وحدت نیوز(جیکب آباد)سٹی آف نالج پبلک اسکول جیکب آباد کے زیر اہتمام مظلوم فلسطینی بچوں سے اظہار یک جہتی کے لئے احتجاجی مظاہرہ کیا گیا۔ احتجاجی مظاہرے سے خطاب کرتے ہوئے مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے کہا ہے کہ غزہ تحریک آزادی فلسطین کا مرکز اور حریت شجاعت ظلم ستیزی کا استعارہ بن چکا ہے۔ غزہ کے بہادر فلسطینیوں نے اسرائیل کا ظلم و بربریت پر مبنی مکروہ چہرہ دنیا کے سامنے بے نقاب کر دیا ہے۔ غزہ انسانوں کا قبرستان بن چکا ہے۔ اسرائیلی ظلم و جفا پر عالمی استکباری قوتیں سہولت کار بن چکی ہیں جن کے ہاتھ مظلوم فلسطینیوں کے خون سے رنگین ہیں۔

انہوں نے کہا کہ پوری دنیا کے باضمیر انسان امریکہ اور اسرائیل کے خلاف سراپا احتجاج ہیں جبکہ اسرائیلی مظالم کو امریکی سرپرستی حاصل ہے۔ اگر شیطان بزرگ امریکہ اور عالمی استکباری قوتوں کی سرپرستی اور مدد نا ہوتی تو اسرائیل کب کا ہتھیار ڈال چکا ہوتا۔ پاکستانی حکومت اور مقتدر ادارے مظلوم غزہ اور فلسطین کی حمایت کے حوالے سے اپنی ذمہ داریاں پوری نہیں کر رہے۔ انجمن غلامان امریکہ غزہ کے قتل عام پر بھی خاموش تماشائی بنے ہوئے ہیں۔

انہوں نے کہا کہ وطن عزیز پاکستان میں ایک دفعہ پھر امریکی غلاموں کو مسلط کرنے کی سازش تیار ہو چکی ہے۔ جنہیں پاکستان کے پچیس کروڑ عوام پاکستان کی تباہی کا ذمہ سمجھتے ہیں انہیں بزور طاقت عوام پر مسلط کرنے کی کوششیں جاری ہیں۔اس موقع پر احتجاجی مظاہرے سے مجلس علمائے مکتب اہل بیت کے ضلعی صدر علامہ سیف علی ڈومکی اور مولانا ارشاد علی انقلابی نے بھی خطاب کیا۔