وحدت نیوز(گڑہی خیرو) مجلس وحدت مسلمین پاکستان کے مرکزی رہنما علامہ مقصود علی ڈومکی نے تحصیل گڑہی خیرو کے قدیمی شہر میراں پور برڑو اور دوداپور کا دورہ کیا۔اس موقع پر متاثرین بارش و سیلاب کے گرے ہوئے مکانات اور نقصانات کا جائزہ لیا۔
اس موقع پر گفتگو کرتے ہوئے علامہ مقصود علی ڈومکی نے کہا کہ چاول کی فصل اور جانوروں کا چارہ زیر آب آنے کے سبب تباہ ہوچکا ہے جس کے سبب کسان اور ان کے مویشیوں کو سخت مشکلات کا سامنا ہے۔ مویشی چارہ نا ہونے کے سبب کمزور ہو رہے ہیں جبکہ سیلاب کا گدلا کھارا اور خراب پانی پینے کے سبب جانور بیمار ہو کر مر رہے ہیں۔
انہوں نے کہا کہ دو مہینے سے سینکڑوں دیہات ابھی تک مکمل زیر آب ہیں۔ جہاں نظام زندگی مفلوج ہے۔ دیہاتوں میں سات فٹ جبکہ مین روڈ پر تین فٹ پانی ہے۔ حکومتی امداد کہیں نظر نہیں آ رہی حکومت اپنے ڈپٹی کمشنرز اراکین اسمبلی اور وزراء کو پابند کرے کہ وہ روزانہ کی بنیاد پر امدادی سرگرمیوں کی تفصیلات سے بذریعہ میڈیا عوام کو آگاہ کریں۔ کیوں کہ متاثرہ علاقوں میں سرکاری اداروں اور حکومت کی کارکردگی ایک فیصد سے بھی کم نظر آرہی ہے۔ جو کہ حیرت انگیز اور شرمناک ہے۔
