وحدت نیوز(اسلام آباد) مجلس وحدت مسلمین پاکستان کے مرکزی ڈپٹی سیکرٹری جنرل سید ناصر شیرازی نے ملک میں بڑھتی ہوئی مہنگائی پر شدید تشویش کا اظہار کیا ہے۔انہوں نے کہا کہ مہنگائی کی موجودہ صورتحال نے عام آدمی کے رہن سہن کو شدید متاثر کیا ہے۔آمدن اور اخراجات میں عدم مطابقت سے مشکلات دن بدن بڑھتی جا رہی ہیں۔اشیائے خوردونوش کی قیمتوں میں مسلسل اضافہ انتظامی معاملات پر حکومتی گرفت کے کمزور ہونے کی دلالت کرتا ہے۔

ان کاکہنا تھاکہ آٹا،چینی،گھی،ادویات اور دیگر بنیادی ضروریات زندگی کی قیمتوں میں اضافے کا سارا ملبہ سرمایہ دار طبقے پر ڈال کر حکومت خود کو بری الزمہ نہیں ٹھرا سکتی۔عوام کو سہولیات کی فراہمی ریاست کی ذمہ داری ہے۔ قیمتوں میں ہوشربا اضافے نے عام آدمی کی زندگی کو اذیت ناک بنا دیا ہے۔موجودہ حکومت نے اگر حالات پر قابو نہ پایا تو اس کی مقبولیت کا گراف غیر معمولی حد تک گر جائے گا۔

انہوں نے کہا ملک کا ہر طبقہ مہنگائی کے ہاتھوں شدید مشکل کا شکار ہے۔ موجودہ حکومت اپنی انتظامی معاملات کو بہتر بناتے ہوئے عوامی مسائل پر توجہ دے۔تمام صوبوں کی ضلعی انتظامیہ کو متحرک کیا جائے کہ وہ خوردونوش اور روزمرہ معلومات کی اشیاءکی قیمتیوں کی جانچ پرتال کے عمل میں ذمہ دارانہ کردار ادا کریں اور اگر کوئی مافیا اس میں ملوث ہے تو اسے سخت سے سخت سزا دی جائے۔