وحدت نیوز (کوئٹہ) مجلس وحد ت مسلمین بلوچستان کے سیکریٹری جنرل علامہ مقصود علی ڈومکی نے کہا ہے کہ چار سدہ باچا خان یونیوورسٹی میں ملوث دھشت گردوں کی فوری گرفتاری قابل تحسین اقدام ہے، اگرملک میں ہونے والے ہر سانحے کے بعد اسی تیز رفتاری سے دھشت گردوں کا تعاقب کیا جاتا تو آج یہ ملک دھشت گردی کی آگ میں نہ جل رہا ہوتا۔ پاک فوج ملک کا مقتدر ادارہ ہے جسے دھشت گردی کے مکمل خاتمے کے لئے اپنا بھرپور کردار ادا کرنا ہوگا۔ آج کئی سال گذر جانے کے باوجود کوئٹہ کے مظلوم شہداء کے وارث ملک کے آئینی اداروں سے انصاف کی آس لگائے بیٹھے ہیں۔چھلگری، جیکب آباد اور شکارپور سمیت ملک کے طول وعرض میں بہنے والے خون ناحق کا حساب کون دے گا۔
انہوں نے کہا کہ پوری قوم کامطالبہ ہے کہ ملک بھر میں دھشت گردوں کے خلاف آپریشن ضرب عضب شروع کیا جائے۔ حکومت نیشنل ایکشن پلان میں غیر سنجیدہ ہے، اس لئے کالعدم دھشت گرد تنظیمیں آج بھی ملک بھر میں نفرت انگیز سرگرمیوں کو جاری رکھے ہوئے ہیں۔ اسلام آباد میں داعش کا سرپرست آج بھی آزاد ہے جبکہ وفاقی وزیر داخلہ ان کے وکیل صفائی نظر آتے ہیں۔ دھشت گردوں کے خلاف منافقانہ رویہ دھشت گردی کے خاتمہ میں سب سے بڑی رکاوٹ ہے۔
انہوں نے کہا کہ نائیجریا کے ممتاز انقلابی رہنماء شیخ محمد ابراہیم زکزاکی عالم اسلام کے عظیم رہنماہیں۔ جن سے دنیا بھر میں کروڑوں لوگوں کی عقیدت ہے ،نائیجریا کی اسرائیل نواز حکومت کی جانب سے ان کی بلاجواز گرفتاری پر ہمیں تشویش ہے لہذا انہیں جلد رہا کیا جائے۔
وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کہا کہ حکومت کی بد انتظامی اور ناقص پالیسوں کے باعث ارض پاک غربت، دہشت گردی اور اقتصادی بحران کے ہاتھوں یرغمال بن چکا ہے۔ امن و امان کے قیام اور عوام کو بنیادی سہولتوں کی فراہمی میں ناکامی نے حکومت کا نااہلی کا پردہ چاک کر دیا ہے۔شاہراہوں کی تعمیر سمیت ان پر وجیکٹس پر سرکاری وسائل بے دریغ لٹائے جا رہے ہیں جن میں حکومتی اراکین کا مال بکتا اور بنتا ہے۔ تعلیم ، صحت اور بیروزگاری کے خاتمے سمیت دیگر توجہ طلب امور کو دانستہ طور پر نظر انداز کیا جا رہا ہے جو نئی نسل اور پاکستانی عوام کے ساتھ بدترین بددیانتی ہے۔انہوں نے کہا کہ وفاقی دارالحکومت میں بیٹھ کر حکومتی رٹ کو سرعام چیلنج کرنے والے ملا کو بیشتر مقدمات میں ملوث ہونے کے باوجود گرفتاری میں پس و پیش دہشت گردی کے خاتمے میں حکومت کی ’’سنجیدہ کوششوں‘‘ کو سمجھنے کے لیے کافی ہے۔نیشنل ایکشن پلان کے تمام نکات پر جب تک بلاتفریق عمل نہیں ہو گا تب تک دہشت گردی کا خاتمہ ممکن نہیں۔اگر حکومت ملک میں امن کی خواہاں ہے تو قانون کے نفاذ میں کسی بھی دباو یا مصلحت کو رکاوٹ نہ بننے دے۔چیف آف آرمی سٹاف جنرل راحیل شریف کا اپنی مدت ملازمت میں توسیع نہ لینے کا فیصلہ اصولی ،دانشمندانہ اور آئین پاکستان کی پاسداری کا بہترین اظہار اور قابل تعریف ہے تاہم دہشت گردی کے خلاف جنگ میں کسی بھی قسم کی لچک کا مظاہرہ ملک کو شدید ترین خطرات سے دوچار کر سکتا ہے۔ دہشت گردی کے خلاف جنرل راحیل کی پالیسیاں تسلسل کے ساتھ جاری رہنے کی ضرورت ہے تاکہ وطن عزیز کو دہشت گردی کی لعنت سے پاک کیا جائے۔
وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری مرکزی ڈپٹی جنرل سیکرٹری علامہ امین شہیدی ، مرکزی سیکرٹری اطلاعات سید مہدی عابدی ،مسؤل مرکزی سیکرٹریٹ علامہ اصغر عسکری سمیت دیگر رہنماوں نے دنیا نیوز کے چیئرمین میاں عامر محمود کے والد محترم میاں ظہور الحق کے انتقال پر گہرے رنج و غم کا اظہار کرتے ہوئے کہا ہے کہ خاندان کے لیے یہ یقیناًایک ناقابل تلافی نقصان اور گہرا صدمہ ہے۔ قائدین نے مرحوم کی بلندی درجات اور پسماندگان کے لیے صبر جمیل کی دعا کی ہے۔
وحدت نیوز (اسلام آباد) مجلس وحدت مسلمین کے مرکزی سیکریٹری امور سیاسیات سید ناصرعباس شیرازی نے اپنے ایک بیان میں کہاہے کہ سعودی وزیر خارجہ عادل الجبیرکے بیان کو مضحکہ خیرقرار دیتے ہوئے کہا ہے کہ پاکستان درحقیقت سعودی خواہش پر ہی ایران سعودیہ تنازعہ کے حل کیلئے میدان میں اترا تھا،جس کا واضح ثبوت خود جاوید چوہدری کا وہ کالم ہے جو انہوں نے دورہ سعودیہ اور ایران کے بعد لکھا کہ سعودی حکام نے پاکستانی حکام کو کہا کہ کسی بھی صورت ایران پر یہ تاثرنہ جائے کے ہم ایران کے ساتھ تعلقات کی بہتری چاہتے ہیں ،جس کی پاکستانی حکام نے انہیں یقین دہانی بھی کروائی تھی، عادل الجبیر نے ایران پر سے اٹھنے والی پابندیوں کے بعد عالمی سطح پر ایران کی مشرق وسطیٰ میں اقتصادی میدان میں ثبات قدمی سے خوفزدہ ہوکر ثالثی کےمشن سے انکار کیااور پاکستانی ثالثی کو مسترد کرکےسعودی حکومت نے اپنے جارحانہ عزائم کا اظہار کیا ہے،سعودی حکومت یمن میں نہتے مسلمان شہریوں پر کلسٹر بموں سے بمباری کررہی ہے، جس سے خواتین، معصوم بچے اور بزرگ بے دردی سے نشانہ بن رہے ہیں ، نا چاہتے ہوئے اقوام متحدہ بھی اس بربریت پر خاموش نہ رہ سکی ہے، ناصرشیرازی کا کہنا تھا کہ سعودی حکومت عالمی مارکیٹ میں تیل کی گرتی ہوئی قیمتوں سے شدید اقتصادی بحران کا شکارہے، جس کے باعث انہیں داخلی مالیاتی بحران کا بھی سامنا ہے، سعودی حکومت ایک جانب ایران کی جانب سے مظلوموں کی حمایت اور یمن، بحرین ،شا م اور عراق میں داعش مخالف اقدامات کی مذمت کرتی ہے اور دوسری جانب داعش سے مقابلے کیلئے مسلم ممالک کا اتحاد تشکیل دیتی ہے۔
وحدت نیوز (کراچی) مجلس وحدت مسلمین کے مرکزی سیکریٹری امور تربیت علامہ احمد اقبال رضوی نے ایم ڈبلیوایم ضلع ملیرکے زیراہتمام وحدت ہاوس جعفرطیارمیں علمائے کرام کے ساتھ منعقدہ فکری نشست میں گفتگو کرتے ہوئے کہا کہ دین مبین اسلام اور تعلیمات مکتب اہل بیتؑ کی ترویج واشاعت کیلئے علمائے کرام میدان میں آئیں ، اسلام دشمن قوتیں اپنی بھرپورقوت وتوانائی کے ساتھ اسلام ناب محمدی ﷺکے خلاف تبلیغی نظام کا سہارا لے رہی ہیں ، ایسے میں ہم علماءپر بھاری ذمہ داری عائد ہوتی ہےکہ سادہ لوح مسلمانوں کو تکفیری عناصرکے سازشی ہتھکنڈوں سے بچانے میں اپنا عملی کردار اداکریں ، انہوں نے موجود علمائے کرام پر زور دیا کہ وہ اپنی اپنی تنظیمی وابستگی کے باوجود ایک قومی تبلیغی نظام کی تشکیل میں مجلس وحدت مسلمین کا ساتھ دیں ،نشست میں ایم ڈبلیوایم کے ڈویژنل اور ضلعی رہنمائوں سمیت مولانا محمد علی جوہر، مولانا اشعرزیدی، مولانا محمد حسین مطہری، مولانا عدنان حسین، مولاناع غ کراروی، مولانا ذاکرحسین اوردیگر بھی موجود تھے۔
وحدت نیوز (اسلام آباد) مجلس وحدت مسلمین کے سربراہ علامہ ناصر عباس جعفری کی زیرصدارت ایم ڈبلیو ایم گلگت بلتستان کی سیاسی کونسل کا اہم اجلاس اسلام آباد میں ہوا، جس میں بلدیاتی الیکشن، اقتصادی راہداری منصوبہ اور خطے کے آئینی حقوق سے متعلق امور کا جائزہ لیا گیا۔ اجلاس میں ایم ڈبلیو ایم کے ڈپٹی سیکرٹری جنرل علامہ محمد امین شہیدی، سیکرٹری جنرل گلگت بلتسان آغا علی رضوی، گلگت بلتستان اسمبلی کے رکن کاچو امتیار حیدر، رضوان علی، بی بی سلیمہ ، رکن شوریٰ عالی ڈاکٹر علی گوہر، غلام عباس، محمد علی، محمد عیسٰی ایڈووکیٹ، اسد عباس نقوی اور کوآرڈینیٹر شعبہ سیاسیات آصف رضا نے شرکت کی۔
اجلاس میں اقتصادی راہداری منصوبے سے متعلق معلومات اکٹھی کرنے کیلئے خصوصی کمیٹی بنانے کا فیصلہ کیا گیا، یہ کمیٹی وزیراعلٰی گلگت بلتستان اور متعلقہ سرکاری افسران سے ملاقات کرکے معلومات اکٹھی کرے گی۔ یہ کمیٹی جانے گی کہ اقصادی راہداری منصوبے کی تفصیلات کیا ہیں اور اس منصوبے میں گلگت بلتستان کو کیا دیا جا رہا ہے۔ کمیٹی میں گلگت بلتستان قانون ساز اسمبلی کے ارکان حاجی رضوان اور امتیاز حیدر سمیت کاظم سلیم، محمد علی اور غلام عباس شامل ہیں۔
اجلاس میں فیصلہ کیا گیا کہ خطے کے آئینی حقوق اور اقتصادی راہداری سے متعلق معاملات میں عوامی ایکشن کمیٹی کا بھرپور ساتھ دیا جائیگا اور آئینی حقوق سے کسی صورت پیچھے نہیں ہٹا جائیگا۔ اجلاس میں ایم ڈبلیو ایم کی سیاسی کونسل نے گلگت بلتستان کی آئینی صورتحال کا حل بھی پیش کیا اور کہا کہ مرکزی حکومت اقوام متحدہ کے فیصلے تک گلگت بلتسان کو خود مختار صوبہ بنا دے، جب اقوام متحدہ کی سطح پر کوئی فیصلہ آجائے تو اس فیصلہ کی روشنی میں عمل کیا جائے۔ اجلاس میں گلگت بلتستان بلدیاتی الیکشن میں بھرپور حصہ لینے کا اعلان کیا گیا اور فیصلہ کیا گیا کہ علاقائی سطح پر اسلامی تحریک کے ساتھ سیاسی اتحاد کو ترجیح دی جائے گی۔
