وحدت نیوز(ملتان) وحدت یوتھ پاکستان کے مرکزی سیکریٹری سید فضل عباس نقوی ایڈووکیٹ نے حالیہ دنوں کراچی شہر میں مجلس وحدت مسلمین اور وحدت یوتھ کے کارکنوں کی ٹارگٹ کلنگ کا ذمہ دار کراچی میں موجود کالعدم دہشت گرد گروہوں اور کراچی کی سب سے بڑی لسانی سیاسی جماعت کے دہشت گردوں کو قرار دیتے ہوئے حکومت سے مطالبہ کیا ہے کہ وہ شہرکراچی کو تکفیری اور لسانی سیاسی جماعت کے دہشت گردوں سے پاک کرنے کے لئے آپریشن کرے اور ملت جعفریہ سمیت کراچی کے شہریوں کو امن و امان فراہم کرے۔

وحدت یوتھ پاکستان کے مرکزی سیکریٹری سید فضل عباس نقوی نے گذشتہ دنوں کراچی میں لسانی جماعت کے دہشت گردوں کی جانب سے ٹارگٹ کلنگ کا نشانہ بنائے جانے والے کارکنوں شہید عالم، شہید صفدر عباس اور شہید سید علی شاہ کی شہادت پر گہرے دکھ اور رنج کا اظہار کرتے ہوئے کہا کہ شہادت ہمارا ورثہ ہے اور لسانی جماعت کے دہشت گردوں کو جان لینا چاہئیے کہ شہادت سے ہمارے حوصلوں کو پست نہیں کیا جا سکتا، ان کاکہنا تھا کہ مجلس وحدت مسلمین پاکستان کے مرکزی سیکرٹری جنرل کی اپیل پر جمعہ کو لسانی دہشت گرد جماعت کے خلاف لندن سمیت پاکستان بھر میں کارکنوں کی شہادت کے خلاف سخت احتجاج کیا جائے گا۔

واضح رہے کہ گذشتہ دنوں شہر کراچی میں تکفیری دہشت گردوں اور لسانی دہشت گرد جماعت کے دہشت گردوں کی فائرنگ سے تین شیعہ جوان شہید ہوئے تھے ، جن میں سے شہید صفدر عباس وحدت اسکاؤٹ کے ضلع شرقی کے انچارج تھے جبکہ شہید عالم بلدیاتی امیدوار ہونے کے ساتھ ساتھ ضلعی رہنما تھے