وحدت نیوز(کراچی) مجلس وحدت مسلمین پاکستان کے مرکزی ترجمان علامہ مقصود علی ڈومکی نے نائیجیریا کے ممتاز عالم دین علامہ محمد ابراہیم زکزاکی کی بلاجواز قید اور صحت کے حوالے سے اپنی تشویش کا اظہار کرتے ہوئے مطالبہ کیا ہے کہ انہیں فورا رہا کیا جائے۔

انہوں نے کہا کہ علامہ محمد ابراہیم زکزاکی نائیجیریا سمیت دنیا بھر کے کروڑوں انسانوں کے محبوب رہنما ہیں جنہیں عالمی سامراجی قوتوں کے انسان دشمن ایجنڈے کے تحت بلا جواز قید میں رکھا گیا ہے۔

 انہوں نے نائیجیریا میں جاری شیعہ نسل کشی پر بھی اپنی تشویش کا اظہار کرتے ہوئے کہا کہ موصولہ اطلاعات کے مطابق علامہ محمد ابراہیم زکزاکی کو جیل میں زھر دیا گیا ہے جس کے باعث دنیا بھر کے کروڑوں لوگ اس عظیم انسان کی صحت کے سلسلے میں شدید پریشان ہیں۔

انہوں نے کہا کہ نائیجیرین حکومت اپنے ملک کی اعلی عدالت کے احکامات اور انصاف کے تمام تر تقاضوں کو نظر انداز کر کے اغیار کی خوشنودی حاصل کرنا چاہتی ہے۔

انہوں نے کہا کہ علامہ محمد ابراہیم زکزاکی کے 6 بیٹے شہید کئے گئے اور انہیں ان کی اہلیہ سمیت قید تنہائی میں رکھا گیا ہے جو نائیجیرین حکومت کی بربریت کا ثبوت ہے۔انہوں نے کہا کہ اگر خدانخواستہ علامہ محمد ابراہیم زکزاکی کو کچھ ہوا تو اس کی تمام تر ذمہ داری نائیجیرین حکومت پر ہوگی۔

وحدت نیوز(لاہور) مجلس وحدت مسلمین لاہور کے زیراہتمام جانثاران امام عصرؑ کنونشن کا جامعہ مسجد امامیہ لوکوشیڈ مغلپورہ لاہور میں انعقاد کیا گیا۔کنونشن میں شمالی لاہور ( واہگہ ٹاؤن ، گلبرگ ٹاؤن ، عزیز بھٹی ٹاؤن ، کنٹونمنٹ بورڈ اور شالیمار ٹاؤن ) کے سیکرٹری جنرل کا انتخاب کیا گیا۔بردار نجم عباس سابقہ ڈپٹی سیکرٹری لاہور بلا مقابلہ سیکرٹری جنرل منتخب کر لیے گئے۔

کنونشن میں لاہور کے سابقہ کابینہ سمت شمالی لاہور کے 55 یونٹس کی شرکت کے ساتھ ساتھ صوبائی سیکرٹری جنرل سینٹرل پنجاب علامہ عبدالخالق اسدی ، صوبائی ڈپٹی سیکرٹری جنرل علامہ اقبال کامرانی، اور صوبائی سیکرٹری تنظیم سازی علامہ حسن رضا ہمدانی ، صوبائی سیکرٹری سیاسیات بردار حسن کاظمی، صوبائی سیکرٹری روابط بردار رائے ناصر اور صوبائی سیکرٹری عزاداری بردار رانا ماجد نے بھی شرکت کی ۔

الیکشن کے بعد علامہ اقبال کامرانی نے شمالی لاہور کے منتخب ہونے والے سیکرٹری جنرل بردار نجم عباس سے حلف لیا۔بعدازاں بردار نجم عباس نے شمالی لاہور کے کارکنان سے خطاب کرتے ہوئے کہا کہ یہ ایک الہی ذمہ داری ہے اور ہم سب کو اس کا جوابدہ امام زمانہ علیہ السلام عج کے سامنے ہونا ہے اس لئے میں اپنی پوری کوشش کروں گا کہ اپنی ذمہ داریوں کو احسن طریقے سے انجام دوں۔

وحدت نیوز(بھکر) برادر سفیر حسین شہانی ایڈوکیٹ مجلس وحدت مسلمین پاکستان ضلع بھکر کے نئے میر کارواں منتخب۔سیکریٹری جنرل ایم ڈبلیوایم جنوبی پنجاب علامہ سید اقتدار حسین نقوی نے جانثاران امام عصر کنونشن میں خطاب کرتے ہوئے برادر سفیر حسین شہانی کو نئے سیکرٹری جنرل ضلع بھکر منتخب ہونے پر مبارک باد دی اور حلف لیا۔ اس موقع پر قاضی نادر حسین علوی مسئول شعبہ خواتین مجلس وحدت مسلمین پاکستان جنوبی پنجاب، انجینئر مہر سخاوت علی سیکرٹری سیاسیات ، سابقہ ضلعی کابینہ ، یونٹس اور کثیر تعداد میں مومنین موجود تھے ۔

وحدت نیوز(لاہور) کل مسالک علماء بورڈ کے وفد کی مجلس وحدت مسلمین پاکستان کے صوبائی سیکریٹریٹ لاہور آمد ۔اسدعباس نقوی کو وزیر اعلی پنجاب کے فوکل پرسن برائے بین المذاہب ہم آہنگی مقرر ہونے پر مبارکباداوردستار بندی ۔

 تفصیلات کے مطابق کل مسالک علماءبورڈ پنجاب کے وفد نے وحدت ہاؤس لاہور میں ایم ڈبلیوایم کے مرکزی سیکریٹری امور سیاسیات اسدعباس نقوی کوبطور فوکل پرسن وزیراعلیٰ پنجاب برائے بین المذاہب ہم آہنگی مقرر ہونے پر مسرت کا اظہار کرتے ہوئے پھول اور مٹھائی پیش کی اور تمام علماء کی طرف مکمل تعاون کی یقین دہانی کروائی۔

کل مسالک علماءبورڈ پنجاب کے وفدنے اس موقع پر اسدعباس نقوی کی دستار بندی بھی کی اور ان کی مزید کامیابی اور اتحاد بین المسلمین کیلئے خصوصی دعا کی مانگی گئی ۔ اسدعباس نقوی نے کل مسالک علماءبورڈ پنجاب کے وفدکا آمد پر شکریہ اداکیااور ان کے لئے نیک خواہشات کا اظہار کیا۔

اس موقع پرمخدوم عاصم ، مفتی عاشق حسین ، پیر سید نوبہار شاہ ، علامہ عامر چشتی ، جمعیت علمائے پاکستان (نیازی )کے مرکزی جنرل سیکریٹری ڈاکٹر امجد چشتی ، ایم ڈبلیوایم کے صوبائی رہنما مولانا حسن رضا ہمدانی ودیگر رہنما بھی موجود تھے ۔

وحدت نیوز(منڈی بہاؤالدین) مجلس وحدت مسلمین منڈی بہاوالدین کا امام بارگاہ موسیٰ کاظم ع میں انتخابی اجلاس منعقد ہوا۔جس میں 25 گاؤں کے یونٹس سیکرٹری جنرلز صاحبان نے شرکت کی جن کے علاوہ بزرگ عالم دین علامہ صفدر حُسین صفدری اور صوبائی سیکرٹری جنرل ایم ڈبلیو ایم پنجاب علامہ عبدالخالق اسدی مہمان خُصوصی تھے۔

اجلاس کا باقاعدہ آغاز تلاوت قرآن پاک نعت و قصیدہ سے ہوا جس کے بعد مولانا اسد عباس نے اجلاس کی مکمل تفصیلات اور ایجنڈا پیش کیا جس کے بعد سابقہ ضلعی سیکرٹری جنرل ایم ڈبلیو ایم مولانا مظہر عباس ہادی صاحب نے اپنی تین سالہ کارکردگی بیان کی اور اپنی مُدت کے اختتام پے استعفیٰ پیش کیا جس کے بعد نئے انتخابات کا مرحلہ شروع ہوا ۔

الیکشن کمیشن کے فرائض علامہ عبدالخالق اسدی اور علامہ صفدرحُسین صفدری صاحب نے سنبھالے الیکشن میں تین امیدواروں میں سخت مقابلے کے بعد معزز و مُحترم سابقہ ریٹائرڈ ڈی۔ ایس۔ پی ملک قمر عباس صاحب ہیلاں والے کامیاب ٹھرے جن کی کامیابی پے ہال لبیک یا حُسین کے نعروں سے گونج اُٹھا۔

نئے ضلعی سیکرٹری جنرل ملک قمر عباس صاحب سے صوبائی سیکرٹری ایم ڈبلیو ایم پنجاب علامہ عبدالخالق اسدی نے حلف لیا جس کے بعد پہلے خطاب میں ملک قمر عباس صاحب نے شرکاء کنونشن اورایم ڈبلیو ایم کے ورکرز کو یقین دھانی کروائی کہ انشاء اللہ اپنی تمام تر توانائیاں صرف کر کے جماعت کو مضبوط کرونگا اور اس پلیٹ فارم سے ملک و ملت کی سربلندی اور استحکام کے لیے بھرپور جدوجہد جاری رکھیں گے۔

عزاداری مظلومِ کربلا میں رکاوٹوں کو برداشت نہیں کیا جاے گا ۔ہم امن کے داعی ہیں انشاء اللہ تمام مسالک کے ساتھ مل جُل کر اتحاد و وحدت کی مثال قائم کرینگے ۔جس کے بعد علامہ صفدر حُسین صفدری صاحب نے دعائے امام زمانہ ع پے محفل کے اختتام کیا ۔

وحدت نیوز(کوئٹہ) چیف آف ہزارہ قبائل سردار سعادت علی خان کی ناگہانی موت ملک و قوم کیلئے ایک عظیم نقصان ہے۔مرحوم کی قومی سماجی خدمات کو ہمیشہ یاد رکھا جائیگا۔مجلس وحدت مسلمین پاکستان کے مرکزی رہنما سابق وزیر قانون سید محمد رضا (آغا رضا) امام جمعہ کوئٹہ علامہ سید ہاشم موسوی ڈپٹی سیکریٹری علامہ شیخ ولایت حسین جعفری ضلعی سیکریٹری جنرل ارباب لیاقت علی اراکین کابینہ و یونٹ سیکریٹریز نے گہرے دکھ اور رنج کا اظہار کیا ہے۔

چیف آف ہزارہ قبائل جناب سردار سعادت علی خان مرحوم نے پوری زندگی اتحاد و اتفاق کیلئے کوششیںکیں۔واضح رہے کہ مرحوم کل 7 جولائی کو سی ایم ایچ ہسپتال کوئٹہ میں طویل علالت کے بعد دار فانی سے کوچ کر گئے تھے پروردگار تمام گذشتہ مرحومین کی مغفرت اور انہیں اپنی جوار رحمت میں جگہ عنایت فرمائے۔

مرحوم سردار یزدان خان کے نواسے، سردار عیسی خان کے صاحبزادے، سردار نثار علی خان ہزارہ کے بھائی اور سابق چیف آف آرمی سٹاف جنرل محمد موسی خان ہزارہ اور سردار محمد اسحق خان کے بھتیجے تھے۔ ان کا شمار ہزارہ قوم کے بر جستہ رہنماؤں میں ہوتا تھا۔

انکے مرحوم چچا سابق چیف آف آرمی سٹاف سابق گورنر مغربی پاکستان و سابق گورنر بلوچستان تھے۔انکی قومی خدمات اور ہزارہ قوم کی وطن عزیز پاکستان کی دفاع کیلئے نا قابل فراموش لا زوال قربانیاں تاریخ پاکستان کا حصہ ہے ۔

مجلس وحدت مسلمین پاکستان ضلع کوئٹہ میڈیا سیل سے جاری ہونے والی تعزیتی بیان میں ایم ڈبلیو ایم کوئٹہ کے تمام ذمہ اراکین کابینہ و ممبران معروف شاعر و نوحہ خواں مرحوم فدا حسین نوشاد اور سردار عطا اللہ مینگل کی مرحومہ بہن سردار اختر مینگل کی پھوپھی کی وفات پر بھی گہرے دکھ و رنج کا اظہار کیا ہے ۔ تعزیتی بیان میں کہا گیاہے کہ تمام کابینہ اراکین مرحومین کی مغفرت اور بلندی درجات کیلئے دعا گو ہیں اللہ تعالی انہیں اعلی مقام اور تمام سوگواروں کو صبر جمیل عطا فرمائیں ۔