وحدت نیوز(ڈیرہ غازی خان)مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے اپنے دس روزہ تنظیمی دورے کے دوران ضلع ڈیرہ غازی خان کے مختلف یونٹس کا دورہ کیا اور وہاں مومنین کے اجتماعات سے خطاب کیا۔ اس موقع پر ایم ڈبلیو ایم ضلع ڈیرہ غازی خان کے ضلع صدر سید اظہر کاظمی اور ضلعی کابینہ کے اراکین ان کے ہمراہ تھے۔اس موقع پر جعفریہ مسجد ناری فارم یونٹ کے زیر اہتمام استقبال محرم الحرام مجلسِ عزاء سے خطاب کرتے ہوئے علامہ مقصود علی ڈومکی نے کہا کہ حسینیت دین خدا کی سربلندی کے لئے جدوجہد اور راہ خدا میں سب کچھ لٹانے کا نام ہے کربلا فقط ایک حادثہ نہیں بلکہ نظام حیات ہے۔
انہوں نے کہا کہ اللہ تعالیٰ نے ان مومنین سے عالمی حکومت کا وعدہ کیا ہے جنہوں نے نیک عمل انجام دیئے۔ صالحین کی حکومت کا وعدہ تورات اور زبور کے علاؤہ قرآن کریم میں بھی کیا گیا ہے۔ آج پوری دنیا کے صالحین قیام امام حسین علیہ السلام سے رہنمائی لیتے ہوئے دنیا بھر میں کفر و طاغوت اور یزید عصر کے خلاف سینہ سپر ہیں۔انہوں نے کہا کہ کربلا ہر دور کے عاشقان خدا کی درس گاہ ہے جو وارث کربلا حضرت امام مہدی علیہ السلام کی عالمی حکومت کے لئے زمینہ سازی کر رہے ہیں۔
اس موقع پر استقبال محرم مجلس عزا سے مجلس وحدت مسلمین بلوچستان کے صوبائی صدر علامہ سید ظفر عباس شمسی نے خطاب کرتے ہوئے کہا کہ آل رسول کی بے مثال قربانی نے دین اسلام کو دشمنوں کے شر سے محفوظ رکھا۔ ایام عزا منانے کا مقصد کربلا اور پیغام حسینیت سے تجدید عہد ہے۔
