وحدت نیوز(کوئٹہ) جماعت اسلامی بلوچستان کے زیر اہتمام بلوچستان کے حقوق اور مقتدر قوتوں کا منفی رویہ کے موضوع پر دربار میرج ہال کوئٹہ میں آل پارٹیز کانفرنس منعقد ہوئی۔ آل پارٹیز کانفرنس میں علامہ مقصود علی ڈومکی اور علامہ ظفر عباس شمسی کی قیادت میں ایم ڈبلیو ایم کے وفد نے شرکت کی۔

کانفرنس میں جماعت اسلامی پاکستان کے مرکزی نائب امیر لیاقت بلوچ مسلم لیگ ن کے صوبائی صدر جعفر خان مندوخیل نیشنل پارٹی کے صوبائی صدر رحمت صالح بلوچ مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی صوبائی صدر علامہ سید ظفر عباس شمسی پی ٹی آئی کے صوبائی ڈپٹی سیکرٹری جنرل عبد الباری بڑیچ و دیگر سیاسی مذہبی رہنما شریک ہوئے۔

اس موقع پر آل پارٹیز کانفرنس سے خطاب کرتے ہوئے علامہ مقصود علی ڈومکی نے کہا کہ مقتدر قوتیں عوام کی رائے اور شہریوں کے بنیادی حقوق کا احترام کریں۔ عوام میں مہنگائی بے روزگاری لاقانونیت اور کرپشن میں ڈوبے ہوئے حکمرانوں اور ارباب اقتدار کے خلاف جو غم و غصہ ہے۔ اسے نظر انداز نہیں کیا جا سکتا۔ تاریخ میں پہلی بار پنجاب مقتدر قوتوں کے خلاف روڈوں پر ہے۔ محب وطن قوتوں کو موجودہ ابتر ملکی صورتحال پر تشویش ہے۔

انہوں نے کہا کہ معدنیات اور وسائل سے مالامال بلوچستان آج بھی محرومیتوں کا شکار ہے۔ ارباب اقتدار اور اختیار میں سے بلوچستان کی آواز سننے کے لئے کوئی بھی تیار نہیں۔