وحدت نیوز(مظفرآباد) کراچی سے کشمیر تک پوری قوم افواج پاکستان کے ساتھ کھڑی ہے، قاتلوں اور وحشیوں کے ساتھ مذاکرات کے کوئی معنی نہیں، ملک کی جغرافیائی سرحدوں کے محافظ پاک فوج اور ایف سی کے جوانوں کے بیہمانہ قتل کے بعد مذاکرات کی بات کرنے والے احمقوں کی جنت میں رہتے ہیں، آپریشن سے گورنمنٹ کی رٹ بحال ہو گی، اور ملک و دہشتگردی کے عذاب سے نجات میں خاطر خواہ مدد حاصل ہو گی ، قوم کی تاریخ میں مشکل وقت آتے رہتے ہیں، پاکستانی قوم نے ہمیشہ مشکل اور نازک حالات میں اتحاد و یکجہتی کا مظاہرہ کر کے ملک کو خطرات اور مشکلات سے نکالا ہے، وفاقی حکومت آپریشن میں کسی طرح کے پس و پیش کی گنجائش رکھے بنا دہشتگردوں کے ٹھکانوں کو نشانہ بنائے اور ان علاقوں میں مقیم نہتے عوام کی فوری محفوظ منتقلی اور قیام و طعام کے لیئے ہنگامی اقدام اٹھائے، پوری قوم کا تعاون میسر رہے گا، ان خیالات کا اظہار مجلس وحدت مسلمین آزاد جموں کشمیر کے سیکرٹری جنرل علامہ سید تصور حسین نقوی الجوادی نے اپنی رہائش گاہ پر مختلف وفود سے گفتگو کرتے ہوئے کیا ۔

انہوں نے کہا کہ حکومت پچھلے چند ماہ سے مذاکرات مذاکرات کی تسبیحات پڑھواتی رہے ہے، بعض رہنماؤں کے بیانات سے افواج پاکستان کے متعلق ناقص آراء بھی قائم کی گئیں، لیکن اب جس مرحلہ کا آغاز ہوا ہے افواج پاکستان اپنی صلاحیات سے یہ ثابت کر دے گی کہ پاک آرمی قیام امن کے لیئے دنیا کی بہترین آرمی ہے، ضرورت اس امر کی ہے کہ پوری قوم ایک آواز ہو کر افواج پاکستان کے ساتھ کھڑی ہو اور ایسی قوتوں کا سر کچلنے میں بھرپور کردار ادا کرے جو اسلام کو بدنام کرنے کی سازش میں ملوث ہیں انہوں نے کہا کہ دہشتگرد اسلام کے نام پر لوگوں کے عقائد و نظریات سے کھیل رہے ہیں، چترال اور لیلاش میں اسماعیلیوں کو دھمکیاں دینے کا واقعہ قابل مذمت ہے ، جبکہ چیف جسٹس کا ازخود نوٹس لینا حوصلہ افزا اقدام ہے، علامہ سید تصور حسین نقوی الجوادی نے کہا کہ پاکستان میں بسنے والے تمام مکاتب فکر کے مسلمانوں اور غیرمسلم پاکستانیوں کو اپنے اپنے عقائد و نظریات اور اسولوں کی روشنی میں آزادانہ زندگی گزارنے کا پورا پورا حق حاصل ہے ، کسی کو زبردستی کسی کو کافر یا مسلمان بنانے کا کوئی حق نہیں ہے، تبلیغی مشن اپنے اپنے مکتب کے لوگوں کی اصلاح احوال اور ان کے عقائد و اعمال کی پختگی کے لیئے کام کریں، اور اسلام کی عالمگیر انسانی تعلیمات کے فروغ و پرچار سے معاشرہ رشکِ ارم بن سکتا ہے۔

وحدت نیوز(لاہور) مجلس وحدت مسلمین کے زیراہتمام خانوادگان شہداء و شعبہ خواتین کی مسئولین اور مرکزی رہنماوُں کی مشترکہ پریس کانفرنس صوبائی سیکرٹریٹ نیو مسلم ٹاوُن لاہور میں ہوئی، جس میں علامہ ابوذر مہدوی، علامہ ہاشم موسوی، علامہ حسن ہمدانی، سید محمد رضا ممبر صوبائی اسمبلی مجلس وحدت مسلمین بلوچستان، محترمہ سیکنہ مہدوی، محترمہ ہما تقوی، کرنل جعفر رضا و دیگر شہداء کے لواحقین نے شرکت کی۔ پریس کانفرنس سے خطاب کرتے ہوئے ممبر بلوچستان اسمبلی مجلس وحدت مسلمین سید محمد رضا آغا نے کہا کہ وطن عزیز کو آج جن مشکلات کا سامنا ہے اس میں سے سب سے بڑا خطرہ وہ خارجی گروہ ہے جو معصوم شہریوں، افواج پاکستان، پولیس اور صحافی برادری کو بے دردی سے شہید کرکے پاکستان کی ریاست پر وار کرنے کے درپے ہیں، ایسے میں آپ صحافی برادری سمیت تمام محب وطن قوتوں کی یہ ذمہ داری ہے کہ وہ مملکت خداداد پاکستان کی نظریاتی و جغرافیائی سرحدوں کی حفاظت کیلئے میدان میں آئیں اور اس پاک سرزمین کے حقیقی محافظوں، پاک فوج اور دیگر سکیورٹی اداروں کے دست و بازو بنیں۔

ان کا کہنا تھا کہ طالبان اور طالبان مائنڈ سیٹ اپنے غیر ملکی آقائوں کے ایجنڈے پر عمل پیرا ہے، جن کا اصل ہدف دفاعی قومی اثاثے ہیں، شریعت کے نام پر عوام کو بے وقوف بنایا جا رہا ہے، طالبان کا شریعت محمدی (ص) اور اسلام سے کوئی تعلق نہیں، ہم اس فورم کے ذریعے مطالبہ کرتے ہیں کہ شہدائے پاکستان کے قاتلوں سے مذاکرات کا ڈرامہ بند کیا جائے اور ان وحشی درندوں کیخلاف بےرحمانہ آپریشن کیا جائے، پاکستان کے آئین میں دہشت گردوں سے مذاکرات کی کوئی گنجائش نہیں، قتل کا بدلہ قتل ہے اور ریاست کی ذمہ داری ہے کہ ان قاتلوں سے اپنے شہریوں اور سکیورٹی فورسز کے شہداء کا بدلہ لیں۔

مجلس وحدت مسلمین کے مرکزی رہنما علامہ ابوذر مہدوی نے کہا کہ ہم جماعت اسلامی کے امیر منور حسن کے اس بیان کی پر زور مذمت کرتے ہیں کہ جس میں انہوں نے واقعہ کربلا جو کہ اسلام کی بقا اور اہل حق کا باطل کے خلاف قیام تھا، کو اصحاب کی جنگ قرار دے کر نواسہ (ع) رسول صلی اللہ علیہ وآلہ وسلم کی توہین کی ہے۔ انہوں نے کہا کہ ہم جماعت اسلامی کے ذمہ داران سے مطالبہ کرتے ہیں کہ منور حسن کے اس بیان کی وضاحت کریں اور منور حسن صاحب خود بھی توبہ کریں اور امت مسلمہ سے غیر مشروط معافی مانگیں، کیونکہ انہوں نے مسلمانوں کیساتھ آل رسول (ع) اور خود پیغمبر خدا صلی اللہ علیہ وآلہ وسلم کا دل دکھایا ہے۔

مجلس وحدت مسلمین شعبہ خواتین کل بروز اتوار شہدائے پاکستان اور افواج پاکستان سے اظہار یکجہتی کیلئے عظیم الشان شہداء کانفرنس منعقد کریگی، جس میں ظالمان درندہ صفت دہشت گردوں کے ظلم کا نشانہ بننے والے تمام شہداء کے لواحقین کیساتھ اس میں تمام مکاتب فکر سمیت اقلیتی برادری کے لوگ بھی شریک ہونگے۔ انہوں نے کہا کہ اس کانفرنس کا مقصد پاک فوج، پاکستان کے سکیورٹی اداروں کے اہل کاروں اور شہدائے پاکستان سے اظہار یکجہتی ہے، جو مادر وطن کی حفاظت کے خاطر اپنی جانوں کا نذرانہ دے رہے ہیں اور وہ شہداء جو اپنے لہو سے اس گلستان کی آبیاری کر گئے ہیں۔

وحدت نیوز(ملتان) مجلس وحدت مسلمین پاکستان ملتان کے سیکرٹری جنرل علامہ سید اقتدار حسین نقوی نے ایک وفد کے ہمراہ مرکزی سیکرٹری جنرل علامہ راجہ ناصر عباس جعفری کی ہدایت پر گزشتہ دنوں پشاور میں دہشتگردوں کی کاروائی کے نتیجے میں شہید ہونے والے میجر جہانزیب عدنان کے والد لیفٹینٹ ریٹائرڈ کرنل نور محمد اور اُن کے بھائی سے تعزیت اور فاتحہ خوانی کی۔ مجلس وحدت مسلمین کے وفد میں علامہ سید طاہر عباس نقوی، علامہ تہذیب الحسن، محمد عباس صدیقی اور ثقلین نقوی شریک تھے۔ علامہ سید اقتدار نقوی نے شہید جہانزیب عدنان سے اظہار تعزیت کرتے ہوئے مرکزی سیکرٹری جنرل علامہ ناصر عباس جعفری کا تعزیتی پیغام پہنچایا۔ علامہ ناصر عباس جعفری نے اپنے تعزیتی پیغام میں کہا کہ شہید میجر عدنان ہماری قوم کا ایک ایسا باب تھا جس سے دشمن نہ صرف خوفزدہ تھا بلکہ شہید جہانزیب عدنان دشمن کی آنکھ کا کانٹا بن چکا تھا، شہید جہانزیب عدنان ایک نڈر، بہادر، جرآت مند اور شجاع آفیسر تھا اُن کے والدین کو جہاں تعزیت پیش کرتا ہوں وہیں مبارک باد بھی پیش کرتا ہوں کہ خداوند متعال نے آپ کے بیٹے کوشہادت جیسی عظیم نعمت سے نوازا۔

تعزیت کے موقع پر مجلس وحدت مسلمین ملتان کے سیکرٹری جنرل علامہ سیدا قتدار حسین نقوی نےشہید کے اہل خانہ سے گفتگو کر تے ہو ئے  کہا کہ مجلس وحدت مسلمین شہدائے پاکستان کے خانوادوں کے ساتھ ہے۔ جو لوگ ہمارے بے گناہ اور نہتے شہریوں، پولیس، ایف سی اور پاک فوج کے نوجوانوں کو نشانہ بناتے ہیں وہ کسی رعایت کے مستحق نہیں ہیں۔اُنہوں نے مزید کہا کہ جو لوگ ان درندہ صفت نام نہاد انسانوں سے مذاکرات کی باتیں کر رہے ہیں وہ ملک اور قوم دونوں کے دشمن ہیں۔ اس موقع پر اُنہوں نے آرمی چیف راحیل شریف سے مطالبہ کیا کہ اگر آپ کو پاکستانی عوام کے لاشے نظر نہیں آتے تو کم از کم اپنے فوجی بھائیوں کی لاشوں کو دیکھ لیں آخر کب تک ہم اپنے پیاروں کی لاشیں اُٹھاتے رہیں گے۔ آج پوری قوم آپ کے انتظار میں ہے ان حکمرانوں کے پاس قوت فیصلہ نہیں ہے خدا نہ کرے کہ کہیں عوام یہ نہ سمجھے کہ آپ میں بھی قوت فیصلہ نہیں ہے۔ اب وقت آگیا ہے ان شرپسندوں اور دہشت گردوں کے خلاف بھرپور آپریشن کیا جائے۔