وحدت نیوز (مطفرآباد) سینئر نائب صدر پی وائی او ارسلان شاہ عہدے سے مستعفی ہو کر مجلس وحدت مسلمین میں شامل ، مجلس وحدت مسلمین میں شمولیت کا فیصلہ کارکنان سے مشاورت کے بعد کیا ، سید ارسلان شاہ نے اس بات کا اعلان مجلس وحدت مسلمین آزاد کشمیر کے ریاستی سیکرٹری جنرل علامہ سید تصور حسین نقوی الجوادی اور سیکرٹری سیاسیات سید محسن رضا سبزواری ایڈووکیٹ سے ملاقات کے دوران کیا ، انہوں نے کہا کہ پیپلز پارٹی کی حکومت نے پانچ سالوں کے دوران نظریاتی کارکنان کو نظر انداز کیا ، مجلس وحدت مسلمین خدمت خلق کا منشور رکھتی ہے ، اس جماعت میں شمولیت کا فیصلہ اصولی ہے ، سیاست عوام الناس کی خدمت کے لیے کرنی ہے ، مجلس وحدت سے بہتر کوئی پلیٹ فارم نہیں کہ جو عملی طور پر مظلوموں و محروموں کے حقوق کے لیے عملی جدوجہد کرے ، آمدہ الیکشن میں مجلس وحدت مسلمین کا کردار انتہائی اہم ہو گا ، کرپشن کے خاتمے ، مسئلہ کشمیر اجاگر کرنے ، تمام شہریوں کو برابری کی بنیاد پر بنیادی سہولیات، صحت و تعلیم ، میرٹ کی بحالی ، انفراسٹریکچر کی بہتری ، سیاحت کے فروغ ، جبگلات کے تحفظ اور کشمیری عوام کی خوشحالی کا مشن لیکر میدان میں اتری ہے ، ایسا مشن کہ جو سیاست کے ساتھ ساتھ عوام الناس کی خدمت کا بھی ہے ، اس مشن کی تکمیل کے لیے حلقہ تین سٹی میں بھرپور کوشش کی جائے گی ۔

وحدت نیوز(لیہ) مجلس وحدت مسلمین صوبہ جنوبی پنجاب کے رہنماء سید عدیل عباس زیدی کا کہنا ہے کہ لانگ مارچ کی تیاریاں شروع کردی گئی ہیں، انشاء اللہ لاکھوں افراد جنوبی پنجاب سے عید الفطر کے بعد اسلام آباد کا رخ کریں گے، ان خیالات کا اظہار انہوں نے عوام رابطہ مہم کے سلسلہ میں ضلع لیہ کے علاقہ فتح پور میں ایک کارنر میٹنگ سے خطاب کرتے ہوئے کیا۔ ان کا کہنا تھا کہ ملک کے دیگر علاقوں کی طرح جنوبی پنجاب میں بھی لانگ مارچ کے حوالے سے عوام رابطہ مہم کا آغاز کردیا گیا ہے، اگر حکمرانوں نے علامہ راجہ ناصر عباس جعفری کے مطالبات تسلیم نہ کئے تو عید کے بعد جنوبی پنجاب کے ہر ضلع، شہر، گاوں اور قصبہ سے عوام کا سیلاب نکلے گا، انہوں نے مزید کہا کہ جنوبی پنجاب کے دیگر اضلاع میں بھی عوام رابطہ مہم کا آغاز کردیا گیا ہے، لانگ مارچ تاریخی ہوگا، اور ملت تشیع اپنی وحدت کے ذریعے کامیاب ہوگی۔

وحدت نیوز(قم) جامعۃ المصطفیٰ العالمیہ کے سربراہ اور امام جمعہ قم المقدسہ آیت اللہ علی رضااعرافی نے گذشتہ دنوں حرم مطہرحضرت معصومہؑ قم میں خطبہ جمعہ سے خطاب کرتے ہوئے کہا کہ پاکستان میں ان گذشتہ دہشت گردانہ کاروائیوں خصوصیت سے شیعیان پاکستان کے حوالے سے حادثات رونما ہوئے اور ان کے خلاف جس عالم بزرگوار (آقائے الشیخ ناصرعباس الجعفری)نے بھوک ہڑتال کااعلان کیا ہے اس کی ہم حمایت کرتے ہیں، ہم حکومت پاکستان اور اس ملک عزیز کی فوج سے امید کرتے ہیں کہ وہ ان دہشت گردانہ کاروائیوں کے خلاف بنیادی اقدامات اٹھائینگے۔

وحدت نیوز(اسلام آباد) ملک کے ممتاز ذاکرین نے علامہ راجہ ناصر عباس جعفری سے احتجاجی کیمپ میں ملاقات کی اور اس عوامی تحریک میں بھرپور ساتھ دینے کا اعلان کر دیا ہے۔ ذاکرین نے متفقہ طور پر کہا کہ علامہ ناصر عباس کی جدوجہد ملت تشیع کے حقوق اور وطن عزیز کے استحکام کے لیے ہے اور وہ اس جد وجہد میں مجلس وحدت مسلمین کے شانہ بشانہ کھڑے ہیں۔ ذاکرین کے نمائندہ وفد میں بزرگ ذاکر مقبول حسین ڈھکو، سید ضرغام حسین شاہ آف جھنگ، ذاکر محمد عباس قمی آف لاہور، نامور شاعر و ذاکر اہل بیت شوکت رضا شوکت، ذاکر شفقت محسن کاظمی آف گجرات، ذاکر منور حسین غدیری، ذاکر علی عباس علوی چونیاں، ذاکر علی عمران جعفری شیخوپورہ، ذاکر مرتضی قنبر شیخو پورہ، ذاکر انیس رضا قنبر، ذاکر اظہر حسین نیر، ذاکر علی سلمان جعفری اور ذاکر ملازم حسین لاہور سمیت دیگر ذاکرین بھی موجود تھے۔

اس موقع پر علامہ ناصر عباس دوٹوک انداز میں کہا ہے کہ ہم اپنے اصولی موقف سے ایک انچ بھی پیچھے نہیں ہٹیں گے اور نہ ہی مطالبات کی کسی شق سے دستبردار ہونا قابل قبول ہے۔ پارا چنار میں پرامن احتجاج پر ایف سی کی طرف سے گولیاں چلانے والے واقعہ کی تحقیقات کے لیے کمیشن کے قیام سے لے کر ملک میں دہشت گردوں کے خلاف بھرپور آپریشن اور نیشنل ایکشن پلان کی روح کی مطابق نفاذ تک ہمارا احتجاج ختم نہیں ہو گا۔ ہماری جدوجہد پُرامن پاکستان کے لیے ہے جہاں ہر شخص کو آئین کے مطابق مذہبی آزادی اور بنیادی حقوق حاصل ہوں۔ انہوں نے کہا کہ نون لیگ کی حکومت نے ملت تشیع کے ساتھ ہمیشہ امتیازی سلوک روا رکھا۔ پاکستان کے اہل تشیع نہ صرف دہشت گردی کا شکار ہیں بلکہ حکومتی مظالم نے بھی ان کے لیے زندگی اجیرن کر رکھی ہے۔ شہریوں کے جان و مال کے تحفظ کو یقینی بنانا ریاست کی اولین ذمہ داری ہے۔

علامہ ناصر عباس کا کہنا تھا کہ ملک بھر میں دندناتے ہوئے دہشت گرد امن و سکون کے قیام میں موجودہ حکومت کی ناکامی کی بین دلیل ہے۔ نیشنل ایکشن پلان کو دہشت گردی کے تدارک کی بجائے سیاسی انتقام کے لیے استعمال کیا جا رہا ہے۔ دہشت گردوں یا ان کے سہولت کاروں کے ساتھ کسی بھی جگہ نرمی کا مظاہرہ کرنا پاکستان کے اسی ہزار شہدا کے خون سے غداری ہے۔ انہوں نے کہا کہ لانگ مارچ کا اعلان حکومتی بےحسی کی وجہ سے کیا گیا ہے۔ حکمرانوں کے پاس تدبر، حکمت اور بصیرت جیسی کوئی شے سرے سے موجود نہیں۔ سیاسی شعور کے فقدان اور عوامی مشکلات سے دانستہ بےخبری نے نون لیگ کو عوام سے دور کر دیا ہے۔ اگلے الیکشن میں نہ صرف ملت تشیع نون لیگ کا بائیکاٹ کرے گی بلکہ اسے بہت سارے حلقوں میں ذلت آمیز شکست کا سامنا کرنا پڑے گا۔

وحدت نیوز (اسلام آباد) مجلس وحدت مسلمین پاکستان کے سربراہ علامہ راجہ ناصر عباس جعفری کی بھوک ہڑتال 32ویں روز میں داخل ہو گئی ہے۔لانگ مارچ کی کال کے بعد پاکستان بھر سے مختلف علما و ذاکرین اور سیاسی و مذہبی شخصیات نے ایم ڈبلیو ایم کی مرکزی قیادت سے رابطے شروع کر دیے ہیں اور یقین دلایا ہے کہ ظلم و بربریت کے خلاف جاری اس تحریک کی کامیابی کے لیے بھرپور افرادی قوت کے ساتھ آپ کی ایک آواز پر میدان میں حاضر ہوں گے۔ملت تشیع کی طرف سے علامہ ناصر عباس کی صحت کے متعلق تشویش بھی پائی جاتی ہے اور کچھ بزرگ علما اور قوم کی قد آور شخصیات نے ایم ڈبلیو ایم کے قائد سے بھوک ہڑتال ختم کرنے کی درخواست بھی کی ہے تاہم علامہ ناصر عباس نے کہا کہ وہ حق کا پرچم لے کر نکلیں ہیں جو کبھی سرنگوں نہیں ہوتا۔میرے لیے میری صحت سے زیادہ اہم میری قوم میری ملت اور میرا وطن پاکستان ہے۔انہوں نے کہا کہ گزشتہ تین دہائیوں سے وطن عزیز کو تباہی کی طرف لے جایا جا رہا ہے۔یہود و نصاری کے ایجنٹ اور تکفیری دہشت گردوں نے ہم پر پراکسی وار مسلط کر رکھی ہے۔پاکستان کو مفت میں میدان جنگ بنایا جا رہا ہے۔ پاک چائنا اقتصادی راہدری کے اعلان کے بعد مفاد پرست گروہ اور ملک دشمن عناصر کی سرگرمیوں میں اچانک تیزی آ گئی ہے۔ پاکستان کی ترقی میں محض خارجی ملک دشمن طاقتیں رکاوٹ نہیں ڈال رہیں بلکہ وطن عزیز کے اندر بھی آستین کے سانپ موجود ہیں۔ جب تک ان کو کچلا نہیں جائے گا تب تک ملک تباہی کے دہانے پر ہی کھڑا رہے گا۔فرقہ واریت ، لسانی و صوبائی تعصب، دہشت گردی، انصاف کے حصول میں دشواری، لوٹ مار، کرپشن اور بے راوی جیسے متعدد موذی عوارض میںیہ ملک جھکڑا جا چکا ہے۔ نئی نسلوں اور بہترین مستقبل کے لیے ہمیں ان نجاستوں سے چھٹکارا حاصل کرنا ہو گا۔ انہوں نے کہا کہ اس ملک کو مسلکی بنیادوں پر تقسیم کرنے والوں کو نظریات کے فروغ کے لیے کھلی آزادی دے رکھی ہے جب کہ دوسری طرف درود و سلام پڑھنے والوں پر مقدمات بنائے جاتے ہیں۔ ہم اسی غیر منصفانہ طرز عمل کے خلاف میدان میں نکلے ہیں ۔جب تک نیشنل ایکشن پلان کو درست سمت کی طرف نہیں پھیر دیا جاتا اورجب تک دہشت گردوں کے گرد گھیرا تنگ نہیں ہوتا ہم نے اس احتجاجی کیمپ سے نہیں اٹھنا۔ اگر عوامی حقوق کا دفاع کرتے میری جان چلی جاتی ہے تو ساری دنیا کو یہ معلوم ہو جائے گا کہ پاکستان کی سالمیت و بقا کے لیے آواز حق بلند کرنے والے محب وطن افراد کا قتل ہر کوئی نہیں کرتا بلکہ یہاں کی حکومت اور اسٹیبلشمنٹ کرتی ہے

وحدت نیوز (لاہور) مجلس وحدت مسلمین پنجاب کے سیکرٹری سیاسیات سید حسن رضا کاظمی نے کہا ہے کہ قیادت کی طرف سے لانگ مارچ کے اعلان کے بعد ملک بھر کی طرح پنجاب میں رابطہ مہم کا آغاز کر دیا گیا ہے،دہشت گردی ،حکمرانوں کی رعونت اور لاقانونیت کے خلاف یہ لانگ مارچ وطن عزیز میں ایک نئی تاریخ رقم کرے گا۔ملک میں بسنے والے دیگر مذاہب اور مسالک کے لوگ بھی اس لانگ مارچ کا حصہ ہوں گے۔انہوں نے کہا کہ ملک کی 24 بڑی شیعہ تنظیموں کی طرف سے لانگ مارچ کے اعلان کے بعد بیشتر دیگر مذہبی و سیاسی تنظیموں نے بھی ہم سے رابطہ کیا ہے تاکہ لانگ مارچ کی تیاری موثر اور بھرپور انداز سے کی جائے۔مجلس وحدت مسلمین کے احتجاجی کیمپ اسلام آباد میں علامہ راجہ ناصر عباس جعفری کی سربراہی میں ہونے والی آل شیعہ کانفرنس میں کراچی ،لاہور،آزاد کشمیر، خیبرپختونخواہ ، بلوچستان،پارہ چنار، گلت بلتستان سمیت ملک کے مختلف علاقوں سے کثیر تعداد میں علما، شیعہ رہنماوں اور عمائدین کی شرکت نے یہ ثابت کیا ہے کہ شیعہ قوم متحد اور یک زبان ہے،ملک میں جاری دہشت گردی، ٹارگٹ کلنگ، ریاستی جبر اور ظلم و بربریت کے خلاف علامہ ناصر عباس جعفری کے پر امن احتجاج پر حکومت کی طرف سے مکمل بے حسی کے بعد ہمارے پاس لانگ مارچ کے علاوہ کو ئی آپشن موجود نہیں تھا۔اس وقت ملک بھر میں حکومتی ایما پر ملت تشیع کو دیوار سے لگانے کی کوشش کی جا رہی ہے۔دہشت گردوں کی سرکوبی کے لیے بنائے جانے والے نیشنل ایکشن پلان کو ملت تشیع کے بے گناہ افراد کے خلاف استعمال کیا جارہا ۔ہمارے علما و ذاکرین پر پابندیاں لگا کر عزاداری کو محدود کرنے کی کوشش کی جا رہی ہے،ان مظالم اور ریاستی ظلم و جبر کو ہم کسی بھی صورت تسلیم کرنے کو تیار نہیں۔