وحدت نیوز (کوئٹہ) مجلس وحدت مسلمین کے میڈیا سیل سے جاری بیان ایم ڈبلیوایم کے رکن بلوچستان اسمبلی سید محمد رضا نے کہا ہے کہ رویوں میں مثبت تبدیلی ،سیاسی و معاشی استحکا م کا با عث بنتے ہیں ۔اسلام امن ،تحمل برداشت اور باہمی تعاون کی تعلیم دیتا ہے یہ نہ صرف مسلمانوں بلکہ رنگ و نسل ، مذہب کی تفریق کے بغیر تمام انسانوں کے بے جا قتل کی سختی سے ممانعت کر تا ہے۔سیاسی جماعتوں میں عدم برداشت اور غیر جمہوری رویے کی وجہ سے پاکستان میں جمہوری ادارے مضبوط نہ ہو سکے ۔عدم برداشت کے بڑھتے ہوئے رحجان سے آج جمہوری ادارے زبوں حالی کا شکار ہیں ۔بلکہ اس منفی طرز عمل کے فروغ نے عوام کو جمہوریت کے ثمرات سے بھی کوسوں دور رکھا ہے۔ وسائل پر عدم اختیار اور دولت کی غیر منصفانہ تقسیم نے نہ ختم ہونے والے مسائل کو جنم دیا۔ملک کی آبادی کا بڑا حصہ آج بھی غربت کی لکیر سے نیچے زندگی گزارنے پر مجبور ہیں ۔رزق کے لیے عرصہ حیات تنگ ہونا معاشرے کے سدھار میں سب سے بڑی رکاوٹ اور قومی المیہ ہے آئین کا مکمل نفاذ ہی ملک میں مختلف اقسام کے مافیاز،سیاسی جماعتوں کے عسکری ونگز اور ناجائز دولت کے نظام حکومت و ریاست پر غلبِے کو کم اور ختم کر سکتا ہے مگر افسوس غلبہ آئین و قانون کی بجائے مسلسل مافیاز اور خاندانی سیاسی جماعتوں کے اجارہ دار قائدین اوران کے پیاروں کا ہی ہوتا رہا ہے۔قائدین کی ان اجارہ داریوں نے ملک میں سیاسی جماعتوں کی نشوونما ہونے ہی نہیں دی ۔بیڈ گورننس،قانوں کی دہری عملداری، خاندانی سیاست ،مافیا ز کا راج،کرپشن کلچرکی وجہ سے سیاسی جماعتیں طاقت پکڑہی نہ سکی اور ملک معاشی طور پر مستحکم نہ ہو سکا۔