وحدت نیوز(ملتان) مجلس وحدت مسلمین پاکستان کے سربراہ علامہ راجہ ناصر عباس جعفری نے کہا ہے کہ شہید فخر عباس کے قاتلوں کو فی الفور گرفتار کیا جائے۔ ان خیالات کا اظہار اُنہوں نے ملتان میں مقتول فخر عباس کے لواحقین سے ملاقات میں کیا۔ علامہ راجہ ناصر عباس جعفری نے مقتول کے لواحقین سے اظہار افسوس اور فاتحہ خوانی بھی کی۔ اس موقع پر ایم ڈبلیو ایم کے صوبائی رہنما انجینیئر سخاوت علی، علامہ غلام مصطفی انصاری، مولانا طاہر عباس نقوی، ضلعی سیکرٹری جنرل مولانا وسیم عباس معصومی، مولانا ہادی حسین، مرزا وجاہت علی اور ارتضی نقوی سمیت دیگر موجود تھے۔
علامہ راجہ ناصر عباس جعفری نے کہا کہ ابھی تک شہید فخر عباس کے قاتلوں کو گرفتار نہیں کیا گیا جو کہ پولیس اور قانون نافذ کرنے والے اداروں کی کارکردگی پر سوالیہ نشان ہے، ملک میں بڑھتے ہوئے دہشتگردی کے واقعات تشویشناک ہیں، دہشتگردوں کے خلاف بلاتفریق کاروائی کی جائے۔ ملک میں ہونے والے دہشتگردی کے واقعات اس بات کی غمازی کرتے ہیں کہ ابھی دہشتگردی کو جڑ سے ختم نہیں کیا جا سکا۔
