وحدت نیوز (کراچی)  مجلس وحدت مسلمین پاکستان سندھ کے سیکرٹری جنرل علامہ مقصود علی ڈومکی نے کہا ہے کہ کراچی میں شدید گرمی سے عوام بلبلارہے ہیں اور کے الیکٹرک کی ظالمانہ لوڈ شیڈنگ مذید ظلم کےپہاڑتوڑ رہی ہے،کراچی سمیت سندھ بھر میں شدید گرمی کے باوجود کے الیکٹرک و دیگر بجلی فراہم کرنے والے اداروں کی جانب سے بڑھتی ہوئی لوڈشیڈنگ، ہیٹ اسٹروک سے بچاو کیلئے اب تک کسی بھی قسم کے عملی اقدامات نہ اٹھایا جانا اور ہیٹ اسٹروک کے خطرے سے عملاً لاتعلقی سندھ حکومت کی نااہلی اور بے حسی کا کھلا ثبوت ہے، سندھ حکومت عوامی و علاقائی مسائل کو حل کرنے میں یکسر ناکام ہوگئی ہے، ان خیالات کا اظہار انہوں نے وحدت ہاؤس سولجربازار کراچی میں ڈویژنل شوریٰ اجلاس سے خطاب کرتے ہوئے کیا۔ علامہ مقصود ڈومکی نے کہا کہ سندھ حکومت کی اولین ذمہ داری ہے کہ وہ پہلے سے بدحالی کی شکار عوام کو سہولیات فراہم کرے اور عوامی مسائل کو حل کرے۔

علامہ مقصود ڈومکی نے کہا کہ بدقسمتی سے موجودہ سندھ حکومت عوام کو سہولیات فراہم کرنے کی بجائے عوام کو میسر سہولیات پر بھی ڈاکہ ڈالنے اور مزید بدترین کرپشن میں مصروف ہے۔ انہوں نے کہا کہ عوامی حقوق پر کسی کو ڈاکہ ڈالنے نہیں دیں گے، ہم عوام کے ساتھ کھڑے ہیں، عوام مسائل اور حقوق کیلئے جس سطح تک جانا پڑے جائیں گے، سندھ حکومت کو اخباری دنیا سے نکل کر عوامی مسائل کے حل کیلئے اقدامات اٹھانا ہوں گے، وگرنہ عوام کی مدد سے حکومت کے خلاف سخت قدم اٹھانے پر مجبور ہو جائیں گے۔ انہوں نے کہا کہ سندھ حکومت کی جانب سے صوبے کی عوام کو بدترین مسائل میں جکڑ کر رکھنے کا خمیازہ پیپلز پارٹی کو آئندہ عام انتخابات میں یکسر ناکامی کی صورت میں بھگتنا پڑے گا۔

وحدت نیوز (سکردو)   مجلس وحدت مسلمین پاکستان گلگت بلتستان کے سربراہ آغا علی رضوی نے اپنے ایک بیان میں کہا ہے کہ آئینی اصلاحاتی پیکج گمراہ کن دستاویزات کا پلندہ اور خطے کے لاکھوں عوام کی توہین ہے، جسے یکسر مسترد کرتے ہیں۔ انہوں نے کہا کہ اصلاحاتی پیکج کے نام پر حقوق سے محروم گلگت بلتستان کو غلامی کی طرف دھکیلنے کی کوشش ہے۔ پیکج میں وزیراعظم کو اس خطے کے سفید و سیاہ کا مالک بنانے کی کوشش کی ہے۔ جی بی کے عوام کو نہ وزیراعظم کے انتخاب کے عمل میں کوئی حق ہے اور نہ ہی اس پارلیمنٹ میں کوئی جگہ موجود ہے جس کے ذریعے وزیراعظم کا انتخاب ہوتا ہے۔ ایسے میں وزیراعظم کو تمام تر اختیارات دینا غیرآئینی و غیرقانونی عمل ہے۔ آغا علی رضوی نے کہا کہ اس نام نہاد اصلاحاتی پیکج سے واضح ہوتا ہے کہ مسلم لیگ نون جمہوری اقدار سے نہ صرف نابلد اور ناآشنا ہے، بلکہ آمرانہ و بادشاہانہ سوچ کی حامل جماعت ہے۔

انہوں نے کہا کہ ہم گلگت بلتستان کے عوام پر زور زبردستی کے قانون کو کسی صورت نافذ ہونے نہیں دیں گے۔ نام نہاد اصلاحاتی پیکیج میں جی بی کی عدالتوں کو جس طرح پابند کیا گیا ہے اسکی مثال مہذب دنیا میں کہیں نہیں ملتی۔ جی بی کی عدالتوں کی جس انداز میں توہین کی ہے۔ جی بی کی عدالتوں کو اس سلسلے میں خاموش نہیں رہنا چاہیئے اور سپریم کورٹ سے درس لیتے ہوئے اس پیکج کو منظر عام پر لانے والے حکمرانوں کا محاسبہ کرنا چاہیئے کہ کیوں انہوں نے دانستہ طور پر عوامی مینڈیٹ کی توہین کرنے اور عدالتوں کو مذاق بنانے کی کوشش کی ہے۔ نہایت افسوسناک مرحلہ ہے کہ وفاقی حکومت یہاں کے عوام کی ستر سالہ حب الوطنی کا صلہ مزید محرومیوں میں دھکیل کر دے رہی ہے جو کہ کسی صورت پاکستان کے مفاد میں نہیں ہے۔ صوبائی حکومت کے ایک عرصے سے یہاں کے عوام اور اسمبلی کو بااختیاز بنانے کے دعووں کی قلعی اب کھل گئی ہے اور واضح ہوگیا ہے کہ مسلم لیگ نون کی صوبائی حکومت اس خطے کی ترقی کی خواہاں نہیں بلکہ وفاقی حکومت کی کاسہ لیسی کو اعزاز سمجھتی ہے۔

آغا علی رضوی نے کہا کہ صوبائی حکومت میں امید ہے ایسے لیگی رہنما بھی موجود ہونگے جو عوام پر ڈھائے جانے والے اس ظلم کی بیجا حمایت کرنے کی بجائے خطے سے وفاداری کا ثبوت دیتے ہوئے اس پیکج کو مسترد کریں گے اور اس کی آڑ میں نافذ کرنے والے ٹیکسز کو بھی مسترد کریں گے۔ عوام دشمن فیصلے کے خلاف میدان میں آنے والے حکمرانوں کو عوام قدر کی نگاہ سے بھی دیکھیں گے اور تاریخ بھی انہیں اچھے ناموں سے پکارے گی۔ ایم ڈبلیو ایم جی بی کے رہنماء نے مزید کہا کہ ستر سالوں سے وفاقی حکومتوں نے عوام کو مایوسی کے سوا کچھ بھی نہیں دیا، جبکہ وطن عزیز کے استحکام و ترقی میں اس خطے کے انسانی و قدرتی وسائل کا عمل دخل ہے۔ انہوں نے کہا کہ عوام کے صبر کا پیمانہ لبریز ہو چکا ہے اب اس خطے کی تقدیر اور مستقبل کو اس عوام کے ہاتھ میں دینے کے لئے نہ صرف اس ظالمانہ پیکج کے خلاف تحریک کا آغاز کریں گے بلکہ اس خطے کے عوام کو بااختیار بنا کر دم لیں گے، مزید کسی بھی جماعت کو اس خطے کے عوام کے ساتھ مزید مذاق کرنے نہیں دیں گے۔ ملک بھر کے عام انتخابات کے ساتھ جی بی میں انتخابات جب تک نہ ہو وفاقی حکومت یہاں کی مینڈیٹ چراتی رہے گی اور من پسند کے فیصلے نافذ کرتے رہیں گے۔ جی بی اسمبلی کو جب تک آزاد و خودمختار نہیں بنایا جاتا اور وزیراعظم کے اختیارات کو محدود نہیں کیا جاتا، اس خطے میں خوشحالی کبھی نہیں آ سکتی۔ جس خطے کے عوامی نمائندوں کے ووٹ اور عوام کے ووٹ کی ضرورت وزیراعظم کو نہ ہو وہ کبھی عوام کے حقوق کا دفاع نہیں کریں گے۔

وحدت نیوز (سانگھڑ) مقصودورند ضلع سانگھڑ میں پولیس نے چادر اور چار دیواری کی پائمالی کی سنگین کاروائی کی ہے، قبرستان کی زمین پر تھانہ بنانے کی کوشش پر احتجاج کرنے کی صورت میں مجلس وحدت مسلمین کے ضلعی عہدیداران فوجی ہدایت علی رند اور دیگر کارکنان کے گھروں پر دھاوا بول دیا، ایم ڈبلیوایم کے 11بے گناہ کارکنان اور ان کے عزیزوں کو رات گئے گھروں سے اغواءکرکے لے گئے ،تفصیلات کے مطابق مقصودورند میں قبرستان کی اراضی پر پولیس نے تھانے بنانے کی کوشش شروع کردی جس پر ایم ڈبلیوایم کے رہنما ہدایت علی رند اور ان کے بعض رفقاءنے احتجاج کیا جس کے نتیجے میں پولیس نے انہیں انتقام کا نشانہ بناتے ہوئے آدھی رات کو گھروں سے اغواء کیا اور بعد ازاں بے بنیاد الزامات لگاکر ایف آئی آرکاٹ دی، جس پر ایم ڈبلیوایم کے کارکنان اور علاقہ عوام میں شدید اشتعال پایا جاتا ہے۔

ایم ڈبلیوایم کے صوبائی سیکریٹری امور سیاسیات علی حسین نقوی، ضلعی سیکرٹری جنرل سید عمران علی شاہ اور دیگر نے واقعے کی شدید الفاظ میں مذمت کی ہے، رہنمائوں نے کہا کہ  ہمارے صبر کو کمزوری نا سمجھا جائے ، پولیس کو تھانہ بنانے کیلئے کیا صرف قبرستان کی زمین ہی نظر آئی ، رہنمائوں نے سندھ حکومت خصوصاًآئی جی پولیس سے مطالبہ کیا ہے کہ پولیس گردی کے اس بدترین واقعے کا فوری نوٹس لیں اور ذمہ دار پولیس حکام کے خلاف کاروائی کرتے ہوئے بےگناہ اسیران کو فوری طور پر رہائی کیا جائے،بصورت دیگر ایم ڈبلیوایم سندھ بھرمیں بھرپور احتجاج کرے گی۔

وحدت نیوز (ٹنڈو محمد خان) مجلس وحدت مسلمین کا صحافی کے اعزاز میں تقریب کا انعقاد کیا جس میں مجلس وحدت مسلمین کے مرکزی ترجمان علامہ مختار امامی ،علامہ سید علی انور جعفری ،مولانا محمد بخش غدیری ،یعقوب حسینی سمیت دیگر رہنماوں اور پرنٹ و الیکٹرانک میڈیا کہ صحافیوں نے بڑی تعداد میں شرکت کی ۔تقریب سے خطاب میں ایم ڈبلیو ایم کے ترجمان علامہ مختار امامی کا کہنا تھا کہ6مئی بروز اتوار 3 بجے سہ پہر ضلع ٹنڈو محمد خان میں استحکام پاکستان کانفرنس منعقد کی جائے گی اور میر غلام علی تالپر پارک میں بھر پور سیاسی قوت کا مظاہرہ کریں گے۔کانفرنس ملک دشمن عناصر کے خلاف سنگ میل ثابت ہوگی انہوں نے کہا کہ استحکام پاکستان کانفرنس سے مرکزی خطاب مجلس وحدت مسلمین کے سربراہ علامہ راجہ ناصر عباس جعفری،سنی اتحاد کونسل کے چیئرمین صاحبزادہ حامد رضا و دیگر سیاسی مذہبی جماعتوں کے رہنما بھی خطاب کریں گے۔تقریب سے علامہ مختار امامی کا مذید کہنا تھا کہ صحافیوں کو فرائض کی ادائیگی میں مکمل تحفط کی فراہمی حکومت کی اولین ذمہ داری ہے جسے ہر حال میں پورا ہونا چاہیے۔صحافت ریاست کا اہم ستون ہے۔عوام کی حقائق تک رسائی کا واحد ذریعہ وہ لوگ ہیں جو کسی مشکل کی پرواہ کیے بغیر اپنے پیشہ وارانہ فرائض سرانجام دے رہے ہیں۔ذمہ دارانہ طرز صحافت معاشرے میں مثبت رجحانات کے فروغ کا باعث بنتی ہے۔یہ وہ طبقہ ہے کہ جو قلم کی طاقت کو جبر و استبداد کے خلاف استعمال کرتا آیاہے۔پاکستانی صحافت میں ایسے معتبر نام موجود ہیں جو آمریت کے خلاف جرات مندانہ انداز میں ڈٹے رہے۔انہوں نے کہا کہ صحافی برادری کے حقوق کے لیے ایم ڈبلیو ایم آپ کو ہمیشہ ساتھ کھڑی نظر آئے گی.

وحدت نیوز (اسلام آباد) 13 مئی کو عالمی دہشتگرد امریکہ و اسرائیل کے خلاف یوم مردہ باد امریکہ منایا جائے گا۔ امریکہ اور اس کیاتحادیوں نے نہتے اور جنگ سے بے حال شامیوں پر جارحیت کی۔ دنیا بھر میں جتنی بھی بد امنی ہے اس کے پیچھے امریکہ اور اس کے حواری ہیں جو دنیا پر اپنا تسلط برقرار رکھنے کے لئے دنیا بھر میں انسانوں کا خون بہارہے ہیں۔ ان خیالات کا اظہار سربراہ مجلس وحدت مسلمین علامہ راجہ ناصر عباس جعفری نے میڈیا سیل سے جاری ایک بیان میں کیا ان کا کہنا تھا کہ جنوبی ایشیا کو غیر مستحکم رکھنا امریکی مفاد میں ہے جس کے لئے وہ پاکستان اور افغانستان میں داعش کو بسا رہا ہے۔ یہ ایک الارمنگ صورت حال ہے افغانستان اور پاکستان میں گزشتہ چند ماہ میں ہونے والی ہزارہ برادری کی کلنگ کے پیچھے داعش کا ہاتھ ہے۔ پاکستان کی مظبوط فوج امریکی مفادات کی راہ میں سب سے بڑی رکاوٹ ہے۔ عوام اپنی افواج سے محبت کرتی ہے۔ بلوچستان کے حالات کے حوالے سے کوئٹہ کی سر زمین پر مظلوموں کے زخموں پر مرہم رکھنے کیلئے چیف آف آرمی اسٹاف صاحب خود کوئٹہ تشریف لیکر گئے اور وہاں احتجاجی دھرنے میں موجود عمائدین اور شہداء کے خانوادوں سے ملے اور ان کے زخموں پر مرہم رکھا ان کے مطالبات کو سنا اور کوئٹہ شیعہ ہزارہ برادری کے قتل میں ملوث دہشتگردوں کے خلاف عملی اقدامات کرنے کی یقین دہانی کرائی۔ہم آرمی چیف جنرل قمر جاوید باجوہ کا شکریہ ادا کرتے ہیں اور ایسی طرح چیف جسٹس آف پاکستان جناب ثاقب نثار کے جنہوں نے پلوچستان میں جاری ہزارہ برادری کی نسل کشی کے خلاف سوموٹو ایکشن لینے پر ان کے بھی شکر گزار ہیں اور امید رکھتے ہیں کہ اگر پاکستان کے مقتدر حلقہ،ادارے اور شخصیات ان محب وطن مظلوموں کے زخموں پر مرہم رکھیں گے تو ملک دشمنوں اور قاتلوں کو مایوسی ہوگی۔اور ملک دشمن عناصر کے عزائم کامیاب نہیں ہوسکیں گئے.ہم 13 مئی کوکشمیر،فلسطین،یمن،بحرین، عراق و شام سمیت دنیا بھر میں امریکی دہشتگردی کے خلاف ملک گیر احتجاج کریں گئے۔

وحدت نیوز (اسلام آباد) سربراہ مجلس وحدت مسلمین پاکستان علامہ راجہ ناصر عباس جعفری کے بھانجے راجہ فخر عباس اوران کی اہلیہ جرمنی کار حادثے میں جانبق ہوگئے خدا مرحومین کوجنت الفردوس میں جگہ عطا فرمائے اور پسمندگان کو صبر جمیل عطا فرمائے۔تفصیلاات کے مطابق راجہ فخر عباس اپنی اہلیہ اورایک عزیز ناصر کاظمی اور ان کی اہلیہ کے ہمراہ لیوٹن سے جرمنی آرہے تھے۔جہاں ان کی کارمخالف سمت سے آنیوالی کارسے ٹکرا گئی جس سے کارمیں سوار چار افراد موقع پر ہی زخموں کی تاب نا لاتے ہوئے خالق حقیقی سیجا ملے۔

اس ناگہانی حادثے پر مختلف سیاسی و مذہبی قائدین نے علامہ راجہ ناصر عباس جعفری سے ٹیلی فون پر تعزیت کی۔اس کے علاوہ مجلس وحدت مسلمین کے مرکزی رہنماوں سمیت کارکنان نے علامہ راجہ ناصر عباس جعفری سے ان کے گھر پر جاکر ان سے تعزیت کی اور مرحومین کی مغفرت و بلندی درجات کیلئے دعائے خیر کا سلسلہ بھی جاری۔اس موقع پر سنی اتحاد کونسل کے سربراہ صاحبزادہ حامدرضا کا کہنا تھا کہ مرحوم راجہ فخر عباس درد دل رکھنے والے ہر دلعزیز انسان تھے ان کی اہلیہ اور دیگر احباب کے انتقال پر ملال کا شدید غم و دکھ ہے خداوند کریم مرحومین کی مغفرت و درجات بلند فرمائیاور پسماندگان کو صبر جمیل عطا کرے۔