وحدت نیوز(لکی مروت) مجلس وحدت مسلمین خیبر پختونخوا کے سیکرٹری جنرل علامہ اقبال بہشتی نے صوبہ کے جنوبی اضلاع کے دورے کے دوران ضلع لکی مروت کا دورہ بھی کیا، اس موقع پر انہوں نے چہلم شہدائے کربلا کے جلوس میں شرکت کی اور عزاداری میں بھی شریک ہوئے، علاوہ ازیں علامہ اقبال بہشتی نے شیعہ، سنی عمائدین سے ملاقات کی اور تعلیمات اہلبیت (ع) کی تشہیر کے حوالے سے تبادلہ خیال کیا، اس موقع پر ان کا کہنا تھا کہ وطن عزیز جس صورتحال سے گزر رہا ہے، اس میں شیعہ، سنی کو متحد ہوکر اپنا کردار ادا کرنا ہوگا، دشمن کی یہ کوشش رہی ہے کہ وہ ہمیں ایک دوسرے سے جدا رکھے اور اختلافات کو فروغ دے، تاہم اتحاد کے ذریعے ہم دشمن کی اس سازش کو ناکام بناسکتے ہیں۔ علاوہ ازیں لکی مروت میں مجلس وحدت مسلمین کی تنظیم سازی کے حوالے سے بھی علامہ اقبال بہشتی نے مقامی افراد کیساتھ بات چیت کی۔

وحدت نیوز (اسلام آباد) اسلام آباد ہائیکورٹ کے جسٹس نور الحق قریشی نے ممتاز عالم دین اور مجلس وحدت مسلمین کی شوری عالی کے رکن  علامہ امین شہیدی کا نام فورتھ شیڈول سے نکالنے کا حکم جاری کر دیا ہے۔ تفصیلات کے مطابق علامہ امین شہیدی کے وکیل آصف ممتاز ملک ایڈووکیٹ نے سماعت کے دوران عدالت میں مؤقف اپنایا کہ میرے موکل کا 2006ء سے فورتھ شیڈول میں نام شامل ہے جبکہ قانون کے مطابق تین سال سے زیادہ عرصہ تک کسی کا نام فورتھ شیڈول میں نہیں رکھا جاسکتا۔ انہوں نے کہا کہ علامہ امین شہیدی کا نام کالعدم تحریک جعفریہ سے تعلق کی بناء پر فورتھ شیڈول میں ڈالا گیا جوکہ وزارت داخلہ کی سراسر بدنیتی کی دلیل ہےحالانکہ ان کا تعلق تحریک جعفریہ سے نہیں ہے، سرکاری وکیل نے جج کے سامنے صفائی پیش کرتے ہوئے کہا کہ سرکار نے علامہ امین شہیدی کو فرقہ وارانہ سرگرمیوں میں ملوث ہونے کے باعث شیڈول فورمیں ڈالا تھا جس پر عدالت نے علامہ امین شہیدی کا نام فورتھ شیڈول سے نکالنے کا حکم دیدیا۔

وحدت نیوز (کراچی) کراچی کی انسداد دہشت گردی عدالت نے آل پاکستان شیعہ ایکشن کمیٹی کے سربراہ علامہ مرزایوسف حسین کی ضمانت منظور کرلی ہے، تفصیلات کے مطابق علامہ مرزایوسف حسین کو پچاس ہزارروپے کے ضمانتی مچلکوں کے عیوض رہاکرنے کا حکم جاری کردیا گیا ہے، دوہفتے قبل بزرگ عالم دین اور شیعہ سنی اتحاد کے داعی علامہ مرزایوسف حسین کوسکیورٹی اہلکاروں نے رات گئے ان کی رہائش گاہ جامع مسجد نورایمان ناظم آباد کراچی سے گرفتار کیا تھا، ان پر  شہید خرم زکی کے جلوس جنازہ کے موقع پراشتعال انگیز تقریر کرنے کا الزام عائد کیا گیا تھا اور لائوڈ سپیکر ایکٹ کے تحت انکی گرفتاری عمل میں لائی گئی تھی، علامہ مرزایوسف حسین کی بلاجواز گرفتاری کے خلاف مجلس وحدت مسلمین نے ہر فورم پر مسلسل آواز احتجاج بلند کی ، احتجاجی مظاہرے ، پریس کانفرنس اوراعلیٰ حکومتی وعسکری شخصیات سے ملاقاتوں میں علامہ مرزایوسف حسین کی بلاجواز حراست کی مزمت کی گئی بالآخر عدالت انہیں ضمانت پر رہا کرنے پر مجبور ہوئی۔ان کی جیل سے رہائی کے موقع پر ایم ڈبلیوایم کے چیئرمین سپریم کونسل علامہ شیخ صلاح الدین، ڈویژںل رہنما میثم عابدی، علامہ مبشر حسن، علامہ نشان حیدر ساجدی ودیگر بھی استقبال کے لئے موجود تھے۔

وحدت نیوز (اسلام آباد) مجلس وحدت مسلمین پاکستان کے مرکزی سیکریٹری امور سیاسیات سید اسد عباس نقوی نے وفاقی حکومت کی جانب سے ملک بھر میں قائم ترک اسکول سسٹم کی بندش کےاحکامات پر شدید تنقید کرتے ہوئے کہا کہ دہشت گرد مدارس کے بجائے ترک اسکولوں کی بندش حکومت پاکستان کا غیر منطقی اقدام ہے، پاکستان ، اس کے ریاستی اداروں ،قومی اثاثوں اور بے گناہ عوام کو جتنا شدید جانی ومالی نقصان تکفیری دہشت گرد مدارس نے پہنچا یا کسی اور نے نہیں، حکمرانوں کی جانب سے ایسے دہشت گرد مدارس کو فری ہینڈ دینااور ترک اسکولز سسٹم کو بند کرنا سمجھ سے عاری فیصلہ ہے، انہوں نے کہا کہ ترک اسکول سسٹم کی بندش سے ہزاروں طلباءکی تعلیمی سرگرمیاں متاثر اور ہزاروں اساتذہ اور ملازمین بے روز گارہوگئے جس کا ازالہ کرنے کیلئے حکومت کے پاس کوئی ٹھوس اور موثر پلان موجود نہیں ، اسد عباس نقوی نے کہا کہ بظاہر ایسا معلوم ہوتا ہے کہ ان اسکولوں کی بندش کا فیصلہ وفاقی حکومت نے جلد بازی میں کیا اور اس کا مقصدترک صدر اور آل سعود کی خوشنودی کے سوا کچھ نہیں ۔

وحدت نیوز (اسلام آباد) پاکستان کے عالمی شہرت یافتہ کوہ پیماء،فخر پاکستان حسن سدپارہ کے انتقال پر مجلس وحدت مسلمین کے مرکزی سیکریٹری جنرل علامہ راجہ ناصرعباس جعفری،مرکزی ڈپٹی سیکریٹری جنرل سید ناصرعباس شیرازی اور گلگت بلتستان کے صوبائی سیکریٹری جنرل علامہ آغا سید علی رضوی نے مرکزی سیکریٹریٹ سے جاری مشترکہ تعزیتی بیان میں حسن سدپارہ کی رحلت کو قومی نقصان قرار دیا ہے، رہنمائوں نے کہا کہ قومی ہیرو کی مفلسی کے عالم موت عیاش طبیعت حکمرانوں کے منہ پر تماچہ ہے، افسوس ناک بات یہ ہے کہ پاکستان کا نام عالمی سطح پر روشن کرنےوالے اس قومی ہیرو کی میت اس کے آبائی علاقے منتقل کرنے کیلئے حکومت کی جانب سے کوئی خاطر خواہ انتظام تک نہ کیا گیا اور اہل خانہ پرائیوٹ وین کی چھت پر میت رکھ کر لے جانے پر مجبور ہوئے، رہنمائو ں نے اس عظیم سرمائے کے نقصان پر اہلیان گلگت بلتستان اور پسماندگان سے دلی تعزیت کا اظہارکیا ہے اور مرحوم کی مغفرت کی دعا کی ہے۔

وحدت نیوز (راولپنڈی) مجلس وحدت مسلمین پاکستان کے مرکزی رہنما و شوریٰ عالی کے رکن علامہ امین شہیدی نے راولپنڈی میں چہلم سید الشہدا امام حسین علیہ السلام کے مرکزی جلوس کے شرکا سے خطاب کرتے ہوئے کہا کہ چودہ سو سال قبل میدان کربلامیں سے اٹھنے والی ہل من ناصر ینصرنا کی آواز پر آج پوری دنیا لبیک یاحسینؑ کی صدائیں بلند کر رہی ہے جو اس بات کی دلیل ہے کہ حسینی آج بھی زندہ و بیدار ہیں۔انہیں جبر و استبداد سے دبانے کی کوئی کوشش کبھی کامیاب نہیں ہوسکتی۔اس وقت پاکستان سمیت دنیا بھر میں ملت تشیع کے خلاف وہ باطل قوتیں متحرک ہیں جن کی اصل دشمنی اسلام سے ہے ۔ شیعت کو اسلام کا مضبوط دفاع سمجھتے ہوئے وہ اسے نشانہ بنانے کے لیے ایڑی چوٹی کا زور لگا رہی ہیں۔ان قوتوں کے مقدر میں سوائے ناکامی کے اور کچھ نہیں ہے۔انہوں نے کہا آل سعود کی ایما پر پاکستان میں ہمیں دیوار سے لگانے کی کوشش کی جا رہی ہے۔ دہشت گردی کے واقعات کے ساتھ ساتھ ہمیں ریاستی جبر کا بھی سامنا کرنا پڑ رہا ہے۔ملک کے مقتدر شیعہ علما اوران فعال شخصیات کوریاستی ادارے انتقام کا نشانہ بنایا رہے ہیں جن کی حب الوطنی روز روشن کی طرح آشکار ہے۔گرفتاریاں اور اس طرح کے مذموم حکومتی ہتھکنڈوں کے ذریعے ہمیں حسینی مشن سے دور نہیں رکھا جا سکتا۔ حسینی فکر کے پیروکار حق کی راہ میں قربان تو ہو سکتے ہیں لیکن اپنے اصولی موقف سے کبھی دستبردار نہیں ہو سکتے۔انہوں نے کہا کہ ہمارا جرم محض اتنا ہے کہ ہم شیعہ ہیں، ہم یزیدیت کے خلاف آواز بلند کرنا جانتے ہیں۔انہوں نے کہا کہ نیشنل ایکشن پلان کا مقصد دہشت گردی کا خاتمہ تھا لیکن پولیس انتظامیہ دہشت گردوں کی بجائے پُرامن شہریوں کے خلاف استعمال کر کے اس قانون کی افادیت کو مشکوک بنا رہی ہیں۔ سپیکر ایکٹ کے تحت ان لوگو ن کے خلاف مقدمات درج کیے جا رہے ہیں جو سپیکر پر رواداری، حب الوطنی اورامن و آشتی کا درس دیتے ہیں جبکہ اس کے برعکس ان لوگوں کو کھلی آزادی حاصل ہے جو سپیکر کو شر انگیزی، مذہبی تعصب اورتفرقہ بازی کے لیے استعمال کرنے میں مصروف ہیں۔ یہ نیشنل ایکشن پلان سے انحراف اورآئین و قانون کی توہین ہے۔انہوں نے کہا کہ اس وقت دنیا بھر میں مسلمان مظالم کا شکار ہیں۔ کشمیر، فلسطین،یمن،نائجیریا اور شام سمیت ہم دنیا بھر کے مظلوموں کی بلا تخصیص مذہب و مسلک حمایت کرتے ہیں ۔سعودی عرب کے مقدسات کے خلاف میلی نظر سے دیکھنے والا مسلمان نہیں ہو سکتاہے۔ حرم شریف کا دفاع ہر مسلمان پر واجب ہے۔عالم اسلام کو یہ بات سمجھنا ہو گی کہ سعودی بادشاہت الگ چیز ہے اور حرمین شریفین الگ۔ سعودی حکومت اپنی بادشاہت کو بچانے کے لیے حرم کی آڑ میں چھپ کر مسلمانوں کو گمراہ کر رہی ہے۔انہوں نے کہا کہ کعبہ کو مسلمانوں کے کسی مسلک سے خطرہ نہیں بلکہ ان عناصرسے خطرہ ہے جنہوں نے صحابہ کرام رضوان اللہ علیہ کے مزارات کو تباہ کیا، جنہوں نے رسول زادی سلام اللہ علیہا کے مقبرے کو مسمار کیا۔علما کے لبادے میں چھپے ہوئے مغربی استعمار کے یہ ایجنٹ اسلام کے لیے اصل خطرہ ہیں۔اس پُرتشدد فکر کو شکست دینے کے لیے عالم اسلام کی تمام معتدل مذہبی قوتوں کو ایک دوسرے کے قریب آنا ہو گا۔اسلام دشمن قوتوں کی شکست عالم اسلام کے اتحاد و اخوت میں مضمر ہے۔