وحدت نیوز(ملتان) مجلس وحدت مسلمین ملتان کی ضلعی شوریٰ کےرکن معروف عالم دین اور جامعہ شہید مطہری ملتان کے پرنسپل علامہ قاضی نادر حسین علوی مجلس وحدت مسلمین ملتان کے نئے سیکرٹری جنرل منتخب ہوگئے۔ ضلعی شوری کے اجلاس میں ضلع بھر کے یونٹس سیکرٹری جنرل اور کابینہ کے افراد نے شرکت کی۔ اجلاس سے ایم ڈبلیو ایم پنجاب کے ڈپٹی سیکرٹری جنرل علامہ سید اقتدار حسین نقوی، قائمقام سیکرٹری جنرل سلیم عباس صدیقی، علامہ قاضی نادر حسین علوی اور دیگر رہنمائوں نے خطاب کیا۔ اجلاس کے آخر میں علامہ قاضی نادر حسین علوی اکثریت رائے ایم ڈبلیو ایم ملتان کے نئے سیکرٹری جنرل منتخب ہوئے۔ نومنتخب سیکرٹری جنرل نے اپنے خطاب میں کہا کہ رہبر کبیر امام خمینی(ر)کے حکم پر ملتان میں ہفتہ وحدت انتہائی عقیدت اور جوش وخروش سے منایا جائے گا۔اُنہوں نے مزید کہا کہ 12ربیع الاول کو مجلس وحدت مسلمین چوک دولت گیٹ پر اہل سنت برادران کے قافلوں کو خوش آمدید کہنے کے لیے استقبالیہ کیمپ لگائے گی۔ اس موقع پر سید دلاور عباس زیدی،انجینئرمہر سخاوت،وسیم عباس زیدی سمیت دیگر رہنمابھی موجودتھے۔ علامہ قاضی نادر حسین علوی کو نئے سیکرٹری جنرل بننے پر مجلس وحدت مسلمین کے مرکزی سیکرٹری جنرل علامہ راجہ ناصر عباس جعفری، علامہ محمد امین شہیدی، صوبائی سیکرٹری جنرل پنجاب علامہ عبدالخالق اسد ی نے مبارکباد دی ہے۔