وحدت نیوز(پاراچنار)خیبرپختونخوا میں بلدیاتی انتخابات2022 کے دوسرے مرحلے میں پاراچنار میں ہونے والے تحصیل چیئرمین کے انتخاب میں مجلس وحدت مسلمین کے نامزد امیدوار مزمل حسین فصیح واضح برتری کے ساتھ کامیاب قرار پا گئے ہیں۔ ان کے مقابل پاکستان تحریک انصاف اور پاکستان پیپلز پارٹی کے امیدواروں کو بدترین شکست کا سامنا ۔
تفصیلات کے مطابق ایم ڈبلیوایم کے نامزد امیدوار برائے تحصیل چیئرمین پاراچنار مزمل حسین فصیح فاتح قرار پاگئے ہیں۔ ان کے مقابل پاکستان تحریک انصاف اور پاکستان پیپلز پارٹی کے نامزد امیدوار بری طرح شکست کھا گئے۔
غیر حتمی غیر سرکاری نتائج کے مطابق تحصیل چیئرمین پاراچنار کی نشست پر کامیاب قرار پانے والے مجلس وحدت مسلمین کے امیدوار مزمل حسین فصیح نے34 ہزار سے زائد ووٹ حاصل کرکے میدان ما ر لیا جبکہ ان کے مقابل حکمران جماعت پاکستان تحریک انصاف کے امیدوار جعفر حسین 11 ہزار سے زائد ووٹ لیکر دوسرے اور پاکستان پیپلز پارٹی کے نامزد امیدوارجلال حسین 10 ہزار سے زائد ووٹ لیکرتیسرے نمبر پر رہے۔
مزمل فصیح کی کامیابی کی خبر ملتے ہی پاراچنار کے غیورمومنین اور ایم ڈبلیوایم کےکارکنان نے بڑی تعداد میں سڑکوں پر نکل کر جشن منایا اور ایک دوسرے کو مبارکباد پیش کی۔مزمل فصیح نے کامیابی کے بعد بڑے عوامی جلوس کے ہمراہ قبور شہداء اور بزرگ علماء کی خدمت میں حاضری دی، مزمل فصیح کی کامیابی پر سربراہ ایم ڈبلیوایم علامہ راجہ ناصرعباس جعفری سمیت دیگر قائدین نے بھی مسرت کا اظہار کرتے ہوئے مبارکباد پیش کی ہے۔
