The Latest
وحدت نیوز(لاہور) مجلس وحدت مسلمین لاہور کے زیراہتمام لاہور پریس کلب کے باہر کوئٹہ کے قریب زائرین کی بس پر حملے کیخلاف احتجاجی مظاہرہ کیا گیا۔ مظاہرے میں خواتین اور بچوں سمیت نوجوانوں، بڑوں اور بزرگوں کی کثیرتعداد نے شرکت کی، شدید سردی کے باوجود شہریوں کی کثیر تعداد مظاہرے میں شریک ہوئی اور دہشت گردی کے خلاف احتجاج کیا۔ مظاہرین نے کتبے، پلے کارڈز اور بینرز اٹھا رکھے تھے جن پر دہشت گردی، طالبان اور حکومت کے خلاف نعرے درج تھے۔ مظاہرین لبیک یاحسین (ع)، لبیک یاحسین (ع) کا شعار بلند کرتے رہے۔ مظاہرے کی قیادت علامہ امتیاز کاظمی، علامہ جعفر موسوی اور سید اسد عباس نقوی نے کی جبکہ اس موقع پر علامہ حسن ہمدانی، علامہ ناصر عباس فاطمی، سید حسن زیدی، مظاہر شگری و دیگر رہنما بھی موجود تھے۔
رہنمائوں نے مظاہرین سے خطاب کرتے ہوئے پاکستان میں تسلسل کے ساتھ ہونے والے دہشت گردی کے واقعات کی پرزور مذمت کی اور حکومت سے مطالبہ کیا کہ وہ فی الفور کوئٹہ اور اس کے نواح میں دہشت گردوں کے ٹھکانوں اور ان کے ٹریننگ کیمپوں کے خلاف آپریشن کرے۔ مقررین نے کہا کہ زائرین کی بسوں کو نشانہ بنانا دہشت گردوں کا معمول بن چکا ہے اور حکومت کی بے حسی کی انتہا ہے کہ ہر بار صرف مذمتی بیان دے کر اپنی ذمہ داری سے عہدہ برا ہو جاتی ہے۔ رہنمائوں نے مزید کہا کہ زائرین کی بس پر یہ کوئی پہلا حملہ نہیں، اس سے قبل بھی اسی روٹ پر متعدد حملے ہو چکے ہیں لیکن حکومت اس بات کا جواب دے کہ ان دہشت گردوں کے خلاف کارروائی کیوں نہیں کی گئی، سکیورٹی ادارے کہاں ہیں؟
رہنمائوں نے کہا کہ دہشت گرد حکومت کی صفوں میں موجود ہیں، اگر حکومت نے ملت تشیع کو تحفظ فراہم نہ کیا تو مجلس وحدت مسلمین اپنے لائحہ عمل کا اعلان کرے گی، جس کے بعد کی تمام تر ذمہ داری حکومت پر عائد ہوگی۔ رہنمائوں نے کہا کہ ہماری حب الوطنی کو بزدلی سے تعبیر نہ کیا جائے۔ ہم کربلائی ہیں اور اگر ہم نے اسلحہ اٹھا لیا تو یہاں دہشت گرد بچیں گے نہ دہشت گردوں کے سرپرست، بلکہ ہم نجس دہشتگردوں پر پاک وطن کی مقدس زمین تنگ کر دیں گے، ہمارے صبر کا امتحان نہ لیا جائے۔ بعدازاں مظاہرین پرامن طریقے سے منتشر ہوگئے۔
وحدت نیوز(کوئٹہ) گذشتہ روز مستونگ میں زائرین کی بس پر ہونے والے حملے کے خلاف مجلس وحدت مسلمین کے زیراہتمام شہداء چوک کوئٹہ میں دھرنا شروع ہوگیا ہے جس میں مرد و خواتین کی بڑی تعداد شریک ہے۔ شرکاء شہداء کے جنازوں کو لئے کھلے آسماں تلے سراپا احتجاج ہیں اور حکومت سے سوال کر رہے ہیں کہ آخر کب تک ان پر حملے ہوتے رہیں گے اور قانون نافذ کرنے والے ادارے محض تماشائی کا کردار ادا کریں گے۔ دھرنے میں کوئٹہ سے ایم ڈبلیو ایم کے ایم پی اے محمد رضا رضوی سمیت مختلف شخصیات شریک ہیں۔ تازہ ترین اطلاعات کے مطابق 11:30 بجے رہنماؤں کی پریس کانفرنس ہوگی جس میں وہ آئندہ کے لائحہ عمل کا اعلان کریں گے۔ دوسری طرف کوئٹہ شہر میں شٹر ڈان ہڑتال ہے جس کے باعث نظام زندگی بالکل معطل ہے۔ پاکستان بھر کی تمام مذہبی و سیاسی جماعتوں نے مستونگ واقعہ کی شدید الفاظ میں مذمت کی ہے۔ یاد رہے کہ گذشتہ روز ہونیوالے واقعہ کی ذمہ داری بھی لشکر جھنگوی نے قبول کی ہے۔
دیگر ذرائع کے مطابق مستونگ کے علاقے درین گڑھ کے مقام پر ایران سے کوئٹہ آنے والے زائرین کی بس پر گذشتہ روز ہونے والے خودکش دھماکے میں جاں بحق ہونے والے 28 افراد میں سے 26 کی شناخت ہوگئی ہے جبکہ 2 کی شناخت نہیں ہوسکی ہے۔ میتیں سی ایم ایچ سے علمدار روڈ نیچاری امام بارہ منتقل کر دی گئی ہیں۔ سی ایم ایچ میں 40 زخمی زیر علاج ہیں۔ جاں بحق ہونے والوں کے لواحقین نے میتوں کے ہمراہ علمدار روڈ پر دھرنا دے دیا۔
وحدت نیوز(کراچی) مجلس وحدت مسلمین پاکستان کراچی ڈویژن کی جانب سے مستونگ میں زائرین کی بس پر ہونے والے بم دھماکے اور شیعہ رہنما وجاہت نقوی کی شہادت کیخلاف نمائش چورنگی پر احتجاجی مظاہرہ کیا گیا۔ احتجاجی مظاہرہ کی قیادت علامہ علی انور جعفری اور علامہ مبشر حسن نے کی۔ اس موقع پر شرکاء کی بڑی تعداد نے شیعہ نسل کشی کیخلاف شدید نعرے بازی کی۔ مظاہرے سے خطاب میں رہنماؤں کا کہنا تھا کہ سانحہ مستونگ اور وجاہت نقوی کی شہادت کی ذمہ دار وہ تمام سیاسی اور مذہبی جماعتیں ہیں جو ہزاروں بے گناہ پاکستانیوں کے قاتل طالبان سے مذاکرات کی بات کرکے ان کی جنایت کاریوں پر پردہ ڈالنے کی کوشش کرتی ہیں، یہ تمام سیاسی و مذہبی جماعتیں اپنی پالیسی کو واضح کریں اور ملکی سالمیت کو چیلنج کرنے والے، پاک فوج، اولیاء کے مزارات اور بے گناہوں کا خون بہانے والے طالبان سے اظہار برات کریں ورنہ پاکستان بھر کی مظلوم عوام ان جماعتوں کو اسمبلیوں میں جانے سے روکیں گی۔
رہنماؤں کا مزید کہنا تھا کہ کراچی میں دہشت گردوں کا راج ہے، نام نہاد آپریشن کے نام پر کئی افراد کی گرفتاریاں کرنے والے ایڈیشنل آئی جی اب تک ٹارگٹ کلنگ پر قابو پانے میں ناکام ہیں، وجاہت نقوی کی شہادت سندھ حکومت، پولیس اور رینجرز میں شامل کالی بھیڑوں کی طالبان دہشت گردوں سے ملی بھگت کا نتیجہ ہے۔ رہنماوں نے وزیراعلیٰ بلوچستان اور وزیراعلیٰ سندھ سے مطالبہ کیا کہ صوبے بھر میں بالخصوص مستونگ میں دہشت گردوں کے خلاف فی الفور فوجی آپریشن کیا جائے اور کراچی میں وجاہت نقوی کے قاتلوں کو گرفتار کرکے کیفر کردار تک پہنچایا جائے۔
وحدت نیوز(بلتستان) مجلس وحدت مسلمین پاکستان بلتستان ڈویژن کے سیکرٹری جنرل علامہ آغا علی رضوی نے کوئٹہ میں ایک بار پھر زائرین کی بس پر افسوسناک حملے کی شدید مذمت کرتے ہوئے اس واقعے کو ملک بھر میں جاری دہشت گردی اور منظّم شیعہ کشی کا تسلسل قرار دیا ہے۔ انہوں نے کہا ہے کہ زائرین کی بسوں پر تسلسل کے ساتھ حملے سکیورٹی اداروں کی غفلت کا نتیجہ ہے۔ انہوں نے کہا کہ بلوچستان کے ان علاقوں میں جہاں دہشت گردوں کی تربیت گاہیں موجود ہیں فوجی آپریشن ناگزیر ہے۔ فوجی آپریشن نہ ہونے کیصورت میں قیام امن ممکن نہیں۔ انہوں نے کہا کہ یہ اور اس طرح کے واقعات حکومت کی بزدلانہ عمل اور دہشت گردوں کی پشت پناہی کا نتیجہ ہے۔ وطن عزیز پاکستان کی افواج پر افسوسناک حملے سمیت دیگر دہشتگردی کے واقعات کے بعد بھی مذاکرات کا ڈھنڈورا پیٹنا لمحہ فکریہ ہے۔ جب تک دہشت گردوں اور باغیوں کے خلاف آہنی ہاتھوں سے نمٹا نہیں جاتا یہ سلسلہ رک نہیں سکتا۔ انہوں نے کہا کہ پاکستان دشمن طاقتیں ملک کو خانہ جنگی کی دھکیلنا چاہتی ہیں، اس کے لیے ضروری ہے کہ ریاست کی رٹ کو چیلنج کرنے والوں کو کیفر کردار تک پہنچایا جائے۔
وحدت نیوز(کوئٹہ) گذشتہ روز مستونگ میں زائرین امام رضا علیہ السلام کی بس پر ہو نے والے خودکش بم دھماکے میں مجلس وحدت مسلمین کوئٹہ کے میڈیا سیل کے رکن باسط علی ولد محمد ابراہیم بھی شہید ہو گئے ہیں ، شہید باسط علی ایک ہفتہ قبل ہی زیارت مقدسہ ایران ،عراق کے بعد واپس کوئٹہ پہنچے تھے، گذشتہ رات تفتان بارڈر سے کوئٹہ آنے والے قافلے کے استقبال کے لئے جانے والے باسط علی بھی مستونگ کے مقام پرتکفیری دہشت گردوں کے بم حملے کا نشانہ بن گئے ، شہید باسط علی کا شمار کوئٹہ کے ماہر فوٹو گرافرز میں ہو تا تھا ۔
وحدت نیوز(کوئٹہ) ایران سے کوئٹہ آنے والی زائرین کی بس کو مستونگ کے قریب نشانہ بنایا گیا۔ خودکش حملہ آور نے سو کلوگرام بارود سے بھری گاڑی بس سے ٹکرا دی، جس کے بعد آگ بھڑک اٹھی۔ دھماکے کی جگہ پر قیامت صغریٰ کا منظر ہے، دور دور تک انسانی اعضا اور سامان بکھرا پڑا ہے۔ دھماکے میں سکیورٹی کی گاڑیوں کو بھی نقصان پہنچا۔ جاں بحق اور زخمی ہونے والوں میں خواتین بھی شامل ہیں۔ انہیں کوئٹہ کے اسپتالوں میں منتقل کیا گیا۔ دہشت گردی کے واقعے میں انسانی جانوں کے ضیاع پر مختلف تنظیموں نے تین روزہ سوگ کا اعلان کیا ہے۔ ہزارہ ڈیموکریٹک پارٹی نے کوئٹہ میں ایک روزہ ہڑتال کی کال دی ہے۔ وزیراعلٰی بلوچستان عبدالمالک بلوچ نے واقعے کا نوٹس لیتے ہوئے رپورٹ طلب کر لی ہے۔ صدر ممنون حسین، وزیراعظم نواز شریف، آصف زرداری، الطاف حسین، عمران خان، منور حسن اور دیگر رہنماؤں نے واقعے کی شدید الفاظ میں مذمت کی ہے۔ ادھر کوئٹہ کے اسپتال میں موجود ایم ڈبلیو ایم کے ایم پی اے محمد رضا نے "اسلام ٹائمز" کو بتایا ہے کہ ابتک 39 زخمیوں کو لایا گیا ہے، جن میں سے 2 اسپتال پہنچ کر شہید ہوگئے ہیں، انہوں نے بتایا کہ ان کی اطلاع کے مطابق، جائے وقوع پر 18 ڈیڈباڈیز پڑی ہیں، امدادی ٹیمیں پہلی فرصت میں زخمیوں کو اسپتال منتقل کر رہی ہیں۔
واضح رہے کہ بلوچستان میں زائرین کی بس پر حملہ اپنی نوعیت کا پہلا واقعہ نہیں۔ دہشتگرد اس سے پہلے بھی درجنوں افراد کو موت کی نیند سلا چکے ہیں۔ یکم جنوری دو ہزار چودہ کو ایران سے آنے والی زائرین کی بس کوئٹہ مشرقی بائی پاس پر نشانہ بنی۔ واقعہ میں تین افراد جاں بحق اور انچاس زخمی ہوئے۔ اس سے پہلے چھبیس اکتوبر دو ہزار تیرہ کو مستونگ میں بس کو اڑانے کی کوشش کی گئی، جسے ناکام بناتے ہوئے دو ایف سی اہلکار جام شہادت نوش کرگئے۔ تیس دسمبر دو ہزار بارہ کو بھی مستونگ میں ہی زائرین کے خون سے ہولی کھیلی گئی۔ دہشتگردوں کے حملے میں انیس افراد جاں بحق اور متعدد زخمی ہوئے۔ اسی سال اکیس دسمبر کو بھی زائرین کی بس نشانہ بنی۔ دہشتگردوں نے تین افراد کی جانیں لے لیں۔ انیس ستمبر دو ہزار بارہ کو بھی دہشتگردی کے واقعہ میں تین زائرین جاں بحق اور نو زخمی ہوئے۔ آٹھ جون دو ہزار بارہ کو ایران جانے والی بس کو نشانہ بنایا گیا جس میں چھ افراد جان سے گئے۔ اسی ماہ کی گیارہ تاریخ کو بھی ایک بس کو ریموٹ کنٹرول ڈیوائس سے اڑا دیا گیا۔ دوسری جانب کالعدم لشکر جھنگوی نے واقعہ کی ذمہ داری قبول کرلی ہے۔
دیگر ذرائع کے مطابق مستونگ کے علاقے درین گڑھ میں بس کے قریب دھماکہ ہوا ہے۔ لیویز ذرائع کے مطابق کوئٹہ سے 80 کلومیٹر دور مستونگ کے علاقے میں زائرین کی بس میں دھماکہ ہوا ہے۔ ذرائع کے مطابق زائرین کی دو بسیں ایران سے تفتان کے راستے کوئٹہ آ رہی تھیں کہ انہیں نشانہ بنایا گیا۔ دھماکے کے بعد بس میں آگ لگ گئی۔ واقعہ کے بعد سکیورٹی فورسز اور امدادی ٹیمیں جائے وقوعہ پر پہنچ گئیں۔ سکیورٹی فورسز نے علاقے کو گھیرے میں لے کر سرچ آپریشن شروع کر دیا۔ اسسٹنٹ کمشنر کے مطابق بس پر حملے میں 24 افراد جاں بحق جبکہ متعدد سے زائد زخمی ہوگئے اور زخمیوں میں زیادہ تر لیویز اہلکار شامل ہیں، زخمیون کو قریبی اہسپتال متقل کیا جا رہا ہے۔ سکیورٹی ذرائع کے مطابق بس پر حملے میں 100 کلو گرام بارودی مواد استعمال کیا گیا۔ ذرائع کا کہنا تھا کہ بس میں سوار تمام افراد شہید ہوگئے ہیں۔
وحدت نیوز(ملتان) مجلس وحدت مسلمین پاکستان کے وفد نے کراچی میں ایکسپریس نیوز کے کارکنوں کی شہادت پر تعزیت کرنے کے لیے ملتان میں ایکسپریس نیوز کے دفتر کا دورہ کیا۔ ایم ڈبلیو ایم کے وفد میں مرکزی سیکرٹری وحدت یوتھ سید فضل عباس نقوی، ضلعی سیکرٹری جنرل علامہ سید اقتدار حسین نقوی، علامہ قاضی نادر حسین علوی، محمد عباس صدیقی، ثقلین نقوی، مرزا وجاہت علی اور آئی ایس او کے ڈپٹی سیکرٹری جنرل شامل تھے۔ وفد نے اس موقع پر ریذیڈنٹ ایڈیٹر سے ملاقات کی اور کراچی میں ہونے والے واقعے کے شہداء کی ایصال ثواب کے لیے فاتحہ خوانی کی۔ ریذیڈنٹ ایڈیٹر نے ایم ڈبلیو ایم کے وفد کا شکریہ ادا کرتے ہوئے کہا کہ اسلام میں کسی بھی شخص کو اجازت نہیں کہ وہ کسی بے گناہ کی جان لے۔ ایک مخصوص مائنڈ سیٹ طاقت کی بناء پر ملک پر قبضہ کرنا چاہتا ہے۔ ایکسپریس نیوز پر ہونیوالا اس بات کا شاہد ہے کہ ہم کسی بھی ملک دشمن طاقت کی حمایت نہیں کرتے۔ ایم ڈبلیو ایم کے رہنمائوں نے کہا کہ ہم ایکسپریس نیوز کے کارکنوں کی شہادت پر ایکسپریس فیملی کو تعزیت پیش کرتے ہیں اور آپ کی جرات اور استقامت کی داد دیتے ہیں اور اُمید کرتے ہیں کہ آپ کا ادارہ اسی طرح ملک دشمن عناصر کو بے نقاب کرتے رہے گا
وحدت نیوز(کوئٹہ) مجلس وحدت مسلمین کوئٹہ ڈویژن سے جاری کردہ بیان کے مطابق کوئٹہ ڈویژن کی کابینہ کے عہدیداروں اوررکن صوبائی اسمبلی آغا محمد رضانے علمدار روڈنوآبادکے علاقے میں عوامی رابطہ مہم کے سلسلے میں حلقہ کے بزرگو ں اورجوانوں سے خطاب کرتے ہوئے کہاکہ2 فروری کوکوئٹہ میں منعقدہونے والا \"پیام شہداء اوراتحادامت کانفرنس \" کاسیلاب ملک سے قومی، لسانی ، مذہبی ،مسلکی تعصبات ،نفرتوں ، انتہاپسندی اوردہشت گردی کوبہاکرلے جائے گا،دہشت گردی کے خلاف شیعہ سنی اتحاد سیسہ پلائی ہوئی دیوارثابت ہورہاہے۔پاکستان بچانے اورپاکستان میں امن و امان قائم کرنے کے لئے شیعہ سنی عوام جانوں کانذرانہ پیش کررہے ہیں۔امن کے راستے میں شہیدہونے والے بے گناہ معصوم انسانوں کارائیگاں نہیں جائے گا۔ہم شہیدہونے والے شیعہ سنی عوام نیز شہیدہونے والے پاک فوج اورسیکیورٹی کے اہلکاروں کوسلام پیش کرتے ہیں۔
رکن صوبائی اسمبلی آغامحمدرضانے کہا کہ اسلام امن اورپیارکاپیغام دیتاہے۔ جوعناصرخودکُش حملے کروارہے ہیں وہ اسلام اورانسانیت کے دائرہ کارسے خارج ہیں۔ دہشت گردوں کا دوردورتک اسلام اورپاکستان سے کوئی تعلق نہیں۔ معصوم انسانوں کوٹارگٹ کلنگ کانشانہ بنانے والے اورمعصوم انسانوں پرخودکُش حملے کرنے والے انسان اورانسانیت کے دشمن ہیں۔ آغامحمدرضانے پچاس ہزارمعصوم پاکستانیوں کے قاتلوں اورمٹھی بھردہشت گردٹولے سے مذاکرت کویکسر مسترد کرتے ہوئے مطالبہ کیاکہ راولپنڈی میں سیکیورٹی فورسزپرخودکُش حملوں کے کے پیچھے ملوث دہشت گردوں کوفی الفورگرفتارکرکے عبرتناک سزادی جائے اورکہاکہ اب وقت آچکاہے کہ پاکستان اورپاکستانیوں کے مفادات کوسامنے رکھتے ہوئے اِن دہشت گردوں کے خلاف ملک کے کونے کونے میں سخت ترین کاروائی عمل میں لاکرپاکستان سے اِن دہشت گردوں کے ناپاک وجودکافوری خاتمہ کیاجائے ،رکن صوبائی اسمبلی جناب آغامحمدرضانے نے بنوں اورراولپنڈی میں شہیدہونے والے معصوم پاکستانیوں اورشہیدہونے والے سیکورٹی کے اہلکاروں کے ورثاء سے دلی ہمدردی کا اظہارکیااورشہداء کے درجات کی بلندی کے لئے دعاکی۔
وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے منگل کی شام کو مستونگ کے علاقے میں زائرین کی بس پر ہونے والے دہشت گردانہ حملے کی شدید مذمت کرتے ہوئے اس حملے کو طالبان دہشت گردوں کی بزدلانہ کاروائی قرار دیتے ہوئے وزیر اعظم نواز شریف اور افواج پاکستان کے سربراہ جنرل راحیل شریف سے مطالبہ کیا ہے کہ وہ مظلوم پاکستانیوں کے دلوں کی آواز کو سنیں اور پاکستان کے دشمن اور اسلام کے دشمن طالبان دہشت گردوں کے خلاف سخت کاروائی عمل میں لائی جائے، علامہ راجہ ناصر عباس جعفری نے پاکستان کے امن کو طالبان دہشت گردوں کے خاتمے سے مشروط کرتے ہوئے کہا کہ ملک د شمن اور اسلام دشمن طالبان دہشت گردوں کے خاتمے کے بغیر پاکستان میں امن قائم نہیں کیا جا سکتا، نواز شریف اور عمران خان جیسا بزدل حکمران پاکستان کے عوام نے ملکی تاریخ میں نہیں دیکھا ، فوج دہشت گردی کے خلاف عوام کی آخری امید ہے، مستونگ میں زائرین کی بس پر ہونے والے دہشت گردانہ حملے کی بھرپور مذمت کرتے ہیں۔
مجلس وحدت مسلمین پاکستان کے مرکز ی سیکرٹری جنرل علامہ راجہ ناصر عباس جعفری نے مستونگ میں زائرین پر حملے کے نتیجے میں شہید ہونے والے شہداء کے لواحقین اور زخمیوں کو صبر کی تلقین کرتے ہوئے پوری قوم کو صبر سے کام لینے کی تلقین کی اور کہا کہ ملک دشمن اور اسلام دشمن طالبان دہشت گرد اس طرح کی بزدلانہ کاروائیوں سے پاکستانی قوم کے حوصلوں کو پست نہیں کر سکتے، علامہ راجہ ناصر عباس جعفری نے ملک بھر میں ہونے والی دہشت گردانہ کاروائیوں اور سیکورٹی فورسز پر ہونے والے حملوں سمیت کراچی میں پولیو کے قطرے پلانے والے رضاکاروں کی شہادت سمیت لاہور میں قتل کئے جانے والے معروف مصنف اصغر ندیم سید اور پشاور میں ٹارگٹ کلنگ کا نشانہ بنائے جانے والے معروف عالم دین مولانا عالم شاہ موسوی کی شہادت کو ملک دشمن اور اسلام دشمن طالبان دہشت گردوں کی کاروائی قرار دیتے ہوئے طالبان کو مملکت خداداد پاکستان کے ئے سنگین خطرہ قرار دیا اور حکومت سے مطالبہ کیا ہے کہ حکومت ہوش کے ناخن لے اور طالبان دہشت گردوں سے خوفزدہ ہونے کے بجائے آہنی ہاتھوں سے نمٹا جائے ۔
وحدت نیوز(کراچی) پولیو ٹیم پر دہشت گردوں کا حملہ اور تین ورکرز کی ہلاکت کی پرزورمذمت کر تے ہیں ،ملک کے کسی حصے میں ملک کا کوئی شہری محفوظ نہیں ، فوج ، ایف سی، عام شہری روز دہشت گردی کی بھینٹ چڑھ رہے ہیں ، شمالی وزیرستان میں طالبان دہشت گردوں کے مراکز پر افواج پاکستان کے کامیاب آپریشن کا خوش آئند قرار دیتے ہیں ،ملکی حدود میں موجود ایک دہشت گرد کی موجودگی تک بھر پو ر آپریشن جاری رہنا چاہئے، معروف ڈرامہ نگا ر اصغر ندیم سید پر قاتلانہ حملہ انتہائی قابل مذمت فعل ہے ۔ ان خیالا ت کا اظہار مجلس وحدت مسلمین پاکستان صوبہ سندھ کے سیکریٹری جنرل علامہ مختار احمد امامی نے کراچی میں علمائے کرام کے وفد سے گفتگو کر تے ہو ئے کیا ۔
ان کا کہنا تھا کہ ملک بھر خصوصاً کراچی میں دہشت گردوں کا منظم نیٹ ورک بے گناہ شہریوں کی ٹارگٹ کلنگ میں مصروف ہے، پولیس و رینجرز کے اعلیٰ حکام روز ٹارگٹ کلرز کی گرفتاری کی دعوے کرتے ہیں، آج تک کسی ایک کلر کو بھی سزا نہیں دی گئی ، جب تک سفاک دہشت گردوں کو تختہ دار پر نہیں لٹکایا جائے گا ، ملک میں قیام امن کا خواب کبھی شرمندہ تعبیر نہیں ہو گا، کراچی میں عا م شہریوں کے ساتھ ساتھ عوا م کی خدمت پر معمور پولیو ورکرز بھی دہشت گردوں کی بربریت کا نشانہ بنایا گیا، بزدل دہشت گرد نہتی خواتین کو بھی گولیوں کا نشانہ بنارہے ہیں ، بنوں اور راولپنڈی میں فوجی جوانوں اور شہری آبادی کو نشانے بنانا ملکی سالمیت پر حملے کے مترادف ہے، انہوں نے ملک دشمن عناصر کی جانب سے معروف ڈرامہ نگار اصغر ندیم سید پر قاتلانہ حملے کی شدید الفاظ میں مذمت کی ۔
انہوں نے شمالی وزیرستان میں پاک فوج کی طالبان دہشت گردوں کے ٹھکانوں پر کامیاب کاروائی پر درعمل کا اظہار کر تے ہو ئے کہا کہ پاک فوج کا دہشت گردوں کے خلاف بھر پو ر آپریشن خوش آئند ہے ، اٹھارہ کروڑ عوام فوج کے شانہ بشانہ دہشت گردوں کے خاتمے کی جنگ لڑنے کے لئے آمادہ ہیں ، انہوں نے چیف آف آرمی اسٹاف سے مطالبہ کیا کے شمالی وزیر ستان کی طرز کا آپریشن کراچی ، لاہور ، کوئٹہ ، ڈیرہ اسماعیل خان ، راولپنڈی ،اسلام آباد، پشاور سمیت ملک بھر میں کیا جائے ۔
