وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے 16 مئی یوم مردہ باد امریکہ و اسرائیل کی مناسبت سے اپنے بیان میں کہا ہے کہ امریکہ نے جس ناجائز صہیونی ریاست کی بنیاد رکھی وہ اپنے زوال کی طرف تیزی سے بڑھ رہی ہے، غاصب اسرائیل کی ظالمانہ اور جابرانہ کاروائیوں کی اندھیری رات چھٹنے والی ہے، غزہ کے مظلوموں پر گزشتہ ایک ہفتے تک جاری رہنے والی حالیہ بمباری امریکہ اور اس کے گماشتوں کی ایماء پر ہوئی ہے، جس میں بچوں، بوڑھوں، خواتین اور جوانوں کی شہادت پر دلی افسوس ہوا ہے جس کی شدید مذمت کرتا ہوں اور ان حملوں نے فلسطینی مظلومین کی تحریک مقاومت کو تقویت ملی ہے، اس سے بڑی ہزیمت اور ندامت کیا ہو گی کہ اسرائیل نے خود ہی غزہ پر جنگ مسلط کی اور خود ہی جنگ بندی پر مجبور ہو گیا۔ افسوس ناک پہلو یہ ہے اقتدار کے نشے میں مست پاکستان کے حکمران اس ساری صورتحال سے غافل رہے اور کسی نے ان حالیہ مظالم کی مذمت تک نہیں کی، ان بے حس حکمرانوں نے اپنی عوام کے لئے ملک کو فلسطین بنا دیا ہے۔

انہوں نے کہا کہ اسرائیل جیسی غاصب و ناجائز ریاست اور سرپرست امریکہ کو مشرق وسطی کے امن سے سخت تکلیف ہے، چین کی سربراہی میں ہونے والے سعودی عرب، ایران امن معاہدہ امریکہ و اسرائیل کو انتہائی ناگوار گزرا ہے، اس معاہدے نے امریکہ اور اس کے حواریوں کو عالمی سیاست میں غیر مؤثر کر دیا ہے، اسرائیل کے حالیہ پرتشدد، حملوں اور غیر انسانی سلوک پر دنیا کے نام نہاد انسانی حقوق کے اداروں کی مجرمانہ خاموشی شرمناک ہے، عالمی برادری کی طرف سے اسرائیل کے بہیمانہ اور وحشیانہ ظلم وبربریت اور خلاف ورزیوں کو نظر انداز کرنا قابل مذمت ہے اور ان اداروں کا دوہرا معیار ناقابل قبول ہے، ظلم جب بڑھتا ہے تو مٹ جاتا ہے ان مظالم نے فلسطینی مظلومین کو متحد اور مضبوط کر دیا ہے، اسرائیل کے تسلسل سے جاری مظالم سے چشم پوشی بین الاقوامی چارٹرز کی کھلم کھلا خلاف ورزی ہے۔