وحدت نیوز(کراچی)معروف عالم دین مجلس وحدت مسلمین پاکستان کے مرکزی رہنما علامہ سید حسن ظفر نقوی کا جمعرات کی شام کراچی پریس کلب میں اپنی نیوز کانفرنس سے خطاب میں کہنا تھا کہ محرم الحرام کے قریب پارہ چنار پر لشکر کشی ملک دشمن عناصر کی سوچی سمجھی سازش ہے، 5 لاکھ سے زیادہ آبادی والا شہر پاراچنار مسلسل طالبان دہشت گردوں کے نشانے پر رہتا ہے ہر سال ماہ محرم الحرام سے قبل خانہ جنگی شروع ہوجاتی ہے ریاست اور سیکورٹی ادارے اس جنگ کو بروقت روکنے میں اپنا عملی کردار ادا کریں پارہ چنار کے پرامن اور وطن کے وفادار عوام پر جنگ مسلط کرنے والے شر پسند عناصر اپنے ناپاک عزائم میں ناکام ہونگے، یہ کوئی فرقہ وارانہ مسئلہ نہیں ہے بلکہ مذموم مقاصد پر مبنی ملک دشمن دہشت گردوں کی بہیمانہ سازش ہے۔

انہوں نے کہا کہ چار روز سے جنگ کی آگ میں سلگتے ہوئے پارہ چنار کے محب وطن شہریوں کی جان و مال کے تحفظ کو یقینی بنایا جائے، ملک کی تمام امن پسند قوتوں کو اس جنگ کے روکنے میں اپنا بھرپور کردار ادا کرنا چاہیے، پارہ چنار ایک حساس اور دفاعی حوالے سے انتہائی اہم علاقہ ہے، جس کا بدامنی کی لپیٹ میں آنا تشویشناک ہے، حکومت کو چاہیے کہ وہ فی الفور پاک و افغانستان بارڈر کو مکمل باڑ لگا کر سیل کرے۔

انہوں کے محرم الحرام میں ملک بھر میں عزاداری کے پروگرامات مجالس و جلوس عزاء کو فل پروف سیکورٹی فراہم کرنے کی ذمہ داری وفاقی و صوبائی حکومتوں کی ہے قبل از محرم الحرام مجلس وحدت مسلمین کی جانب سے 15 جولائی بروز اتوار بعد از مغربین امروہہ گراونڈ کراچی میں پیغام غدیر و عاشورا کانفرنس منقعد کی جائے گی جس میں ملت جعفریہ سے تعلق رکھنے والی تمام ملی تنظیمیں و شخصیات شرکت کریں گی جبکہ کانفرنس سے خصوصی خطاب چیئرمین علامہ راجہ ناصر عباس جعفری کریں گے۔پریس کانفرنس میں ایم ڈبلیو ایم عزاداری ونگ کے رہنما سید قیصر رضا جعفری، ڈپٹی سیکرٹری اطلاعات علی نیئر زیدی و دیگر موجود تھے۔