وحدت نیوز(اسلام آباد) ملی یکجہتی کونسل کا اہم مشاورتی اجلاس جامعہ نعیمیہ اسلام آباد میں منعقد ہوا جس کی صدارت جناب لیاقت بلوچ نے کی اجلاس میں مجلس وحدت مسلمین کے مرکزی جنرل سیکریٹری سید ناصر عباس شیرازی ،مفتی گلزار احمد نعیمی ،جناب ثاقب اکبر ،علامہ عارف حسین واحدی اور دیگر مذہبی تنظیموں کے نمائندگان شریک ہوئے۔
اجلاس میں مشاورت کے بعد جن امور پر فیصلہ جات کیئے گئے ان میں ماہ ربیع الاول میں ملی یکجہتی کونسل کی طرف سے مجلس وحدت مسلمین پاکستان کی میزبانی میں ایک عظیم الشان وحدت کانفرنس کا انعقاد کیا جائے گا جس میں ملی یکجہتی کونسل میں شامل تمام تنظیموں کے سربراہان شرکت کریں گے۔
ملی یکجہتی کونسل کے دفتر کی توثیق کا فیصلہ کیا گیا،آزاد کشمیر میں ملی یکجہتی کونسل کے انتخابات کا جناب لیاقت بلوچ صاحب کی سربراہی میں انعقاد اور ٹرانس جینڈر بل پر بھی مکمل اتفاق ہوا کہ جنس کے تعین کا فیصلہ انفرادی نہ ہو جس سے سماجی بگاڑ پیدا ہو بلکہ میڈیکل بورڈ فیصلہ کر کے جنس کا صحیح تعین کرے اور کسی بھی انسان کو اسلامی اور انسانی بنیادوں پر اس کے بنیادی حقوق و وراثت سے محروم نہ رکھا جائے۔
اجلاس میں مجلس وحدت مسلمین پاکستان کی نمائندگی کرتے ہوئے مرکزی جنرل سیکرٹری سید ناصر عباس شیرازی نے کہا ہے کہ عالمی استعماری طاقتیں ملک میں ثقافتی مداخلت کرنا چاہتی ہیں جس سے ماحول غیر اسلامی ہو اور ایسے قوانین لانے کی کوشش کی جا رہی ہے کہ جو اسلامی ثقافت کے متصادم ہوں تاکہ اسلامی ثقافت و اقدار مجروح ہوں اس طرح کے غیر اسلامی ہتھکنڈوں کے خلاف ہمیں کھڑا ہونا ہو گا اور آئندہ جمعہ کو اس بل کے حوالے سے آئمہ جمعہ والجماعت اپنا موقف بھی پیش کریں گے۔
