وحدت نیوز(لاہور) چیئرمین مجلس وحدت مسلمین پاکستان علامہ راجہ ناصر عباس جعفری نے اعلیٰ سطح وفد کے ہمراہ زمان پارک میں چیئرمین پاکستان تحریک انصاف عمران خان سے ملاقات کی اور ملک کی موجودہ صورتحال پر تبادلہ خیال کیا۔ وفد میں ایم ڈبلیو ایم کے وائس چیئرمین علامہ سید احمد اقبال رضوی، مرکزی جنرل سیکرٹری سید ناصر عباس شیرازی ،مرکزی سیکرٹری سیاسیات سید اسد عباس تقوی، محسن شہریار اور اسد علی بھی شامل تھے۔
ملاقات کے بعد میڈیا سے گفتگو کرتے ہوئے علامہ راجہ ناصر عباس جعفری نے کہا کہ گزشتہ چار پانچ دنوں میں ملک کو ہجانی کیفیت سے دوچار کیا گیا ،پی ڈی ایم اور ان کے آقاوں کی ایما پر ایک مقبول عوامی لیڈر کو بہیمانہ طریقے سے گرفتار کرکے عوام میں اشتعال پیدا کیا گیا ۔ اور پھر احتجاج کرنے والوں کی چادر اور چار دیواری کا تقدس پامال کیا گیا، ماؤں، بہنوں، بیٹیوں کو مارا پیٹا اور سر عام گھسیٹا گیا بچوں کو بے دردی سے تشدد کا نشانہ بنایاگیا، بنیادی انسانی حقوق کو پاؤں تلے روندا گیا،نہتی ماؤں بہنوں کے اوپر ظلم وبربریت کے پہاڑ توڑ دیئے، زنداں کی کوٹھڑیوں میں پابند سلاسل کر دیا گیا ہے، بعض خواتین کو ایسے تھانوں میں بند کیا ہوا ہے جہاں پر کوئی مرد نہیں ہے،پڑھی لکھی خواتین جو کہ مختلف شعبہ ہائے زندگی سے تعلق رکھتی ہیں انہیں قید کیا ہوا ہے، ان چند دنوں میں انسانی حقوق کی بدترین پامالیوں کے لئے ریاستی مشینری کا بے دریغ استعمال کیا گیا۔ ،خواتین کے ساتھ جو سلوک کیا گیا وہ ہماری اخلاقی و سماجی اقدار کے بھی برخلاف تھا۔ اس بہمانہ ظلم کی پرزور مذمت کرتے ہیں ۔
انہوں نے کہا کہ عمران خان کو ہم نے اس قدر مشکلات کے باوجود پرامید اور نڈر پایا ہے، یہ قانون قدرت ہے صبر و استقامت دکھانے والے چھوٹے گروہ بڑے بڑے لشکروں پر غالب آ جاتے ہیں، یہ ارادوں اور عزم و حوصلے کی جنگ ہے، پورے ملک کے لوگ آج بھی نکلے ہیں لیکن کہیں کوئی پتھراؤ نہیں ہوا، آج الیکشن کا دن تھا لیکن الٹا چور کوتوال کو ڈانٹے کی طرح سینا تان کر سپریم کورٹ کے باہر دھونس اور دھمکی کی راہ پر گامزن ہیں یہ امپورٹڈ حکومت اعلیٰ عدلیہ پر دباؤ ڈالنا چاہتی ہے۔
انہوں نے کہا کہ یہ وہ ٹولا ہے کہ جو چاہتے ہیں کہ عوام کو ڈرا کر آئین اور قانون کو بلڈوز کریں، یہ سب کا ملک ہے کسی ایک شخص کا نہیں، یہ شکست کھائیں گے اور رسوا ہوں گے اور ٹیڑھی انگلیوں کی بات کرنے والوں کی اپنی انگلیاں ٹوٹیں گی،پاکستان زندہ باد ہے اور رہے گا یہ آگے بڑھے گا انشاء اللہ اور یہ ناجائز قابضین ناکام و نامراد ٹھہریں گے، ہم اس وقت پاکستان تحریک انصاف کے تمام تر رہنماؤں اور کارکنان کی گرفتاری کی شدید مذمت کرتے ہیں اور کیا قصور ہے بزرگ خاتون ڈاکٹر شیریں مزاری کا جنہیں گھر سے گرفتار کر کے جیل میں ڈالا گیا ہے عمران ریاض کو مسنگ کر کے شدید تشدد کا نشانہ بنایا جا رہا ہے، املاک پر حملے غلط ہوئے ہیں جس کی تحقیقات کے لئے آزاد جوڈیشل کمیشن بنا کر حقائق سامنے لائے جائیں، ہمارا مطالبہ الیکشن کا ہے لہذا یہ سب پرتشدد واقعات اور کاروائیوں کے پیچھے وہی ذہن ہے جو الیکشنز نہیں چاہتے۔
