٹہ عام انتخابات اور بلدیاتی انتخابات میں بھرپور حصہ لے گی۔ نومبر کے آخری ہفتے میں کوئٹہ میں ورکرز کنونشن کا انعقاد خوش آئند ہے۔

تنظیمی یونٹس کی فعالیت کو مزید بہتر بناتے ہوئے یونٹس میں نو نکاتی پروگرام پر عملدرآمد کو یقینی بنایا جائے۔ ہر مہینے اسٹڈی سرکل اور دعائیہ تقریب اور درس کا پروگرام کارکنوں کی تنظیمی تربیت کے لئے اہم ہے۔ انہوں نے کہا کہ علمدار روڈ اور ہزارہ ٹاؤن کے عوام نے جس طرح مجلس وحدت مسلمین کا ہمیشہ ساتھ دیا ہے، ہم انشاءاللہ تعالیٰ ان کے اعتماد پر پورا اتریں گے۔ مجلس وحدت مسلمین کی صالح قیادت کو عوامی مسائل کا ادراک بھی ہے اور ان کو حل کرنے کی صلاحیت بھی ہے۔ اس موقع پر ضلعی صدر سید ابراہیم شاہ نے کہا کہ ضلع کوئٹہ نے عام انتخابات کے سلسلے میں اپنی تیاریوں اور رابطہ عوام مہم کا آغاز کر دیا ہے۔ نومبر کے آخری ہفتے میں ضلعی سطح پر ورکز کنونشن منعقد کیا جا رہا ہے۔ جس میں مرکزی اور صوبائی قائدین سے شرکت کی گذارش کی گئی ہے۔