وحدت نیوز (کوئٹہ) مجلس وحدت مسلمین کوئٹہ ڈویژن کے سیکرٹری جنرل عباس علی سمیت دیگر عہدیداران و اراکین نے کیسکو مافیا کی شدید مذمت کرتے ہوئے کہا ہے ،کہ کیسکومافیا کے ملی بھگت سے کئی کئی گھنٹے طویل غیر اعلانیہ لوڈشیڈنگ نے علمدارروڈ کے مکینوں کی زندگیاں اجیرن بنادی ہے ، باوجود اس کے علاقے کے مکین بجلی کے واجبات پاکستان بھر میں سب سے زیادہ ادا کرتے ہیں، لیکن پھربھی کیسکو مافیاناانصافی کرکے لائن لاسسز علمدار روڈ کے مکینوں سے پورا کرنے کی کوشش کررہے ہیں، جب کے ملحقہ علاقوں کی نسبت علمدار روڈ کے علاقے میں لائن لاسسز نہ ہونے کے برابر ہیں۔ انہوں نے کہا کہ افسوس کے ساتھ کہنا پڑتاہے کہ کیسکو مافیا بجائے عوام کی خدمت کے اپنی من مانیاں کررہے ہیں اور عوام کے پیسوں سے عیاشیاں کررہے ہیں، دوستیاں نباتے ہوئے اپنے من پسند علاقوں کی لوڈشیڈنگ بھی علمدار روڈ میں کرارہے ہیں جس کی وجہ لائن لاسسز کا بوجھ غیر منصفانہ طورپر علمدارروڈ کے عوام برداشت کررہے ہیں، جس کی وجہ سے عوام شدید مشکلات کا شکار ہے ۔بجلی کی غیر اعلانیہ لوڈشیڈنگ کی وجہ سے عوام کو پانی کی سپلائی میں بھی غیر معمولی کمی واقع ہوئی ہے اور روز مرہ کی زندگی بری طرح متاثر ہوچکی ہیں۔انہوں مزید کہاکہ کیسکو مافیا کے غلط رویے کی وجہ عوام نالاں ہے لیکن کوئی سننے والانہیں، کیسکو مافیا کرپشن میں ڈوبا ہوا ہے اور کسی کو جوابدہ نہیں سمجھتے۔ مجلس وحدت مسلمین کیسکو کے اعلٰی حکام اور صوبائی حکومت سے پرزور مطالبہ کرتے ہیں کہ طویل غیر اعلانیہ لوڈشیڈنگ کو فوری طور پرختم کرکے عوامی شکایات کو صحیح معنوں میں دور کریں۔