وحدت نیوز(سکھر) مجلس وحدت مسلمین صوبہ سندھ کے سیکرٹری جنرل علامہ مقصود ڈومکی نے وزیر اعلیٰ سندھ سید مراد علی شاہ سے ملاقات کی، اطلاعات کے مطابق شہداء کمیٹی کے چیئرمین اور سیکریٹری جنرل  مجلس وحدت مسلمین صوبہ سندھ علامہ مقصود ڈومکی نے وفد کے ہمراہ سانحہ شکارپور، سانحہ جیکب آباد اور خانپور کے قاتلوں کی عدم گرفتاری اور محر م الحرام  میں سیکورٹی مسائل پر وزیر اعلیٰ سندھ مراد علی شاہ سے ملاقات گفتگوکی اس ملاقات میں محرم الحرام میں سیکورٹی فراہم کرنے سےمتعلق انتظامیہ کی جانب سے بھرپور تعاون کی یقین دہانی کروائی گئی اور سانحہ شکارپور،جیکب آباد اور خانپور جیسے واقعات کی روک تھام کے حوالے سے بھی تبادلہ خیال کیا گیا۔

وحدت نیوز(کراچی) مجلس وحدت مسلمین صوبہ سندھ کے پولیٹیکل سیکریٹری سید علی حسین نقوی نے وحدت ہاؤس میں عزاداری سیل کے اراکین سے خطاب کرتے ہوئے کہا کہ ماہ محرم الحرام میں عزاداری اور عزاداروں کی خدمت ہمارا فرض اولین ہو نا چاہئے،کراچی میٹروپولیٹن کارپوریشن اور کراچی واٹر اینڈ سیوریج بورڈ کے حکام محض زبانی جمع خرچ سے کام لے رہے ہیں، اس موقع پر عزاداری سیل کراچی کے اراکین علامہ مبشر حسن، سید رضا نقوی ،سید احسن عباس رضوی،  زین رضا،اورسبط اصغربھی موجود تھے۔

ان کا کہنا تھا کہ لانڈھی، کورنگی، ملیر، شاہ فیصل کالونی،ایوب گوٹھ، بھٹائی آباد، پہلوان گوٹھ، بن قاسم ٹاؤن، نارتھ کراچی اور دیگر علاقوں میں سڑکوں کی استر کاری، اسٹریٹ لائٹس کی تنصیب، بیریئرز کی تنصیب اور سیوریج لائنوں کی صفائی کے کاموں میں انتظامیہ مکمل طور پر ناکام ہو چکی ہے، واٹر بورڈانتظامیہ اور میونسپل ایڈمنسٹریشن مسائل کے حل میں سنجیدگی کا مظاہرہ نہیں کررہی، حکام بالا نیچے مسائل کے فوری حل کے احکامات جاری کر رہے ہیں لیکن نچلا عملہ وسائل کی قلت کو بنیاد بنا کر کاموں میں سستی و کاہلی کا مظاہرہ کررہے ہیں،انہوں نے سکیورٹی اقدامات پر بھی عدم تحفظ کا اظہار کرتے ہوئے کہا کہ مختلف اجلاسوں میں پولیس اور رینجرز کے اعلیٰ حکام کو حساس آبادیوں اور اما م بارگاہوں کی نشاندہی کے باوجود سکیورٹی کے کوئی مناسب اقدامات نہیں کیئے ہیں،علی حسین نقوی نے وزیر اعلیٰ سندھ ایڈیشنل آئی جی پولیس، ڈی جی رینجرز سندھ سے مطالبہ کیا ہے کہ جلد ازجلد محرم الحرام اور عزاداری سے متعلق امور کی انجام دہی کے لئے سنجیدہ اور بر وقت اقدامات کیئے جائیں، تاکہ ماہ مقدس محرم الحرام میں کسی نا خوشگوار واقعے سے بچا جا سکے۔

وحدت نیوز(کوئٹہ) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری، مرکزی رہنما علامہ سید ہاشم موسوی، ایم پی اے آغا رضا ، ڈپٹی سیکرٹری جنرل ولایت حسین جعفری و دیگر معززین نے وحدت ہائوس کوئٹہ میں پریس کانفرنس سے خطاب کرتے ہوئے کہا کہ انڈیا کی طرف سے پاکستان کے خلاف ہرزہ سرائی اور دھمکیوں کا بلوچستان کے عوام نے اپنے حب الوطنی کے ذریعے بھر پور جواب دیا، تفتان روٹ دورے پر ہم نے ہر جگہ گھروں پر پاکستانی جھنڈے دیکھے جو بلوچ عوام کی حب الوطنی کی نشانی  ہے ۔ بلوچ عوام نے حکومت اور اداروں کی ناانصافیوں اور محرومیت کے باوجود ہمیشہ پاکستان کا ساتھ دیا، انکے حقوق دینا اور ترقیاتی کاموں کے ذریعے انکی محرومیت کو دور کرنا حکومت اور اداروں کی ذمہ داری ہے ۔

ان کا کہنا تھا کہ ہندوستان اپنے ظلم اور جنگی جنون کےذریعے تحریک آزادی کشمیر کو نہیں دبا سکتا ،اگر ہندوستان جنگ مسلط کرنے کی غلطی کرے تو پاکستانی افواج اور عوام سیسہ پلائی دیوار بن کر وطن عزیز کی دفاع کرے گی اور ہندوستان کو وہ سبق سکھائیں گے انکی آئندہ نسلیں بھی یاد رکھے گی ۔

انہوں نے کہا کہ سانحہ کوئٹہ جس نے ہمیں بہترین وکلاء اور صحافیوں جو صوبہ اور ملک کے عظیم سرمایہ تھے ہم سے چین لیا ۔ حکومت اس واقعے کو قصہ پارینہ نہ بنائے اور دہشتگردوں انکی سہولت کاروں کے خلاف بھر پور کاروائی کریں اور نیشنل ایکشن پلان پر اسکی اصل روح کے مطابق عملدرآمد کروائے۔زائرین صوبہ بلوچستان کو پاکستان کے دیگر صوبوں سے ملاتے ہیں اور اپنی قربانیوں  اور آمدو رفت کے ذریعے سے کوئٹہ تفتان روٹ کو زندہ رکھا ہے جس سے صوبے کو اقتصادی فائدہ بھی پہنچ رہا ہے۔ زائرین کو تنگ کرنا اور مشکلات پیدا کرنا ملک اور صوبے کے نقصان میں ہے، لہذا حکومت اور صوبائی انتظامیہ انکی مسائل اور مشکلات بر طرف کریں ۔

انہوں نے کہا کہ وزیر اعلی بلوچستان، چیف سیکرٹری، ہوم سیکرٹری اور ایف سی کے سربراہان سے ہماری ملاقاتیں ہوئی جس میں ہم نے زائرین کی تمام مشکلات سے انھیں آگاہ کیا ہماری تمام ملاقاتیں اور خصوصا وزیر اعلی بلوچستان نواب ثناءاللہ زہری سے ملاقات انتہائی مثبت رہی جس میں انہوں نے یقین دہائی کروائی کہ محرم اور صفر کے بعد زائرین کےموومنٹ کانوائے کی تعداد بڑھا دی جائے گی، پاکستان ہاوس میں تمام تر سہولیات فراہم کریں گے اور بذات خود تفتان کا دورہ بھی کریں گے۔ چیف سیکرٹری اور سیکرٹری ہوم نے بھی تعاون   اورخصوصا تفتان سے کوئٹہ آتے ہوئے زائرین کی جلد از جلد موومنٹ کو یقینی بنانے کا وعدہ کیا ہے ،امید ہے کہ وزیر اعلی اور دیگر ذمہ داران اپنے وعدوں پر عمل کرتے ہوئے ان مسائل کا نوٹس لیتے ہوئے انھیں جلد از جلد حل کرینگے ،ایف آئی اے آفس تفتان جو کراچی ائیر پورٹ کے بعد سب سے مصروف ترین بارڈر ہے ، اسکا حال انتہائی ناگفتہ بہ  ہے جہاں سے غیر ملکی مسافر بھی آتے رہتے ہیں اس آفس کی حالت  وطن عزیز کے وقار کے منافی ہے، حکومت ایف آئی اے آفس تفتان کوجلد از جلد جدید بنیادوں پرسہولیات فراہم کرے ۔

خطاب کے آخر میں علامہ راجہ ناصر عباس نے وزیر اعلی بلوچستان، چیف سیکرٹری، آئی جی ایف سی و دیگر انتظامیہ کا شکریہ ادا کرتے ہوئے امید ظاہر کی کہ وہ اپنے وعدوں پر عملدرآمد کروا کر ان تمام مسائل کو ترجیحی بنیادوں پر حل کروائیں گے اور انہوں نے کہا کہ ہم وطن عزیز کی دفاع اور عوام کے جان و مال کی تحفظ کرنے والے اپنے ان تمام جوانوں کو سلام پیش کرتے ہیں جنہوں نے مادر وطن کی دفاع کیلئے اپنی جانوں کا نذرانہ پیش کیا اور ہم سانحہ کوئٹہ اور دیگر تمام واقعات میں شہید ہونے والے شہداء کو عظیم خراج تحسین پیش کرتے ہیں ۔

وحدت نیوز (گلگت)  آغا ضیاء الدین شہید کیس میں ملوث مولوی ندیم کی گرفتاری پولیس اور اداروں کی بہت بڑی کامیابی ہے۔کیس کی باریک بینی سے تفتیش کرکے آغا ضیاء الدین شہید کے قتل میں ملوث مقامی لوگوں اور سہولت کاروں کو بھی گرفتار کیا جائے۔

مجلس وحدت مسلمین کے رہنماغلام عباس نے کہا ہے کہ شہید ضیاء الدین قتل کیس گرفتار مولوی ندیم کی تفتیش ا چھی شہرت کے پولیس آفیسران کے حوالے کیا جائے اور اس ہائی پروفائل قتل کیس کی تحقیقات میں کسی کوتاہی کا مظاہرہ نہیں کیا جانا چاہئے۔بد قسمتی سے اب تک اس قتل کیس میں ملوث حقیقی قاتلوں اور ان کے سہولت کاروں کاپتہ نہیں چلایا جاسکا جو کہ قانون نافذ کرنے والے اداروں کی دیدہ و دانستہ چشم پوشی ہے۔انہوں نے کہا کہ گرفتار ملزم کی تفتیش سے اس قتل کیس کے پس پردہ حقائق کا پتہ چلایا جاسکتا ہے اور گلگت بلتستان کے امن کے خلاف سازش کرنے والے نیٹ ورک کا قلع قمع کیا جاسکتا ہے۔

انہوں نے کہا کہ کیس کے ایک اہم مجرم کو جیل سے فرار کروایا گیا اور اس کو فرار کروانے میں ان اہلکاروں کا ہاتھ تھا جو دہشت گردوں کے لئے نرم گوشہ رکھتے تھے۔گرفتارملزم کی تفتیش میں اچھی شہرت کے حامل آفیسران کی تعیناتی ہے جو اپنی پیشہ ورانہ صلاحیتوں کو استعمال کرکے کیس کے اصل حقائق کو سامنے لاسکتے ہیں اور اگر ایسے عناصر کے ساتھ تفتیش کروائی گئی جو دہشت گردوں کیلئے نرم گوشہ رکھتے ہیں تو اس طرح کی محض گرفتاریوں سے کوئی نتیجہ برآمد نہیں ہوگا۔

وحدت نیوز(کراچی) مجلس وحدت مسلمین صوبہ سندھ کے سیکرٹری جنرل علامہ مقصود علی ڈومکی نے کہا ہے کہ عزاداری کے خلاف کسی بھی قسم کی سازش کا ڈٹ کر مقابلہ کیا جائے گا، محرم الحرام کے دوران عزاداری کے اجتماعات کو مکمل سیکورٹی کی فراہم کی جائے۔ ان خیالات کا اظہار انہوں نے وحدت ہاؤس کراچی میں مرکزی عزاداری سیل کے اجلاس سے خطاب کرتے ہوئے کیا۔ اجلاس میں محرم الحرام کے دوران سندھ بھرمیں منعقد ہونے والے عزاداری، مجالس اور جلوسوں کے پروگرامز کو حتمی شکل دے دی گئی اور ایک عزاداری سیل بھی قائم کردیا گیا ہے، اجلاس سے خطاب کرتے ہوئے علامہ مقصود علی ڈومکی نے کہا کہ اس سال سندھ میں ہونے والی تمام مجالس، عزاداری اور جلوسوں کو مکمل سیکورٹی کی فراہمی کے لئے مجلس وحدت مسلمین اور اسکاؤٹس رضاکاروں نے انتظامات کو حتمی شکل دے دی ہے، اس کے علاوہ محرم الحرام کے دوران صفائی ستھرائی اور دیگر تمام انتظامات کو بھی مکمل کروایا جائیگا۔

 انہوں نے عزاداری سیل کے قیام کا اعلان کرتے ہوئے کہا کہ سیکرٹری عزاداری سید اکبر شاہ کی سربراہی میں بننے والے عزاداری سیل میں علی حسین نقوی،مولانا علی انور جعفری،علامہ دوست علی سعیدی ،مولانا سکندر علی ،آفتاب میرانی، آغا ندیم جعفری ،شفقت لانگا کو بحیثیت ارکان شامل کیا گیا ہے، ایم ڈبلیو ایم سندھ کی جانب سے عزاداری سیل کا مرکزی آٖفس وحدت ہاؤس سولجر بازار میں قائم کیا گیا ہے جہاں صوبائی رہنما ناصر الحسینی آفس سیکرٹری کے خدمات انجام دیں گے جبکہ شہر بھر کی جامع مساجد و امام بارگاہوں اور مجلس وحدت مسلمین کے ضلعی دفاتر و علاقائی یو نٹس میں 7000سے زائد ایم ڈبلیو ایم کے رضا کاروں پر مشتمل ورکنگ ٹیم بنائی گئی ہے جو مرکزی آفس سے 24گھنٹہ رابطہ میں رہے گی اور مختلف شعبہ جات میں اپنی ذمہ داریاں انجام دی جائے گی، اس کے علاوہ ایم ڈبلیو ایم خواتین ونگ کی رضا کار بھی اپنی ذمہ داریاں انجام دیں گی۔ ان کا کہنا تھا کہ سیل محرم الحرام کے دوران شہر میں ہونے والی تمام مجالس، جلوس اور عزاداریوں کی سیکورٹی کے ساتھ ساتھ ان علاقوں کی صفائی اور دیگر انتطامات کو مکمل کریں گے اور درپیش مشکلات کا ازالہ کریں گے۔ انہوں نے کہا کہ عزاداری کے خلاف کسی بھی سازش کو اب اس شہر کے شیعہ اور سنی بھائی مل کر ناکام بنائیں گے اور 1400 سال سے جاری عزاداری کو تاقیامت کسی کو روکنے کی اجازت نہیں دی جائے گی۔

وحدت نیوز(سیالکوٹ) مجلس وحدت مسلمین پاکستان ضلع سیالکوٹ کا تنظیمی اجلاس  جعفری محلہ مسجد و امام بارگاہ میں منعقد ھوا جس میں صوبائی سیکرٹری جنرل علامہ سید مبارک علی موسوی نے خصوصی شرکت کی -صوبائی سیکرٹری جنرل کی سربراہی میں الیکشن کمیٹی نے دستوری قوائد و ضوابط کے مطابق ضلعی سیکرٹری جنرل کے انتخاب کا مرحلہ شروع کیا جس کے مطابق ریٹائرنگ کابینہ نے دو نام عقیل عباس اور أغا قیصر نواز جبکہ یونٹس کی طرف سے علی رضا کا نام پیش کیا گیا تینوں ناموں پر ووٹنگ ھوئی جس میں ففٹی پرسنٹ سے زائد أراء کے حامل چودھری عقیل عباس جنجوعہ ایڈووکیٹ کو ضلع سیالکوٹ کا سیکرٹری جنرل منتخب کر لیا گیا ۔ صوبائی سیکرٹری جنرل علامہ سید مبارک علی موسوی نے نومنتخب سیکرٹری جنرل  سے حلف وفاداری لیا ، علامہ سید مبارک علی موسوی نے تنظیم کی ضرورت اور مجلس وحدت مسلمین پاکستان کی کارکردگی ، ناصر ملت علامہ راجہ ناصر عباس جعفری کی مجاھدانہ کاوششوں اور ان کے ثمرات پر تفصیل سے گفتگو کی۔