وحدت نیوز (کوئٹہ) مجلس وحدت مسلمین بلوچستان کے سربراہ علامہ مقصود علی ڈومکی نے کہا ہے کہ ہمارے نا اہل حکمرانوں نے ملک میں کوئی ایسا ہسپتال کیوں نہیں بنایا کہ جس میں انکا علاج ہو سکے۔جن حکمرانوں کے بچے دوسرے ممالک کے تعلیمی اداروں میں پڑھتے ہوں ، جن کے اثاثہ جات اور تجارتی مفادات دیگر ممالک میں ہوں ، جنکا علاج لندن میں ہوتا ہو، اورجو عید منانے لندن اور سعودی جاتے ہوں ، انہیں اس ملک اور غریب عوام سے کیونکر ہمدردی ہوسکتی ہے۔
انہوں نے کہا کہ جب تک وزیر اعظم ،وزراء اعلیٰ اور اراکین اسمبلی کے بچے سرکاری اسکولوں میں تعلیم حاصل نہیں کرتے ، اس وقت تک ملک کا نظام تعلیم بہتر نہیں ہوسکتا۔ملک کے کروڑوں شہری اپنے حکمرانوں سے یہ سوال پوچھنے میں حق بجانب ہیں کہ آخر وہ اپنے ملک کی ہسپتالوں میں علاج کیوں نہیں کراتے۔
انہوں نے کہا کہ ملکی اداروں کی تباہی کے ذ مہ داروں کو کٹھڑے میں کھڑا کرنے کا وقت آگیا ہے۔ملکی دولت کو دونوں ہاتھوں سے لوٹنے والوں کا احتساب ضروری ہے۔ پانامہ لیکس حکمرانوں کے کردار کو واضح کررہی ہے۔
در ایں اثناء علامہ مقصود علی ڈومکی نے کشمیر میں فورسز کے ہاتھوں ۴جوانوں کی شھادت پر افسوس کا اظہار کرتے ہوئے کہا کہ ہم کشمیری عوام کی جدوجھد آزادی کی بھرپور حمایت کرتے ہیں، کشمیر ایک دن ضرور آزاد ہوگا۔ انڈیا کے مظالم کشمیری عوام کے حوصلوں کو کبھی شکست نہیں دے سکے گی۔
