وحدت نیوز(جیکب آباد) وارثان شہداء کمیٹی کے زیراہتمام شہداء سانحہ شب عاشور جیکب آباد کی چھٹی برسی کے موقع پر عظمت شہداء کانفرنس منعقد کی گئی۔کانفرنس سے مجلس وحدت مسلمین پاکستان کے مرکزی ترجمان علامہ مقصود علی ڈومکی ،ایم ڈبلیو ایم بلوچستان کے صوبائی سیکریٹری جنرل علامہ برکت علی مطہری ،علامہ مشتاق حسین عمرانی، اصغریہ آرگنائزیشن پاکستان کے ڈویژنل صدر برادر اویس جکھرانی، آئی ایس او کے رہنما برادر اللہ بخش ،صوبائی رابطہ سیکریٹری ایم ڈبلیو ایم برادر فدا عباس، ایم ڈبلیو ایم کے ضلعی رہنما اصغر علی سیٹھار، نذیر حسین جعفری، حاجی مولانا سیف علی ڈومکی ،مولانا حسن رضا غدیری، مولانا ارشاد علی سولنگی و دیگر نے خطاب کیا۔

اس موقعہ پر کانفرنس سے خطاب کرتے ہوئے علامہ مقصود علی ڈومکی نے کہا کہ حکومت وارثان شہداء شکارپور و جیکب آباد سے کئے گئے وعدوں اور معاہدے پر عملدرآمد کرے۔سندھ کے سانحہ شب عاشور جیکب آباد کا کیس ری اوپن کیا جائے اور دھشت گردوں کو سرعام پھانسی دی جائے۔ مقام تعجب ہے کہ ڈی آئی جی پریس کانفرنس کرکے دھشت گردوں کے نام اور ثبوت پیش کرتا ہے جبکہ اس کے ماتحت پولیس ایس ایچ او پی ڈی ایس پی دھشت گردوں کے سہولت کار بن جاتے ہیں۔انہوں نے چیف جسٹس سے اپیل کی کہ وہ عدالتوں سے دہشت گردوں کے با عزت بری ہونے کا نوٹس لیتے ہوئے 28 شھداء کے خون سے انصاف کریں۔