وحدت نیوز(مانٹرنگ ڈیسک)قائد شہید کے گاوں پیواڑ سے تعلق رکھنے والے مجاہد عالم دین کا اسلام ٹائمز کے ساتھ خصوصی انٹرویو میں کہنا تھا کہ ریاستی لبادے میں یہ بربریت پہلی بار نہیں ہے، پاراچنار شروع دن سے ریاستی دہشت گردی کا شکار رہا ہے، بارہا ہم وہاں موجود تھے، خود دیکھا کہ انہی ایف سی والوں نے ہم پر گولیاں چلائیں، سینکڑوں افراد زخمی ہوئے، دسیوں افراد شہید ہوئے، لیکن اس کے باوجود ہم نے صبر و تحمل کا مظاہرہ کیا، دو ماہ قبل ہمیں طالبان اور داعش کے آنے کی دھمکیاں دی گئیں اور حکومت کی طرف سے کہا گیا کہ فلاں گاوں کو خالی کرو، داعش آنے والے ہیں، ہم بے بس ہیں۔
 
مجلس علمائے اہل بیت (ع) کے راہنما حجۃ الاسلام مولانا ہلال حسین طوری کا تعلق قائد شہید کے گاوں پیواڑ پاراچنار سے ہے۔ قائد شہید علامہ عارف حسین الحسینی کی ہمسائیگی کو باعث فخر سمجھتے ہیں۔ ان دنوں قم المقدسہ میں مدرسہ امام خمینی (رہ) سے دینی تعلیم حاصل کر رہے ہیں۔ اسلام ٹائمز نے قائد شہید علامہ عارف حسین الحسینی کے افکار اور موجودہ تشیع تحریکوں کے بارے میں مولانا ہلال طوری کی رائے جاننے کی کوشش کی، جس کا احوال پیش خدمت ہے۔ ادارہ

اسلام ٹائمز: آپ نے قائد شہید کو قریب سے دیکھا، نئی نسل کیلئے قائد شہید کی زندگی نمونہ عمل ہے، کیا بیان کرنا چاہیں گے۔؟
مولانا ہلال حسین طوری: ہم نے قائد شہید کو قریب سے دیکھا تھا، قائد شہید کے افکار سب کے سامنے ہیں، قائد شہید اتحاد امت کے سب سے پہلے داعی تھے، اتحاد بین المومنین و اتحاد بین المسلمین، وہ جہاں بھی جاتے تھے "وَاعْتَصِمُواْ بِحَبْلِ اللّهِ جَمِيعًا وَلاَ تَفَرَّقُواْ" کے مصداق اتم بن جاتے تھے اور وہ لوگ جو دور ہوتے، وہ بھی نزدیک آجاتے۔ قائد شہید نے کبھی بھی یہ نہیں کہا، یہ پٹھان ہے، یہ پنجابی ہے، یہ گلگتی ہے، یہ بلوچ ہے، ہر وقت کہا کرتے تھے کہ ہمیں یہ نہیں کہنا چاہیے کہ یہ فلاں فلاں ہے، ہم ایک ہیں، حتیٰ کہ شیعہ سنی کے معاملہ میں بھی اتحاد کے قائل تھے، کسی نے قائد شہید سے پوچھا کہ آپ ہر وقت کہتے ہیں اتحاد اتحاد تو آپ کا اتحاد سے مقصد کیا ہے، قائد شہید نے فرمایا اتحاد سے میری مراد یہ نہیں کہ شیعہ سنی ہوجائے اور سنی شیعہ ہو جائے بلکہ میری مراد یہ ہے کہ ایک دوسرے کو برداشت کریں، ایک دوسرے کو تحمل کریں اور دشمن کے خلاف باہم ایک ہو جائیں۔

اسلام ٹائمز: قائد شہید کی آرزو تھی کہ پیروان ولایت باہم متحد ہوں، اسی طرح آیت اللہ اختری نے بھی اسی درد دل کا اظہار کیا کہ شیعہ قوم یکجا ہوجائے، شیعہ ووٹ بینک کو تقسیم نہ کیا جائے، آپ اس حوالے سے کیا رائے رکھتے ہیں۔؟
مولانا ہلال حسین طوری: قائد شہید کی ہر وقت یہ کوشش رہتی تھی کہ سب ایک ہوں، اگرچہ تنظیمیں تحریکیں مختلف ہوں، مسئلہ نہیں ہے، لیکن وہ ایک نقطہ پر جمع ہوسکیں۔ پاکستان کے اہل تشیع کے لئے آج وہ وقت آچکا ہے کہ وہ باہم متحد ہوجائیں اور قائد شہید کی امیدوں کو پورا کریں، آج ایک شخص جسے ناصر ملت کہیں یا قائد ملت کہیں، میدان میں آچکا ہے، سب اہل تشیع ملکر اس کا ساتھ دیں، اس تحریک پر لبیک کہہ دیں، ہمارے لئے یہ ایک اہم موقع ہے، دشمن کو بہانہ نہ دیں، دشمن کو میدان میں داخل نہ ہونے دیں، اس تحریک کے بعد جو افراد راجہ ناصر سے دور تھے وہ بھی نزدیک آچکے ہیں۔ ہماری خوش قسمتی ہے کہ راجہ ناصر کی بدولت شیعہ اور معتدل سنی بیدار ہوچکے ہیں اور راجہ ناصر کا ساتھ دے رہے ہیں۔ لیکن وہ افراد جو ابھی تک خاموش ہیں، ہمارے بزرگان ہوں یا ہم جیسے چھوٹے ہوں، ان سے بھی التماس ہے کہ اللہ کی خاطر، امام زمانہ (عجل) کی خاطر، قائد شہید علامہ عارف حسین الحسینی کی خاطر اور دیگر شہداء کے ورثا کی خاطر، سب مل کر راجہ صاحب کی اس تحریک میں شامل ہوں اور اس کی حمایت کریں۔

اسلام ٹائمز: ہم دیکھتے ہیں کہ پارا چنار کو مسلسل ریاستی بربریت کا نشانہ بنایا جاتا ہے، کبھی وہاں بیرونی لشکر حملہ آور ہوتے ہیں تو کبھی راستے بند کر دیئے جاتے ہیں، اس مرتبہ بھی پیروان ولایت پر ظلم کے پہاڑ توڑے گئے، قیمتی جانیں ریاستی دہشت گردی کا نشانہ بنیں، کیا کہنا چاہیں گے۔؟
مولانا ہلال حسین طوری: ریاستی لبادے میں یہ بربریت پہلی بار نہیں ہے، پاراچنار شروع دن سے ریاستی دہشت گردی کا شکار رہا ہے، بارہا ہم وہاں موجود تھے، خود دیکھا کہ انہی ایف سی والوں نے ہم پر گولیاں چلائیں، سینکڑوں افراد زخمی ہوئے، دسیوں افراد شہید ہوئے، لیکن اس کے باوجود ہم نے صبر و تحمل کا مظاہرہ کیا، دو ماہ قبل ہمیں طالبان اور داعش کے آنے کی دھمکیاں دی گئیں اور حکومت کی طرف سے کہا گیا کہ فلاں گاوں کو خالی کرو، داعش آنے والے ہیں، ہم بے بس ہیں، سوال یہ ہے کہ پاک آرمی جو پوری دنیا میں مشہور ہے، ہمیں اپنی آرمی پر ناز ہے، اگر وہ یہ کہہ کر چلے جائیں کہ شیعہ یہ گاوں خالی کر دیں، داعش آرہی ہے، یا اپنا دفاع خود کر لیں، ہم دفاع نہیں کرسکتے، تو یہ میرے خیال میں ایک کھیل ہے، یہ ایک منصوبہ ہے، جس کے تحت شیعوں کو کمزور کیا جا رہا ہے، تاکہ یہ اپنے ناپاک عزائم تک پہنچ سکیں۔

اسلام ٹائمز: شیعہ قوم کے جاری قتل عام کیخلاف علامہ راجہ ناصر عباس جعفری آج دو ہفتوں سے بھوک ہڑتال جاری رکھے ہوئے ہیں، کیا اثرات مرتب ہوتے دیکھتے ہیں۔؟
مولانا ہلال حسین طوری: اس اقدام کی شروع دن سے ہم نے حمایت کی ہے اور آخری دم تک حمایت کریں گے، ہم آمادہ ہیں، اگر آقا صاحب حکم دے دیں تو قم المقدسہ میں یا سفارت کے سامنے احتجاج کریں گے، اگر خروجیہ ہمیں نہ ملے تو بھی ہم نکلیں گے، اپنا اقامہ خراب کر دیں گے، اسلام آباد تک پہنچیں گے اور بھوک ہڑتال میں شریک ہو جائیں گے اور آخری دم تک وہاں بیٹھیں گے، جیسے آقا صاحب نے کہا کہ میرے بعد میرا بیٹا ہوگا، تو ہم کہتے ہیں کہ آقا صاحب آپ اکیلے نہیں ہیں، آپ کے بیٹے نہیں بلکہ آپ کے شاگرد پہلے اپنی جانیں قربان کریں گے۔

وحدت نیوز (بہاولپور) مجلس وحدت مسلمین ضلع بہاولپور کے سابق سیکرٹری جنرل اور جنوبی پنجاب کے فعال شیعہ رہنما سید انتظار حسین نقوی بہاولپور میں سپردخاک کر دیئے گئے، مرحوم گذشتہ روز ہارٹ اٹیک کے باعث انتقال کر گئے تھے۔ مرحوم کی نماز جنازہ مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی کی اقتداء میں ادا کی گئی۔ نماز جنازہ میں ہزاروں افراد نے شرکت کی۔ مرحوم نے پسماندگان میں ایک بیٹا، تین بیٹیاں اور ایک بیواہ چھوڑی ہے۔ سید انتظار حسین نقوی کے انتقال پر ایم ڈبلیو ایم پاکستان کے مرکزی ڈپٹی سیکرٹری جنرل علامہ سید احمد اقبال رضوی نے مرحوم کے لواحقین سے ٹیلی فونک تعزیت کی اور مرحوم کی بلندی درجات کے لئے دعا کی۔ نماز جنازہ میں مجلس وحدت مسلمین ملتان کے سیکرٹری جنرل علامہ قاضی نادر حسین علوی، ڈپٹی سیکرٹری جنرل سلیم عباس صدیقی، خواجہ مرید حسین، ایم ڈبلیو ایم بہاولپور کے سیکرٹری جنرل سید اظہر حسین نقوی اور دیگر نے شرکت کی۔

وحدت نیوز (کوئٹہ) مجلس وحدت مسلمین کوئٹہ ڈویژن کے میڈیا سیل سے جاری شدہ بیان کے مطابق ایم پی اے آغا رضا نے تعلیم میں طلباء کی دلچسپی بڑھانے کیلئے یہ اعلان کیا کہ میٹرک سے لے کر پی ایچ ڈی تک پی بی2 کے وہ طلباء جو پورے صوبے میں پہلی، دوسری یا تیسری پوزیشن حاصل کریں گے، انہیں ایم پی اے آغا رضا کی جانب سے دو لاکھ روپے انعام دیئے جائیں گے، طلباء کی حوصلہ افزائی کیلئے ہر ممکن کوشش کریں گے۔ انہوں نے کسی بھی ملک میں تعلیم کو ترقی کی راہ قرار دیتے ہوئے کہا ہے کہ تعلیم ایک روشنی کی مانند ہے جو ساری دنیا کو روشن کردیتا ہے اور تعلیم یافتہ شخص کی مثال شمع کی طرح ہے، ہمیں آج جن دشواریوں کا سامنا ہے ان کی بنیادی وجہ تعلیم سے محرومی اور تعلیمی میدان میں پسماندگی ہے، دور جدید میں ترقی یافتہ اقوام کے صف میں کھڑے ہونے کیلئے ٹیکنالوجی اور علم کا حصول وقت کی اہم ترین ضرورت ہے۔ انہوں نے کہا کہ تعلیمی میدان میں ترقی کا واسطہ ہماری دلچسپی سے ہوتا ہے، لہٰذا طلباء کے تعلیم میں دلچسپی بے مثال کامیابی کی ضمانت دے سکتی ہے۔ ان خیالات کا اظہار انہوں نے طلباء کے ایک وفد سے گفتگو کے دوران کیا ،انہوں نے مزید کہا کہ اسلام میں تعلیم کی اہمیت کا اندازہ اسی بات سے لگایا جا سکتا ہے کہ قرآن پاک کی پہلی آیت میں اللہ تعالیٰ نے انسان کو ان کے نام سے پڑھنے کا حکم دیا، علم کا حصول معاشرے کے ہر فرد کیلئے ضروری ہے ۔ طلباء کی تعلیم اور اضافی سرگرمیوں میں دلچسپی قابل تحسین ہے اور اسی طریقے سے وہ اپنے پوشیدہ ہنر کو بروئے کار لاکر ملک و قوم کو فائدہ پہنچا سکتے ہیں ، علم سے محبت ہمیں ترقی کے پٹری پر لا سکتی ہے۔ اس وقت اساتذہ، سماجی اداروں اور حکومت کی ذمہ داری بنتی ہے کہ وہ طلباء کی حوصلہ افزائی کرے، مختلف تقریری مقابلوں ، کھیلوں اور دیگر غیرنصابی سرگرمیوں کا انعقاد کریں۔ جن قوموں کو طالب علم کے قدر کا اندازہ ہے اور جنہیں معلوم ہے کہ انکی بقاء کا واحد ذریعہ تعلیم ہے وہی اقوام کامیاب رہے ہیں۔ انہوں نے مزید کہا کہ آج کے جدید دور میں تمام تر معلومات طلباء کے دسترس میں ہیں، جدید آلات اور مشینوں سے کسی بھی قسم کے معلومات کو منٹوں میں حاصل کیا جا سکتا ہے، طلباء کو چاہئے کہ ان سہولیات کا مثبت استعمال کر کے ان سے مستفید ہو۔ بیان کے آخر میں کہا گیا کہ ایک طالب علم پر لازم ہے کہ وہ اپنی تعلیمی جدوجہد جاری رکھتے ہوئے ملکی ترقی میں اپنا کردار ادا کرے۔

وحدت نیوز(فیصل آباد) مجلس وحدت مسلمین پاکستان کے صوبائی سیکرٹری جنرل علامہ اصغر عسکری نے فیصل آباد میں عوامی رابطہ مہم کے سلسلہ میں دورہ کیا اور نومنتخب سیکرٹری جنرل علامہ احسان علی جعفری سیمیت فیصل آباد کے عمائدین ، بانیانِ مجالس سے ملاقات کی اور قائد وحدت علامہ راجہ ناصر عبا س جعفری کا پیغام پہنچایا ۔

انہوں نے مزید کہا کہ پنجاب حکومت اور با لخصوص چنیوٹ انتظامیہ کا متعصبانہ رویہ قابل مزمت ہے ۔ پر امن احتجاج ہر شہری کا حق ہے مگر چنیوٹ کے متعصب DPOنے مجلس وحدت مسلمین ضلع چنیوٹ کے عمائدین پر بھوک ہڑتال کیمپ لگانے پر دھشت گردی کی دفعات کے تحت مقدمہ بناکر ملک و عوام دشمنی کا ثبوت دیا ہے ۔ انہوں نے مزید کہا کہ اب حکومتی مظالم نا انصافیوں اور متعصبانہ رویوں کے خلاف پوری قوم کو نکلنا ہو گا ۔ انہوں نے تمام طبقات سول سوسائٹی ، ہیومن رائٹس سمیت تمام انسانیت کے علمبردار وں کو دعوت دی ہے کہ مظلومین کی آواز سے ہم آواز ہو کر اپنی اجتماعی ذمہ داری کا ثبوت دیں ۔

وحدت نیوز (کراچی) ملک بھر میں جاری فرقہ وارانہ ٹارگٹ کلنگ سمیت شیعہ حقوق کی پائمالی کے خلاف اسلام آباد میں جاری علامہ راجہ ناصر عباس جعفری کی بھوک ہڑتال کی حمایت میں ایم ڈبلیو ایم کراچی ڈویژن کی جانب سے نمائش چورنگی پر قائم علامتی بھوک ہڑتالی کیمپ کے گیارہویں روز مجلس وحدت کے مرکزی رہنما علامہ باقر عباس زیدی، صوبائی پولٹیکل سیکرٹری علی حسین نقوی ، سیکرٹری جنرل کراچی میثم عابدی، علامہ مبشر حسن ، علامہ علی انور جعفری ،علامہ صادق جعفری ،علامہ احسان دانش، ڈاکٹر مدثر حسین سمیت کارکنان کی بڑی تعداد نے علامہ راجہ ناصر عباس جعفری سے اظہار یکجہتی کیلئے علامتی بھوک ہڑتال کر کے اپنا احتجاج ریکارڈ کروایا۔ اس موقع پر میڈیا سے گفتگو کرتے ہوئے ایم ڈبلیو ایم کراچی کے نو منتخب سیکریٹری جنرل میثم عابدی نے کہا کہ اس احتجاجی کیمپ کا مقصد ملک میں دہشتگردوں کی بربریت کا نشانہ بننے والی بے گناہ عوام کے خانوادوں سے اظہار یکجہتی اور ملک خداداد میں جاری دہشتگردی اور کالعدم جماعتوں کے بڑھتے ہوئے نفوذ اور ان کے سہولت کاروں کے خلاف حکومتی و ریاستی اداروں کی مجر مانہ خاموشی پر اپنا مؤثر پُرامن احتجاج ریکارڈ کر وانا ہے۔ انہوں نے کہا کہ ایسا لگتا ہے کے ملک میں دوبارہ طالبان دہشتگردوں اور ان کی بغل بچہ کالعدم جماعتوں کو فری ہینڈ دیا جا رہا ہے اور پھر سے پروفیشنلز کو ٹارگٹ کلنگ کا نشانہ بنا کر قومی نقصان کیا جا رہا ہے، اس صورتحال پر تمام محب وطن عوام انتہائی تشویش کا شکار ہیں۔

رہنما ایم ڈبلیو ایم نے کہا کہ علامہ راجہ ناصر عباس کی سربراہی میں ایم ڈبلیو ایم کی احتجاجی تحریک صرف شیعہ سنی مسلمانوں کیلئے ہی نہیں بلکہ تمام محب وطن اقلیت برادری کیلئے بھی ہے، ہم نہیں چاہتے ہیں کسی بھی مکتب کی آزادیاں سلب کی جائیں، ہر مکتبہ فکر کو آزادی ہونی چاہیئے کہ وہ اپنی عبادات بجا لاسکیں، انہیں بھی پاکستانی کی حیثیت سے یکساں شہری حقوق حاصل ہوں۔ انہوں نے مزید کہا کہ ہم اس ملک کو مسلکی پاکستان نہیں بننے دیں گے، پاکستان کے لوگوں کو قائد و اقبال کا پاکستان چاہیے۔ انہوں نے کہا کہ ملک بھر میں ایک طرف خاص طور پر اہل تشیع مسلمانوں کی ٹارگٹ کلنگ جاری ہے جبکہ دوسری جانب عزاداری سیدالشہداء پر قدغن لگائی جا رہی ہے، ملک بھر میں ہزاروں بانیان مجالس اور ذاکرین کیخلاف مقدمے درج کر لئے گئے ہیں، جو کام دہشتگرد نہیں انجام دے سکے، وہ نواز حکومت پنجاب سمیت ملک بھر میں نیشنل ایکشن پلان کے نام پر انجام دینا چاہتی ہے،آج ظلم کے خلاف آواز بلند کرنے والے محب وطن طبقے کو دانستہ طور پر دہشتگردوں کے رحم و کرم پر چھوڑ دیا گیا تاکہ انہیں ظالم حکمرانوں کے خلاف آواز بلند کرنے کا موقع نہ مل سکے، لیکن ہم محب وطن اہل تشیع مسلمان پاکستانی ہر حال میں اس صورتحال کا راستہ روکیں گے۔

وحدت نیوز (کراچی) مجلس وحدت مسلمین کراچی کے رہنما علامہ علی انو ر جعفری علامہ مبشر حسن اور میثم عابدی نے کہا ہے کہ ملک بھر سے محب وطن عوام حکومتی و ریاستی اداروں کی مجر مانہ خاموشی کے خلاف علامہ راجہ ناصر عباس کی احتجاجی بھوک ہڑتال سے اظہار یکجہتی کرکے انکی آواز پر لبیک کہہ رہے ہیں، وہ وقت دور نہیں جب عوام کا ہاتھ خائن ذمہ داران کے گریبانوں پر ہوگا، وزیراعلیٰ سندھ کے آبائی حلقے خیرپور میں کالعدم دہشتگرد تنظیم کو کھلے عام جلسے کی اجازت دینا نیشنل ایکشن پلان اور آپریشن ضرب عضب کی دھجیاں اڑانے کے مترادف ہے۔ ان خیالات کا اظہار انہوں نے ملک بھر میں جاری فرقہ وارانہ ٹارگٹ کلنگ سمیت شیعہ حقوق کی پائمالی کیخلاف اسلام آباد میں جاری علامہ راجہ ناصر عباس جعفری کی بھوک ہڑتال کی حمایت میں ایم ڈبلیو ایم کراچی کی جانب سے نمائش چورنگی پر قائم علامتی بھوک ہڑتالی کیمپ کے بارہویں روز خطاب کرتے ہوئے کیا۔ اس موقع پر مولانا علی انور،علامہ مبشر حسن ، میثم عابدی سمیت کارکنان کی بڑی تعداد نے علامہ راجہ ناصر عباس جعفری سے اظہار یکجہتی کیلئے علامتی بھوک ہڑتال کر کے اپنا احتجاج ریکارڈ کروایا۔

رہنماؤں کا کہنا تھا کہ علامہ راجہ ناصر عباس جعفری کی سربراہی میں محب وطب اہل تشیع مسلمانوں نے ہمیشہ وحدت اسلامی اور اخوت و بھائی چارے کو فروغ دیا ہے،اسی لئے حکومتی و ریاستی اداروں کی مجر مانہ خاموشی کے خلاف جاری پُرامن احتجاج اور بھوک ہڑتال بھی ہر مظلوم طبقے کی آواز بن چکی ہے، اور ملک بھر سے محب وطن عوام و خواص علامہ راجہ ناصر عباس کی احتجاجی بھوک ہڑتال سے اظہار یکجہتی کرکے انکی آواز پر لبیک کہہ رہے ہیں، وہ وقت دور نہیں جب عوام کا ہاتھ خائن ذمہ داران کے گریبانوں پر ہوگا۔ رہنماؤں نے کہا کہ کراچی، ڈیرہ اسماعیل خان، پشاور سمیت ملک بھر میں اہل تشیع پروفیشنل افراد سمیت بے گناہوں کا قتل ملک و قوم کے خلاف گھناؤنی سازش ہے، اس سازش میں ملوث دہشتگرد عناصر کو کھلی چھوٹ دیکر حکمران طبقہ و ریاستی اداروں میں موجود کالی بھیڑیں سہولت کار کا کردار ادا کر رہے ہیں، جس پر تمام محب وطن طبقات انتہائی تشویش کا شکار ہیں، اگر ملک میں بے گناہ شہریوں کے قتل عام اور حکومت پاکستان کی مجرمانہ خاموشی کا نوٹس نہ لیا گیا اور دہشتگرد عناصر اور انکے سیاسی و مذہبی سہولت کاروں کو گرفتار کر کے کیفر کردار تک نہ پہنچایا گیا تو عوام ملک بھر میں ہر سطح پر احتجاجی تحریک چلانے پر مجبور ہو جائینگے۔

رہنماؤں نے پیپلز پارٹی کی سندھ حکومت کو تنقید کا نشانہ بناتے ہوئے کہا کہ ایک طرف تو پیپلزپارٹی دہشتگردوں سے اعلان برأت کرتی نظر آتی ہے، لیکن دوسری طرف وزیراعلیٰ سندھ کے آبائی حلقے خیرپور میں کالعدم دہشتگرد تنظیم کو کھلے عام جلسے کی اجازت دے دی گئے، جو کہ نیشنل ایکشن پلان اور آپریشن ضرب عضب کی دھجیاں اڑانے کے مترادف ہے، خیرپور، کراچی سمیت سندھ بھر میں کالعدم دہشتگرد تنظیموں کی کھلے عام فعالیت اس بات کا ثبوت ہے کہ یہ تو سندھ حکومت اپنے اقتدار کی خاطر دہشتگرد عناصر سے ساز باز کر چکی ہے، جیسا کہ اس نے گذشتہ بلدیاتی انتخابات کے موقع پر کیا تھا، یا پھر وہ ملک دشمن دہشتگرد عناصر کے سامنے بالکل بے بس ہو چکی، اس صورت میں سندھ حکومت کو اقتدار میں رہنے کا کوئی حق نہیں، لہٰذا یا تو سندھ حکومت صوبے بھر میں دہشتگرد عناصر کے خلاف فی الفور کارروائی کرکے انہیں لگام دے یا پھر اپنے خلاف بھرپور عوامی تحریک کیلئے تیار ہوجائے۔